Kêng măng 4/3, ta Nhih pah kan Ban Đối ngoại Trung ương, wa Lê Hoài Trung, Bí thư Trung ương Đảng, Kruanh Ban Đối ngoại Trung ương, hŏ wơt Thứ trưởng bôk năp  Bộ Ngoại giao Nga Vladimir Titov dôl geh hăn khâl Việt Nam gay ƀư  tâm nchră trong tâm boh têh jong – njrăng n’gang neh dak- rnă njrăng Việt Nam - Nga tâl 13.

Mbah rhơn geh nău dơi bah tâm nchră  tâm boh têh  jong- njrăng n’gang neh dak- rnă njrăng Việt Nam - Nga, wa Lê Hoài Trung lah rjăp, Đảng, Ngih dak n’hanh ƀon lan Việt Nam uănh khlay tâm  boh tâm rnglăp way ơm, tâm boh têh jong lam  lĕ rngôch đah Nga; tâm ôp  mpeh du đêt trong rƀŏng têh gay ndơ̆ hun hao tâm boh bar dak ta ăp trong kan. Rnê  âk  ăp njuat hun hao nsrôih uĕh bah tâm boh Việt - Nga, Thứ trưởng bôk năp Titov lah rjăp, Nga way uănh khlay nău rdâk tay, hun hao tâm boh đah Việt Nam. Thứ trưởng bôk năp Titov nkoch nău rgop bah wa Lê Hoài Trung mpeh ăp trong rƀŏng, trong nkra têh gay ntrŭt ntrôl tâm boh bar dak tâm let năp tay, lơn lah ntrŭt ntrôl ăp mpôl hăn tâm khâl gưl têh năm 2024.