Ta rnôk ntơm pah ƀư gâl 3 mpeh nchrăp ntuh kơl rdâk njêng trong cao tốc Quy Nhơn – Pleiku, wa Phạm Anh Tuấn-Kruanh UBND n’gor Gia Lai đă ăp nuĭh tơm ƀư ân ƀư đăp mpăn nâp uĕh, ton mât uănh nâp uĕh 5 năm đah njăr trong ƀư. Nchrăp trong cao tốc Quy Nhơn – Pleiku geh rnoh jong nklăp 125 km, hvi 4 mbor ndeh, lĕ rngôch tơm prăk ntuh kơl 43.700 rmen prăk n’hanh dơi tâm pă ƀư jêng 3 gâl ntrŭp. Tâm nê, gâl 3 geh rnoh jong nklăp 35 km, ntơm bah Km 90 tât Km 124, đah lĕ rngôch rnoh âk ntuh kơl 9.100 rmen prăk. Trong hăn rlău 6 xã, phường lah Lơ Pang, Mang Yang, K’Dang, Đak Đoa, Ia Băng n’hanh Hội Phú; nchrăp ƀư lôch jêh tâm năm 2029.

Lah ta rơh ntơm pah ƀư, wa Phạm Anh Tuấn-  Kruanh UBND n’gor Gia Lai an gĭt, Quốc lộ 19 aƀaơ lah njăr trong me nthoi đah luh nar – nhâp nar n’gor Gia Lai lôch n’glăp nsum n’gor, yơn nha hôm âk gâl sop nkuăch nkue, măt trong huêt, rŭ hôch geh ma nău roh đăp mpăn hăn ntung trong, jêng kô̆ yơn nking kol têh đah hun hao wăng sa- rêh jêng kon nuĭh bah n’gor đŏng. Rnôk ƀư wat jêh, trong cao tốc Quy Nhơn – Pleiku mbra rhuăt glêh mông nar hăn, hŭch du n’gul prăk nchuăn rdeng, n’hao nău dơi ntêng lêng nkual, jêng njăr trong me têh khlay luh nar– nhâp nar, nthoi đah cao tốc Bắc – Nam, tach ndeh păr, ndrâm dak lêng n’hanh mpông n’har bri Lệ Thanh, bah nê ntrŭt ntrôl hun ao wăng sa- rêh jêng kon nuĭh n’hanh n’hao nău rêh nuĭh ƀon lan. N’gor Gia Lai đă ăp nuĭh tơm ndranh ƀư n’hanh tâm rgop ƀư ân ƀư nâp uĕh đah njăr trong, gay tât di rnoh ton mât nkra đăp mpăn nâp uĕh 5 năm.