Ndrel đah ntĭm nti rplay săm ƀŭt an ăp oh kon hoc, nai nti hôm nha geh ăp nău tâm rgop kan khlăy đah n’gâng kan n’hanh nuĭh ƀon lan ta ntŭk ƀư tĭng bôk nău kan nkô̆ mpŏng ngih dak rdâk njêng nkual ƀon lan mhe. 

Năm nti 2022-2023, ngih nti THCS xã Đăk Mar, nkuăl Đăk Hà geh 673 kon hoc, tâm nĕ geh 321 kon hoc lah nuĭh ƀon lan rnoi đê̆. Nai nti Phạm Thị Kim Hồng, groi hiệu trưởng ngih nti an gĭt, ndrel đah ntŭk ngih nti tơm, ngih nti hôm nha geh ntŭk nti tal 2 ta thôn Kon Gung- Đăk Mút đah nău tâm ƀah klâp ma rlău 11km. Ta ntŭk ngih nti aơ geh 7 jrô nti đah 230 kon hoc lĕ rngôch lah oh kon mpôl rnoi đê̆ Bahnar n’hanh Xơ Đăng.

Gay ma nău ntĭm n’hanh nti geh săk rnglăy âk, Ban giám hiệu ngih nti THCS xã Đăk Mar mbơh pă 7 năi nti lah đảng viên mât leo ăp jrô nti n’hanh ăp nai nti lĕ n’hao ueh nău kan nuĭh nai nti ƀon lan.

“Chi bộ ngih nti pă an đảng viên mât nău kan ăp jrô nti n’hanh jăn jŭr ta ăp ntŭk bâh ăp thôn geh mât uănh rmôt rnăk tĭng di đah kon hoc geh gĭt nău luh lăp ta jrô nti bâh ăp oh gay ma dơi geh nău kan bmơh tơih rgŏ jă. Ƀư tĭng nău kan ntĭm nti ma nai nti dơi geh jêr jŏt rĭ mbra tâm mbơh nchră ngơi sŏng dăng đah ăp đồng chí đảng viên mât dơn nău kan tơm ta nĕ. Rlău ma nĕ lĕ geh pă an đảng viên mât dơn tâm rgop đah ăp kruanh thôn gay ma rgŏ jă mbơh tơih kon hoc hăn nti”.

Nău ngăn an saơ nău ntĭm n’hanh nti bâh kon hoc ta ntŭk ngih nti tơm tâm ban kơt ăp ngih nti ta thôn Kon Gung- Đăk Mút bâh ngih nti THCS xã Đăk Mar, nkuăl Đăk Hà dŭt dơh tâm di.

Ntŭk ngih nti kloh ueh n’hanh dăch bên kơt njêng tay nău ueh nsrôih tâm ăp nău ntĭm nti bâh nai nti tâm ban kơt geh gĭt vât nău nti bâh ăp oh kon hoc. Đah ƀon lan ăp mpôl rnoi ta aơ rup nuĭh nai nti lĕ jêng dŭt bên dăch, dăch mêr. Ƀon lan way tâm nkoch, mê̆ bơ̆ nơm mô nă gĭt nău ntĭm nti bâh oh kon nơm đah ăp nai nti. Bâh ăp nău kan na nê̆, nău pah kan di bâh ăp nai nti lĕ geh nău kơl an ăp nuĭh ƀon lan rgâl mhe nău mĭn uănh khlăy nău nti lơn bâh oh kon nơm. Yuh Y Thoan, nuĭh ƀon lan Kon Gung dôl geh kon tĭng nti jrô 6 mpơl nău rhơn bâh nơm đah ăp nai nti.

 “Nai nti ta aơ dŭt ueh jăp, nsrôih đah kon hoc, way hăn ndrel đah kon hoc. Kon hoc i nti mô blău, nai nti geh nti êng đŏng. Nai nti dŭt jăp ngăn, tât ta jay bonh leng. Mê̆ bơ̆  i mô hŏ gĭt vât hôm nha ntĭm nti mbơh tơih an mê̆ bơ̆ nău nti kon, rêh đah kon. Kon hoc i rlơng nău nai nti tât ta jay geh rnôk mê̆ bơ̆ kon hoc mô meng yơn lah nai nti gŭ ta nĕ đŏng gay ma mbơh tơih an mê̆ bơ̆ kon hoc gĭt vât. Nai nti âk tơ̆ tât jêng lah geh rgâl nău mĭn aƀaơ hôm nha geh hăn nti tay kơt ơm”.

