VOV4.M’nông – Tâm 2 nar 21 n’hanh 22/9, Đoàn TNCS Hồ Chí Minh n’gor Dak Nông lĕ ƀư Đại hội đại biểu rơh tal4, năm kan 2022-2027, đah tât râng bah 200 nuĭh ntoh măt an rlău 157.000 đoàn viên druh ndăm lam n’gor. Aơ lah n’gor Bôk năp ta nkual Tây Nguyên ƀư đại hội đoàn druh ndăm. Tĭng nău mbơh ta Đại hội, năm kan bah năp, đoàn druh ndăm Dak Nông lĕ dơi geh n’hanh rlău 11/12 rnoh an ƀư. Ntoh lư tâm ntrong leo râng ndâk njêng ƀon lan mhe, ăp gưl Đoàn lĕ ƀư bơi 7.000 ndơ, gưl kan druh ndăm đah dĭng lĕ rlău 38,43 rmen prăk. Druh ndăm lam n’gor lĕ ƀư hang rbăn nău kan nkoch trêng n’hanh hăn mât njrăng ntŭk ntô gŭ âm, mkra ndŏk nja, tăm mhe rlău 700.000 tơm si ăp ntil; ndâk ƀư, nkra 127 ntŭk rgum rƀŭn, pâl rlưn an druh ndăm rchong, ƀư âk bôk naư kan kơl kon se jêr jŏt đah dĭng lĕ rlău 15 rmen prăk.

Druh ndăm n’gor Dak Nông lĕ n’gluh an 12 rmôt rnoh ndơ ƀư, 8 bôk nău kan an tâm nchră, bôk nău kan khlay năm kan 2022-2027.

Đah nău nchih ƀư tĭng: “Druh ndăm Dak Nông hăn lor, nău ŭch, mĭn ƀư mhe, hun hao”, Đại hội đoàn TNCS Hồ Chí Minh n’gor Dak Nông rơh tal 4, năm kan 2022-2027 lĕ n’gluh an 12 rmôt rnoh an ƀư, 8 bôk nău rgop an tâm nchră, bôk nău kan khlay đah nsrôih rgâl nău ŭch jêng ăp nău ƀư nsĭt săk rnglăy ngăn ngên. Dôl uănh lah ăp nău rƀŏng kơt: ăp năm tăm mhe 250.000 tơm si; ntop kơl 10 thôn, ƀon jêr jŏt jêng rnoh ndơ ƀư thôn ƀon mhe; ntop kơl 200 rmen prăk an druh ndăm manh prăk ndâk njêng nău kan; rĭng ăp năm n’hŭch rlău 6% rnăk ach o druh ndăm rnoi mpôl đêt...

Nuĭh rblang: Y Sưng Phê Ja