- Ơi wa, Nghị quyết 23 bah Bộ Chính trị dôl pơk trong hun hao an nkual Tây Nguyên. Đah nău geh êng bah Dak Lak nghị quyết mbra ndơ̆ tât hun hao m’hâm mêh wa ?

- Wa Nguyễn Đình Trung: Dơi lah Nghị quyết 23 bah Bộ Chính trị an lah du njoăt rgâl khlay hun hao wăng sa rêh jêng đăp mpăn rnă njrăng mât njrăng bri dak ta Tây Nguyên lah nsum n’hanh Dak lak lah êng. Ndrel đah bôk nău kan ƀư mhe dơi chính phủ an tâm nĕ na nê̆ rgâl jêng 23 nău kan, 9 nău nchrăp ƀư ntuh kơl mpeh ntung trong boăt nthoi trong nkual bah Tây Nguyên. Dak Lak lah n’gor gŭ tâm nkual Tây Nguyên n’hanh mât ƀư ta n’gul bah nkual. Aơ mbra ăp nău khlay pơk luh âk nău dơi mhe an n’gor Dak Lak dơi mât, ƀư geh săk rnglăy lơn ăp nău geh têh, rlet rlău jêr jŏt ntul rlong geh njoăt rgâl mhe, têh dăng hun hao wăng sa rêh jêng, đăp mpăn mât njrăng bri dak rnă njrăng.

Wa Nguyễn Đình Trung, Ủy viên Trung ương Đảng, Bí thư n’gor ủy Dak lak ơh nău ôp VOV

N’gor Dak Lak mĭn du đêt jêr jŏt tâm rnôk ƀư tĭng nĕ lah: jêr jŏt tâm rlong têh bah rnôk rgum lăp wăng sa ta ntŭk tăch ndoh ndơ lŏ mir. Tal 2, rmôt pah kan bôl âk yơn rnoh nuĭh pah kan uĕh mô âk. Nău tal 3, Dak Lak hôm e n’gor ach o mô dơi tâm ban tơm prăk, rnoh ach o tâm nkual rnoi mpôl đêt nkual jêr jŏt hôm e âk ƀư hao ăp nău mô đăp mpăn tâm nău rêh jêng kon nuĭh...

- Ndrĭ n’gor geh trong nchrŏng m’hâm gay rlet rlău ăp jêr jŏt nĕ, mât uĕh jâng nsan bah nơm gay ƀư dơi nghị quyết, hơi wa?

- Wa Nguyễn Đình Trung: N’gor mĭn ndăn ndâk njêng n’hanh hun hao jru bôk nău kan ƀư bah n’gor gay ƀư tĭng nghị quyết bah Bộ Chính trị, ƀư tĭng bôk nău kan ƀư bah Chính phủ. Tal 2, lôch jêh nău ƀư, mbơh, uănh an n’hanh mbơh ƀư săk rnglăy dăp rgum n’gor Dak lak tâm năm 2021-230 n’hanh uănh tât năm 2050. Đăp mpăn đah dăp rgum lĕ rngôch lam dak, dăp rgum nău kan ngih dak n’hanh dăp rgum nkual Tây Nguyên. Tal 3, mbơh ƀư uĕh tay ăp nău geh aƀaơ hin. Lơn lah tĭng tâm 4 n’gâng tơm nĕ lah: Hun hao ăp ndơ lŏ mir geh têh hvi; hun hao công nghiệp nkret njêng si glê, tui ka n’hanh ŭnh nar nkra njêng têh; hun hao wăng sa nkual ƀon têh, dak bât, hun hao ndơ logistic nsing nơm tâm mrô, wăng sa mrô, nău rêh jêng mrô. Tâm nĕ hun hao nkual ƀon têh Buôn Ma Thuột jêng ta nklang bah nkual Tây Nguyên tĭng n’glôn jêh 67 bah Bộ Chính trị. Nkre, n’gor mât uănh rjăp, jêng nău tâm ban ŭch âk tâm ăp gưl ăp nău kan mpeh nău đă jăch ndăn ntrôl dăng kan ndrel tâm rgop nkual geh ntŭk ntô tâm ban ŭch mkra ăp nău wăk kol, n’hao dơi tâm rlong, mât uĕh nău geh âk bah nkual. Ƀư tĭng geh săk rnglăy ăp nău kan đăp mpăn nău rêh jêng mât uănh nău rêh bah nuĭh ƀon lan. Ngăn lah ƀon lan rnoi mpôl đêt, đăp mpăn mât njrăng bri dak rnă njrăng ta ntŭk.

- Tâm âk trong hun hao bah Tây Nguyên, mbơh ƀư ăp nău nchrăp ƀư lah dŭt khlay. Yơn ta âk ntŭk tâm nkual, ăp nău nchrăp ƀư têh lĕ geh mâp âk jêr jŏt. Ta Dak Lak nău aơ m’hâm mêh n’hanh m’hâm gay dơi ƀư “njôr nkăng soih luh” mbơh ƀư nău nchrăp kan, ntrôl hun hqao, dơi geh ngăch nău rƀŏng nkoch tâm Nghị quyết 23 mêh?

Nghị quyết 23 bah Bộ chính trị rnôk tât n’hanh n’hâm soan gay ndơ̆ Dak Lak hun hao

- Wa Nguyễn Đình Trung: Gay mât uĕh tay săk rnglăy prăk ntuh kơl n’hanh n’hao lơn tay săk rnglăy ăp nău nchrăp ƀư rgop ƀư tĭng dơi Nghị quyết bah Bộ Chính trị, n’gor Dak Lak ton n’hao lơn tay nuih n’hâm lĕ nău kan nta an tâm ban ŭch mbơh ƀư tĭng; mĭn kloh nău kan bah tĭng ngih pah kan, tĭng ntŭk kan tâm nău rdâk ƀư. Mĭn nchrăp dŭt n’hâm mbơh ƀư ăp nău kan bah n’gor. Nkre, nchrăp tâm rgop rjăp đah ăp ngih pah kan trung ương, ăp n’gor tâm nkual gay mbơh ƀư ăp nău nchrăp kan. Wăch rgum prăk n’hanh ƀư tĭng ăp nău nchrăp ƀư khlâywp trong mkra tam rgŏ jă ăp tơm prăk ntuh kơl lĕ kon nuĭh gay ntuh kơl ndâk ƀư ntung trong wăng sa rêh jêng tơm khlay. Lôch jêh tay trong ƀư nău kơl wăch rgum ntuh kơl, ntrôl dăng rgâl nkra hành chính, rgâl ntŭk ntô ntuh kơl, n’hao trong kan mât uănh ngih dak mpeh ntuh kơl ndâk ƀư. Ƀư tĭng rjăp trong kan uănh nđôi, groi uănh đah ăp nău ƀư ntuh kơl. Nkre dăp tĭng gưl ăp nău nchrăp ƀư gay tâm pă tơm prăk ntuh kơl jêh ơm ndơ̆ ndơ ƀư an dŏng săk rnglăy rgop jêh ăp nău rƀŏng hun hao wăng sa rêh jêng gay n’gluh an bah nĕ rgop an hun hao nsum bah nkual Tây Nguyên n’hanh lam dak.

- Ơ, dăn lah uĕh wa !