Ngih mpla ndơ Hoàng Sa tâm trong Hoàng Sa, ngoai tâm ăp trong ueh ngăn bah Phường Thọ Quang, Quận Sơn Trà, nkual ƀon têh Đà Nẵng. Tâm ăp nar aơ, âk ngăn kon se nti, sinh viên, druh ndăm, tahen ơm, bu năch tâm ndrel bah dih dak ndrel ăp nŭih ŭch đăp mpăn, rŏng dak lêng gôl dak hŏ tât uănh. Gay tât uănh ăp rup ueh mpeh Hoàng Sa, Trường Sa geh mpal ta ngih mpla Hoàng Sa, oh Lê Khánh Ly, sinh viên ngih săm ƀŭt Đại học Sư phạm Đà Nẵng, ngơi:

            ‘Lah du hê nŭih mom rnôk tât uănh Ngih mpla rup Hoàng Sa, du tŏ tay đŏng nkah gâp gĭt kloh lơn mpeh nau ƀư tơm bah gôl dak, dak lêng bah neh dak, ngăn lah đah2 gôl dak Hoàng Sa ndrel Trường Sa. Ăp nŭih mom kơt hên nar lơn ma n’hao prêh nau mĭn, nau nkoch tât ăp nŭih êng lŏ ƀư rjăp nau ƀư tơm bah neh dak. Hoàng Sa ndrel Trường Sa lah bah Việt Nam”.

            Ăp blah bản đồ, tư liệu ơm, bah rnôk aơ ma rhiăng năm ndrel rup nkoch ân saơ geh tât choi, nkhop tor...ăp ntil ndơ ân saơ rnôk ntăm n’gâng, ndâk bia ƀư tơm bah Việt Nam tâm 2 dôl dak Hoàng Sa ndrel Trường Sa. Aơ lah ăp nau mpơl saơ ngăn mpeh nau ƀư tơm bah Việt Nam đah gôl dak Hoàng Sa; nau kan, nau ƀư, nau khlay bah gôl dak tâm nau ndâk njêng ndrel mât neh dak. Trung uý Lê Xuân Thiêm, Groi kruanh rmôt bonh đă ƀon lan, Đồn Biên phòng Sơn Trà, N’gâng kan rđau tahen Biên phòng nkuăl ƀon têh Đà Nẵng mbơh:

            “Tâm rơh rlau aơ, cán bộ, tahen Đồn Biên phòng Sơn Trà tâm rgop nsum đah gưl uỷ, n’gâng kan, ăp ntŭk kan geh tât vay ƀư ăp nar nkoch trêng. Bah ăp nar nkoch trêng rgum mô lah êng, hên nkah ăp nau gĭt, nkô̆ nau geh tât nau kan bah gôl dak lêng bah Việt Nam. Phung hên vay ƀư ăp bôk nau kan kơl an tâm nau rêh ân ƀon lan joi ka, rgop nau ndrle kônh wa mât dak lêng, mât nâp nau ƀư tơm bah gôl dak neh dak Việt Nam”.

            Ngih mpla ndơ Hoàng Sa yor UBND nkuăl Hoàng Sa, nkuăl ƀon têh Đà Nẵng mât. Ngih dak m’ŏng dak lêng Biển Đông, geh nkra tâm rnoh neh bơi tât 1.300m2. Ngih aơ lăp kan ntơm khay 3/2018, pơk mpông kơl an ƀon lan dnrel năch tât uănh. Ăp năm, ntŭưk aơ vơt ma rbăn tŏ năch tât uănh, joi gĭt mpeh nau ơm yau.

Rlau 300 tâm rnoh âk rbăn săm ƀŭt, ndơ dŏng geh mpla ta aơ ân saơ mpeh nau ƀư tơm dak lêng gôl dak bah Việt Nam đah 2 gôl dak Hoàng Sa ndrel Trường Sa. Wa Lê Tiến Công, chánh văn phòng UBND nkuăl Hoàng Sa, Giám đốc ntŭk mpla rup Hoàng Sa, mbơh:

            ‘Gay kơl an ueh ngăn nau ŭch bah năch uănh ndrel ăp nŭih ŭch mpeh gôl dak Hoàng Sa, hên geh nau nchrăp ndrel ntrŭnh ƀư nau kan mpeh rnoh mrô ăp nau mbơh nkoch ndrel ntŭk mpla n’hơ ăp ntil tâm Ngih mpla n’hơ Hoàng Sa leo tâm Website bah mrôt kan gay ma ƀon lan geh dơi gĭt kloh nau mpeh nau ƀư tơm bah Việt Nam đah gôl dak Hoàng Sa”.

            Wa Võ Ngọc Đồng, Giám đốc Sở Nội vụ nkre Kruanh UBND nkuăl Hoàng Sa, nkuăl ƀon têh Đà Nẵng lah rjăp:

            ‘Hên phung rđau Ngih mpla rup ndoh ndơ Hoàng Sa geh ndâk nau kan, nau nchrăp, ntrŭt dăng nau kan nkoch trêng njêng nau gĭt jru ngăn ndrel n’hao nau kan tam ƀon lan mpeh nau ƀư tơm gôl dak, dak lêng Hoàng Sa. Phung hên tâm rgop ma nau nkoch trêng đah bôk nau kan mêt uănh, hăn joi, ntĭm mbơh nau kan ơm yau bah nkuăl bah ăp ngih săm ƀŭt tâm nkuăl. Phung hên tâm rgop ma Thànhđoàn, N’gâng kan ntĭm nti, Sở Du lịch ƀư nchrăp leo ăp nau geh bah Hoàng Sa tât đah bu năch tâm ndrel bah dih dak. Ngăn lah, ƀư nau mpla n’hơ tât ngih săm ƀŭt Đại học, phổ thông tâm lam nkual ƀon têh gay kon se nti, sinh viên, rơh mom geh gĭt saơ ăp nau ueh, ăp nau mpơl ơm, nau kan pháp lý kŏ kơt lah nau ngăn mpeh nau ƀư tơm bah Hoàng Sa”.

            Hoàng Sa ndrel Trường Sa tă jŏ ma aơ mro lah du gưl nting mham, nau huêng khlay, mô dơi nkhah bah nkuăl neh Việt Nam. Việt Nam geh ăp ntil nau mpơl saơ ơm, pháp lý ndrel mro geh nau mbơh, nau lah rjăp nau ƀư tơm bah Việt Nam đah 2 gôl dak Hoàng Sa ndrel Trường Sa./.