Bâh nău nsrôih tâm nău kan way kan bâh mpôl nai nti ngih nti THCS xã Đăk Mar, rnoh rĭng hăn nti bâh kon hoc ngih nti way geh rlău 90%.

Nău geh aơ mbra lah đah ăp ngih nti  ta ntŭk dăch, dơh hăn, yơn đah du ngih nti ma rnoh kon hoc rnoi đê̆ geh tât 47% lah dŭt khlăy ngăn. Mô dơn ntĭm nti nău rplay săm ƀŭt, ăp nai nti hôm nha ntĭm, leo kon hoc bâh nơm nău blău tâm nău rêh jêng,ntop tay an ăp oh nău nsrôih gay ma hun hao. Oh Y Kim Lan, kon hoc nti jrô 7C, nti ta ntŭk ngih nti thôn Kon Gung- Đăk Mút an gĭt.

 “ăp nai nti way geh mât kơl tât hên, dăch bên đah hên. nai nti ta aơ dŭt jăp ngăn, dêh mêr ngăn nti hên dŭt ueh. Hên ŭch ngih nti aơ, ngih jay tal 2 bâh kon hoc. Nai nti kơt lah mê̆ bơ̆ tal bar bâh hên đŏng. oh mbra nsrôih nti an blău gay ma lah ueh an ăp nti lĕ ntĭm nti”.

Ndrel đah nău kan ntĭm nti kon hoc, 42 nai nti ngih nti THCS xã Đăk Mar hôm nha geh ăp nău ntop kan khlăy đah n’gâng kan n’hanh ƀon lan ta ntŭk ƀư tĭng bôk nău kan nkô̆ mpŏng ngih dak rdâk njêng nkual ƀon lan mhe.

Uănh năl nuĭh ƀon lan lah nuĭh tơm ta trong kan rdâk njêng nkual ƀon lan mhe, ăp năm ba năp ngih nti THCS xã Đăk Mar lĕ geh ƀư ueh nău mpŏng kan nti n’hanh ntĭm nti nău kan an ăp oh kon hoc, ngăn lah kon hoc nti ta 3 ƀon nuĭh rnoi đê̆ Kon Gung, Đăk Mut n’hanh Kon Klôc.

Rnôk kon hoc nti jrô 9 ăp nai nti leo tơm ngih nti tâm rgop đah ăp nai nti bộ môn êng ƀư rơh uănh năl kon hoc nti blău, nti mô nă blău gay ma uănh năl an nti tay cấp 3 mô lah tât râng ăp jrô nti nău kan. Ngih nti THCS xã Đăk Mar geh nău mpŏng mbơh tơih, rgŏ jă rlău 80% kon hoc rnoi đê̆ tốt nghiệp THCS an geh nti cấp 3 n’hanh tât râng nti nău kan gay ma geh nuĭh kan blău an xã. Wa Lê Xuân Hưng, Bí thư Đảng ủy xã Đăk Mar đah nău kan ntĭm nti n’hanh ƀư tĭng bôk nău kan nkô̆ mpŏng ngih dak rdâk njêng nkual ƀon lan mhe bâh xã.

“Ăp nai nti lĕ geh n’hao nău dơn kan khlăy ngăn lah ăp nai nti ta ăp ngih nti. Ntơm nơh xã geh rdâk njêng nkual ƀon lan mhe ta ăp ngih nti lĕ ge ăp nău tâm rgop dŭt ueh geh mât đăp mpăn nău ueh di n’hanh rnoh kon hoc tât nti rĭng ăp. Aơ lah ăp nău mpŏng mpeh ntĭm nti  dŭt khlăy. gâl nti THCS hăn nti nău kan n’hanh hăn nti tay ta THPT ăp oh lĕ geh ƀư dŭt ueh lah mô geh nău kon hoc hăn nti nău kan. Aơ lah ngoăy tâm âk rnoh ntĭm nti cán bộ nuĭh rnoi đê̆ an xã”.

Đah ăp nău tâm rgop nău kan “ntĭm nti kon hoc tâm ban kơt rdâk njêng nkual ƀon lan mhe, mbro tâm âk năm ngih nti THCS xã Đăk Mar geh nău tâm rlong: Ntŭk kan ntoh lư, ntŭk kan văn hóa...mô dơn geh mât nâp mpeh nău dơi xã geh tâm di nău mpŏng kan nkual ƀon lan mhe, năm 2021 mhe nơh xã Đăk Mar, nkuăl Đăk Hà, n’gor Kon Tum lĕ geh tâm di xã nkual ƀon lan mhe n’hao prêh.

Khoa Điềm/VOV Tây Nguyên