Kêng măng 19/1, ta Hà Nội, N’gâng kan Công an ndrel N’gâng kan ntĭm nti ƀư nau ký ton bôk nau kan tâm rgop n’hao nau kan nkoch trêng, mbơh, ntĭm nti pháp luật njrăng rdâng ma tuý tâm ăp ntŭk kan ntĭm nti lvang năm 2024-2030. Rơh rlau aơ, bol ma ăp rmôt n’gâng kan hŏ nsôih rdâng, yơn rnoh nŭih dŏng ma tuý mô huch ma geh nau lŏ hao âk, đah âk nau tât jêr. Nkô̆ nau tơm lah yor nau gĭt bah nŭih ƀon lan, ngăn lah phung mom mpeh nau khuch bah ma tuý ê geh tŏng ăp.

Ntoh nau tâm nar ký ton, Kruanh n’gâng kan ntĭm nti Ngô Thị Minh lah rjăp: Nau ƀư ueh nau kan nkoch trêng, ntĭm mbơh mpeh nau njrăng phung tih dôih ndrel tih pháp luật, ngăn lah tâm nau kan njrăng rdâng ma tuý tâm ngih săm ƀŭt mra mô knŭng khuch ngăn tât ăp nai ntĭm ndrel kon se nti, sinh viên, ma hôm geh nau rêng tih tât lam ntŭk rêh jêng./.