Tă lah ntŭk duh jêr mpeh đăp mpăn rnă njrăng thôn 17, xã Ea Ning, nkuâl Cư Kuin, n'gor Dak Lak aƀaơ hŏ jêng ntŭk ntĭt leo mpeh Nkual ƀon lan gŭ đăp mpăn, mô geh nuĭh tih. Dơi geh nău nê, ndrel đah du nuih n'hâm, tâm rnglăp bah nuĭh ƀon lan, ân nkoch tât nău khlay kan bah nuĭh hăn lor bôk nău lah wa Lê Xuân Mao. Bol rnôk hôm ƀư kruanh thôn mô lah hŏ rgâl jêng nău kan mhe, păng hôm way nsrôih, đah ăp trong ntĭt leo, jêng "glo tơm" krêp dêh ăp nuĭh ƀon lan tâm thôn, xã; rdâk njêng Nkual ƀon lan gŭ đăp mpăn, mô geh nuĭh tih djơh tâm nău rêh.  

Thôn 17 aƀaơ hŏ dơi mbluh đah tât nklang xã Ea Ning, hăn tât nkuâl Cư Kuin ma trong bê tông têh hvi, geh n'gâng ŭnh mpoh ang tâm măng. Tĭng wa Nguyễn Văn Bá, du hê nuĭh ƀon lan thôn 17, trong dja dơi ƀư geh bah nău nsum ti rgop bah ăp nuĭh ƀon lan mpeh prăk kaih, rong neh n'hanh dŭt âk nar luh kan. Nău du nuih n'hâm, krêp dêh bah nuĭh ƀon lan thôn 17 kơl rnă njrăng đăp mpăn dơi  mât nâp, nău tâm rŏng ƀon lan êt lhăt, nău  ntŭng rmuănh ndơ tuch tăm, lơh ndjơh tơm tăm hŏ mô hôm geh. Wa Nguyễn Văn Bá an gĭt, kônh wa tâm thôn aƀaơ dŭt đăp mpăn pah kan jan sa.

Ntơm nơh, aơ lah ntŭk dŭt duh jêr, ăp ntil nuĭh tih an tât ntŭng rmuănh, xì ke, ma túy, pit ndơ geh đŏng. Yơn ntơm bah rnôk an ƀư lam ƀon lan ƀư jăp pah kan rnă  njrăng, mât thôn, buôn, rnă njrăng neh dak ri dơi ŭch kơl bah lĕ rngôch ƀon lan ta du nuih n'hâm râng, ri  mpôl hên hŏ ntrôl rŭch nău tih ta nkual dja nar lơn ma hŭch mbrơi. Lơn lah kruanh thôn Mao, păng nkre geh nuih n'hâm dơn kan, nkre geh nău tă ơm gĭt kan ƀư mât uănh, rdâk njêng ăp trong leo ƀư an tât rgŏ jă đăp mpăn an thôn buôn, rnă njrăng đăp mpăn tĭng thôn ƀon.

Wa Mao ma wa Nguyễn Văn Bá nkah tât lah Lê Xuân Mao, kruanh thôn 17 bah năm 2014, rnôk Công an n'gor Dak Lak sơch ntŭk dja  lah ntŭk ntĭt leo "Nkual ƀon lan gŭ đăp mpăn, mô  geh nuĭh tih djơh tâm nău rêh". Gay nău rdâk njêng trong ntĭt leo ơm dơi tât geh ngăn ngăn, wa Lê Xuân Mao hŏ nsŏng kơl an gưl ủy, n'gâng kan ta ntŭk ƀư ăp rơh nkoch trêng, tâm nđŭr, nkoch bri lô ka đah nuĭh ƀon lan, nkra nău tâm rkeh, n'hao nău tâm rnglăp, rdâk tay nău tâm rŏng ƀon lan, rđăp dêh tay ăp nuĭh tă hăn tih trong. Wa Lê Xuân Mao nkah tay:

Mpôl hên ƀư rdâk njêng trong ntĭt leo Nkual ƀon lan gŭ đăp mpăn, mô geh nuĭh tih djơh n'hanh khuch tâm nău rêh, tât aƀaơ hŏ 8 năm. Mpôl hên way ƀư hop ƀon lan, nkoch trêng an ƀon lan mpeh mât rnă njrăng neh dak, jêng lah ăp du hê nuĭh ƀon lan lah du tahen công an. Tâl bar lah geh 5 Tổ liên gia tâm thôn ri ăp tổ liên gia lah du rmôt njrăng, n'gang nuĭh tih. Mpôl hên nkoch trêng, ƀư way nkô̆ mpeh pah kan mât đăp mpăn rnă njrăng, hôm n'hao nău  gĭt êng bah nuĭh ƀon lan gay rêh nsum tâm rnglăp lơn n'hanh ƀư jăp pah kan gay đăp mpăn mât rnă njrăng.

