Ôi lơ 29/3, wa Võ Thị Ánh Xuân, ndơn ƀư Kruanh dak râng rơh rƀŭn Lôch nau kan tâm ton năm 2023 ndrel ký ton nau tâm rlong năm 2024 bah Rkŭm tâm rlong ăp n’gor Tây Nguyên ndrel Duyên hải miền Trung. Rkŭm tâm rlong ăp n’gor Tây Nguyên ndrel Duyên hải miền Trung geh 10 n’gor: Gia Lai, Kon Tum, Dak Lak, Dak Nông, Lâm Đồng, Quảng Nam, Quảng Ngãi, Bình Định, Phú Yên, Khánh Hoà geh rnoh neh rlau 87.180 km2 (geh 26,3% rnoh neh lam dak). Tâm năm rlau aơ, ăp n’gor tâm rkŭm tâm rlong ăp n’gor Tây Nguyên ndrel Duyên hải miền Trung ƀư ueh nau kan tâm rlong rnê nkhôm kơt: Ntrŭt dăng nau hun hao ngih vâl gung trong tâm ban, ueh, têm nkrem, rdâng mpŭng lir.

Bah nau tâm rlong “Lam dak nsum n’hâm ndâk njêng ƀon lan mhe” lvang năm 2021-2025, nau ueh bah ƀon lan ăp n’gor tâm Rkŭm tâm rlong ăp nhoat geh nau rgâl mhe, ntrong kan ngih vâl gung trong geh ntuh kơl, n’hao prêh, nau rêh drăp ndơ, nuih n’hâm bah ƀon lan geh rgâl. Ntoh nau tâm rơh rƀŭn, wa Võ Thị Ánh Xuân, Ndơn ƀư Kruanh dak rnê prêh nau kan tâm rlong, rnê nkhôm bah ăp n’gor tâm rkŭm tâm rlong ăp n’gor Tây Nguyên ndrel Duyên hải miền Trung. Wa Võ Thị Ánh Xuân đă ăp nkuăl lŏ ƀư ueh nau kan tâm rlong rnê nkhôm ân geh tâm dăch ma nau ngăn, lăp tâm nau ngăn hŏ jêng nau nsôih gay hun hao bah neh dak./.