Di nkah 93 năm nar ndâk Đoàn druh ndăm Cộng sản Hồ Chí Minh ndrel khay druh ndăm 2024, kêng măng 25/3, ta ntŭk kan Kruanh dak, ndơn Kruanh dak Võ Thị Ánh Xuân mâp măt rmôt kan ntoh măt ntŭk kan tăch rgâl mom bah Việt Nam. Rlet rlau 30 năm ndâk njêng ndrel hun hao, tât rnôk aơ, ntŭk kan rmôt nŭih pah kan tăch rgâl mom hŏ ndâk tâm 63 n’gor, nkuăl ƀon têh; geh 15 ntŭk kan đah bơi tât 19 rbăn nŭih.

Ăp ntŭk kan bah Hội dôl geh ăp năm rlau 40 rmen đôla Mỹ ndrel pă kan pah ân rlau 5 rkeh nŭih. Tâm rnôk hun hao bah ntŭk kan hŏ ƀư âk nau kan geh nau khlay gay kơl an ân ăp nŭih kan mom ndâk nau kan, tăch rgâl, ntuh kơl, tâm boh ma dak ba dih.

Ntoh nau tâm nar mâp măt, ndơn Kruanh dak Võ Thị Ánh Xuân lah rjăp, rmôt ăp nŭih ƀư nau kan tăch rgâl lah ngoai tâm ăp nŭih tơm, rgop nau ntrŭt dăng nau kan rgâl mhe bah neh dak ndrel tâm rnglăp lam ntur neh, đă rmôt kan tăch rgâl mom Việt Nam ân geh ƀư tĭng dơi ăp nau tă geh, ăp nau dơi tâm rơh rlau aơ, lŏ rgâl mhe nkô̆ nau, nau kan gay ma ban năn đah lam ntur neh, nkre tâm di ma nau đă bah neh dak, nkre ân tâm dăch ma nau ŭch bah rmôt kan nơm./.