Mpôl hên rnê dŭt âk nău Chính phủ dâk nkra ngăch, ƀư lĕ n’hâm suan gay rgâl di tay ăp trong khoah bah Nghị định 38. Nău nê mbra droh rklaih jêr jŏt an ƀon lan kan lŏ mir n’hanh hợp tác xã. Ăp ndơ geh ƀư hŏ ƀư di rêng aƀaơ geh trong tăch n’gluh, suan dăng tâm rlong bah sầu riêng Việt Nam mbra dơi n’hao têh. Gâp mĭn lah kônh wa mbra geh nău gĭt êng lơn tâm nău mât kơn săk kah, ntơm bah nê sầu riêng Việt Nam mbra tâm rlong n’hanh nsan hao ta ntŭk tăch rgâl lam ntŭr neh."

Mpôl doanh nghiệp tăch n’gluh uănh năl Nghị quyết 36 hŏ droh rklaih "kô̆ yơn" dŭt têh lah siƀŭt pă an mã mbrô nkual tăm n’hanh ntŭk nklâm tâl. Wa Huỳnh Kiều, ntơh măt doanh nghiệp tăch n’gluh sầu riêng ta Dak Lak an gĭt, siƀŭt dăn pă an mã bah doanh nghiệp hŏ kâp rlău 4 khay. Nău tĭng ƀư lôch jêh pơk ƀoh bah ngai, pă gưl an xã n’hanh rhuăt glêh nar ƀư mbra njêng nău rgâl têh an nău kan tăch n’gluh. Wa Huỳnh Kiều dăn đă ăp n’gâng kan dơi kan ngluh an dŏng trong rƀŏng na nê̆ ăp quy định gay doanh nghiệp dơh kơt ƀư.

"Dăn đă Sở Công Thương ƀư jêng ngăn ngăn ăp quy định jêng ntĭm nti dơh gay an doanh nghiệp kơt dŏng, đăp mpăn di nău way an n’hanh rhuăt glêh nar nkra ƀư. Nkre, n’gâng kan sŏk soăy ân geh trong rƀŏng ntĭm nti na nê̆, kloh rvah gay doanh nghiệp, nuĭh joi rvăt n’hanh nuĭh ƀon lan nkual tăm tĭng ƀư di tĭng nău way an, bah ir geh nău tât rmoh rman mpeh sŏk soay tâm rnôk rgum rvăt, tăch n’gluh sầu riêng."

Nghị quyết 36 mô dơn mpŏng droh rklaih siƀŭt dăn pă an mã ma hôm njêng jâng nsing nkra ăp nău nchiăng khan ta ăp rêng tăch n’gluh sầu riêng. Lam n’gor aƀaơ geh nklăp 200 ntŭk nklâm tâl yơn dơn geh nklăp 16 ntŭk dơi pă an mã mbrô đăng ký nchâp đă tă bah Tổng cục Hải quan Trung Quốc an ăp doanh nghiệp dak bah dih ƀư njêng, nkret njêng mô lah mât prăp ndơ sa n’hanh ndơ tuch tăm gay dơi an tăch n’gluh tĭng trong me tât Trung Quốc (mã GACC); mbrô nkual tăm dơi pă an mã hôm đêt đŏng. Nău dja ƀư âk doanh nghiệp ân tăch n’gluh ma du ntŭk kan êng, ntoh tay nău tăch rvăt mã n’hanh âk rmoh rman mpeh hóa đơn, siƀŭt an saơ.. Wa Hoàng Thị Thanh Thủy, Giám đốc Công ty Mbơh nti sŏk soăy ta Dak Lak an gĭt:

"Nghị quyết 36 mhe n’gluh an dŏng gâp dŭt rhơn ngăn. Trong tâm n’guăk kan hŏ dơi ntlơi jăng du gâl, siƀŭt pă an mã ngăch n’hanh ăp kôp mbra hŭch bah nău mô tŏng mã nkual tăm, mô tŏng ntŭk nklâm tâl, njêng ntŭk tâm rlong geh nău tâm ban lơn. Mpôl hên mbra ntop kơl ăp doanh nghiệp n’hanh ƀon lan kan lŏ mir ƀư lôch jêh hồ sơ gay ơm dơi kơl an mbrô."

Wa Lê Anh Trung, Kruanh Hiệp hội Sầu riêng n’gor Dak Lak năl lah, nău doanh nghiệp mpŏng mô dơn lah siƀŭt dơi rhuăt glêh ma hôm lah trong ƀư mât mhe. Nău rgâl jêng tâm n’guăk nchih mbơh êng, dơn êng nău tih di nkre đah uănh năl kah uĕh bah kơi mbra hŭch mpet jâk ƀư siƀŭt, nkre n’hao nău dơn kan bah ăp tơm mpôl tâm lam rêng mât chăm.

"Gâp mpŏng ăp mpêr n’gar nking kol mpeh siƀŭt tăch n’gluh mbra mô hôm lah nău nking jêr. Rnôk ăp ndơ dơi tĭng ƀư soih aih, di rêng ri mbra bah ir geh nău đek mân, bưm kol rnôk hăn nkra ƀư siƀŭt. Khlay lơn, aơ mbra lah jâng nsing gay Dak Lak rdâk njêng nkual tăm srăch uĕh, đăp mpăn, tŏng ăp nău ŭch geh kah uĕh bah lĕ rngôch ăp ntŭk rvăt lam ntŭr neh."

Nghị quyết 36 bah Chính phủ quy định nău pă n’hanh mât dŏng mã mbrô nkual tăm, ntŭk nklâm tâl dơi ƀư lĕ rngôch ta Mpông pơk rhŏ ƀư gưl neh dak; nău dơi wơt dơn, nkre ƀư siƀŭt dơi pă gưl an UBND gưl xã. Nar nkra ƀư dơi rhuăt glêh jŭt hôm 3 nar pah kan đah siƀŭt mô kâp pă an mã mbrô tăch n’gluh.

Đah Dak Lak – ntŭk geh rnoh neh tăm sầu riêng dŭt hvi lam dak, Nghị quyết 36 dơi mpŏng mô dơn droh rklaih wăk kol mpeh siƀŭt ma hôm rgop ƀư kloh rvah rêng rnoh khlay, n’hao săk kah ndơ geh ƀư n’hanh nău dơi tâm rlong bah ndơ tăch sầu riêng ta ntŭk tăch rgâl dak bah dih.