 Lôch nkoch trêng, rgŏ jă, tât aƀaơ, nuĭh ƀon lan thôn 17 hŏ plơ̆ jao 5 n'gâr phao njêng êng, rđăp dêh 12 druh ndăm way geh nău tih pháp luật n'hanh ton mô hôm lâp tay nău tih. Ban mât njrăng êng thôn hăn treng nđôi mbro, ban saơ n'hanh râng nking nchăng 34 tơ̆ druh ndăm tâm lơh, nchrai 23 mpôl druh ndăm rgum rlău ir mông an ƀư roh đăp mpăn, đă rnăk wâl gay rgŏ jă nkah n'hanh mât njrăng khân păng gay mô an ăp druh ndăm tih pháp luật.

 Êng wa Mao nơm kan nsum đah mpôl Công an xã nkra 14 tơ̆ nău tih ndra ma lơh sôt rmanh, nkra 20 tơ̆ nău tâm rkeh ndrăng ƀon lan nơm, râng ban saơ, lah phong 5 tơ̆ nău tih pâl bai sa prăk, mbơh an Công an xã 12 tơm nău lư rhŏ an pah kan hăn ôp uănh nău tih.

Nơm geh kơt nê̆, bah ntŭk duh hô mpeh nô nău rnă njrăng, tât aƀaơ, thôn 17 mbrơi jêng nkual ƀon lan đăp mpăn, mô geh nuĭh tih djơh, Đại úy Bùi Văn Trọng, Kruanh công an xã Ea Ning, nkuâl Cư Kuin uănh năl, trong ntĭt leo Nkual ƀon lan gŭ đăp mpăn, mô geh nuĭh tih djơh tâm nău rêh ta thôn 17 hŏ mpơl geh nău tam tâm nău mât đăp mpăn rnă njrăng, đăp mpăn nău rêh bah nuĭh ƀon lan ta xã.

Đah nău dơi tam bah trong ntĭt leo nê ri dŭt rnê âk nău khlay kan bah wa Lê Xuân Mao, Kruanh tiểu ban trong ntĭt leo, ri dŭt mpư n'hao nuih  n'hâm dơn kan tâm pah kan mât đăp mpăn rnă njrăng ta thôn 17 tâm ban kơt ta lam xã đŏng. Wa dja dŭt rah rơch, ngăch prăl tâm pah kan, geh dŭt âk nău rgop têh an công an xã tâm ban kơt n'gâng kan ta ntŭk tâm pah kan mât đăp mpăn, rnă njrăng đŏng. Ntơm bah nău dơi geh ta trong ntĭt leo thôn 17 ri Công an xã hŏ pơk luh tât 2 trong ntĭt leo ta thôn 24 n'hanh thôn 22 xã Ea Ning.

 Ntơm bah kêng dŭt năm 2021, wa Mao bah hôm ƀư kruanh thôn 17, rgâl jêng ƀư Kruanh Hội Nuĭh âk năm deh n'hanh Hội Nuĭh ji khêh dak si dioxin xã Ea Ning. Păng dôl lah đại biểu hội đồng nhân dân gưl nkuâl n'hanh ủy viên Ủy ban mặt trận tổ quốc Việt Nam nkuâl Cư Kuin. Ta 65 năm deh, păng hôm krêp dêh đah nuĭh ƀon lan tâm thôn đŏng, rong an âk mông nar ôp khâl, rgŏ jă ăp nuĭh sĭt ndrung n'hanh plơ̆ lăp nsum tay đah ƀon  lan, ntrŭt nsôr khân păng rvê nău kan, joi geh wăng sa mô hôm chôt prah tâm trong tih tay đŏng ôh.

 Đah ăp nău rgop nê, wa Lê Xuân Mao dơi nuĭh ƀon lan nsing nơm, dêh rŏng, dơn geh mbro Giấy khen, Bằng khen bah UBND n'gor n'hanh Giám đốc Công an n'gor Dak Lak. Mhe aơ, wa Mao rhơn n'hao lah ngoăy tâm 15 nuĭh ntoh lư lam dak dơi Bộ trưởng Bộ Công an nkhôm an Bằng khen yor geh âk nău rgop an pah kan njrăng, n'gang nuĭh tih n'hanh trong leo lam ƀon lan mât rnă njrăng neh dak năm 2022.

H’Xíu H’Mốc-  Nuĭh rblang: Điểu Thân