Bâh bôk năm 2022-2023 tât aƀaơ, ta n’gor Lâm Đồng geh 5 rơh tâm lơh ta ngih nti bâh tiểu học tât THPT ƀư geh âk nău ji nuih tâm ntŭk rêh jêng. Tâm nĕ, nău tâm lơh geh dŭt âk bâh nău lơh nsum ƀư jêng sôt rmanh tât lăp săm ngih dak si. Geh du rơh 2 hê kon hoc bu ur bâh ngih nti tiểu học ta phường 2, nkuăl ƀon têh Đà Lạt geh du hê bu klô bâh bah dih ndơ̆ lăp ngih ăch cho bâh ngih nti tom mpet. Dŭt krit đŏng lah rơh nău geh ta nar 21/10, du hê bu klô kon hoc nti jrô 9 bâh ngih nti THCS Nam Ban nkuăl Lâm Hà geh bu ntâp tât khĭt rnôk mhe sĭt nti n’hanh dôl sĭt bâh ngih nti.

Tĭng nău mbơh bâh wa Huỳnh Quang Long, groi giám đốc ntŭk kan ntĭm n’hanh nti n’gor Lâm Đồng, nău tâm lơh kon hoc ta n’gor dôl geh âk, ƀư khuch klach tât nău mĭn, săk soan bâh kon hoc, ƀư mĭn rvê tâm nău rêh jêng n’hanh geh âk nău ji nuih.

 “Nău hăn nti ta ngih nti mô geh ueh nđơr, bâh nai nti tât kon hc ăp ntŭk hăn hên saơ nău tâm ngơi tâm kek. Lôch nĕ rgum pe rgum poăn gŭ tâm ngơi, ƀư an ntŭk ngih nti dŭt mô geh nău nđơr. Rlău ma nĕ, nĕ lah nău mĭn rvê dŭt hô bâh mê̆ bơ̆ kon hoc, ƀư an ntŭk ngih nti ueh bâh ngih nti mô hôm geh nău ueh. N’hanh lĕ ntŭk rêh jêng lĕ dŭt mât uanh tât nău aơ n’hanh păng lĕ jêng khuch âk tât nău ntĭm nti nău rêh jêng an kon hoc. Mpơl nău nău mĭn mô hôm ueh dŭt mĭn rvê ngăn".

Ta năp nău tâm lơh bâh kon hoc ta ngih nti hao âk, UBND n’gor Lâm Đồng lĕ ntrŭnh săm ƀŭt đă Giám đốc ntŭk kan ntĭm n’hanh nti leo kan, tâm rgop đah Giám đốc ntŭk kan lao động n’hanh thương binh xã hội, giám đốc  công an n’gor n’hanh kruanh UBND ăp nkuăl, nkuăl ƀon têh, kruanh ăp ntŭk kan, n’gâng kan, mpôl kan, ntŭk kan ngih dak geh tât tâm rgop đah ntŭk kan n’gor n’hao nău mât njrăng gay ma rgâl nkra. Tâm nĕ, uănh khlăy nău kan n’hao nău gĭt vât, dơn kan bâh cán bộ mât uănh, nai nti, nuĭh kan ta ngih nti, kon hoc, n’hanh rnăk vâl mpeh nău njrăng, rdâng tâm lơh ta ngih nti, leo kan mbơh tơih ƀư tĭng ăp trong kan mât njrăng rnă njrăng, mât đăp mpăn ta mp0ông ngih nti n’hanh ăp nkual văr nĕ, ngăch njrăng ăp nuĭh bâh bah dih geh nău ƀư tih, tâm lơh, tâm nsĭch ăp oh kon hoc, sinh viên.

Tâm khay 9 n’hanh khay 10 mhe nơh, ta n’gor Dak Lak lĕ geh âk rơh tâm lơh tâm ngih nti. Tâm nĕ geh 2 rơh dŭt mbơh njrăng geh ta ngih nti THPT Krông Ana n’hanh ta ngih nti THCS Nguyễn Du, nkuăl têh Buôn Hồ. Wa Phạm Đăng Khoa, Giám đốc ntŭk kan ntĭm n’hanh nti Dak Lak an gĭt, ăp rơh tâm lơh đah kon hoc way geh ta bah dih ngih nti, lôch mông nti. Nkô̆ nău lah yor mô geh nău mât uănh bâh rnăk vâl, geh nău nău tâm nsĭh bâh bah dih n’hanh nău mĭn mô di kơt tĭng ta mạng xã hội. Gay ma rgâl nkra, ntŭk kan ntĭm n’hanh nti n’gor Dak Lak đă ăp ngih nti n’hao nău mât uănh kon hoc, leo ƀư bơh tơih ntĭm nti pháp luật, ăp rơh tâm mâp mbơh tơih mpeh bôk nău kan gay ma n’hao nău gĭt vât bâh kon hoc tâm nău mô dơi tâm lơh ta n’hanh nău tih ta ntŭk rêh jêng, wa Phạm Quang Khoa ngơi.

 “ Mpôl hên lĕ pă jao nău kan an ngih nti, an nai nti leo tơm, an ăp ntŭk kan đoàn đội tâm ngih nti way an geh mât uănh tât ăp nuĭh geh jêr jŏt mpeh nău rêh mô lah geh nău jêr êng mpeh rnăk vâl gay ma kơl an ăp oh njrăng geh nău tâm lơh ta ngih nti.

Nău tâm lơh ta ngih nti aƀaơ dŭt mĭn rvê ngăn rnôk ma ăp rơh tâm lơh bâh kon hoc ăp nar lơ ma jêr, khuch tât săk soan, nău mn bâh kon hoc. Ta meng rơh rƀŭn nchră Quốc hội, du đê̆ đại biểu an lah, rnăk vâl, ngih nti n’hanh lĕ ntŭk rêh jêng an geh nsum ti gay ma ntĭm nti ăp oh an tâm di ngăn. Ta rơh rƀŭn nchră tal 4, QH khóa 15, âk đại biểu lĕ nkoch nău ngăn aơ. Tĭng nău mbơh bâh đại biểu Đặng Bích Ngọc, mpôl đại biểu QH n’gor Hòa Bình; kon hoc aƀaơ geh nău khuch tât nău mĭn bâh âk ntŭk, tâm nĕ geh khuch tât bâh nău nti, bâh nău rêh nsum bâh kon hoc nơm n’hanh khuch tât bâh mạng xã hội. Yor nĕ dŭt ŭch an geh nău tâm rgop na nê̆ đah ngih nti n’hanh rnăk vâl tâm nău ntĭm nti nău mĭn.

“An geh nău tâm rgop nsrôih đah rnăki vâl n’hanh ngih nti, an geh ăp rơh tâm mâp, gay ma tâm nkoch ăp nău mpeh ntŭk rêh jêng, ăp nău mpeh nău mĭn, mpeh ntĭm nti nău rêh kon hoc, gay ma mhâm ƀư an ăp oh mon geh gt vât. Rnăk vâl mô dơi jao lĕ an ăp nai nti ta ngih nti, ma an geh ƀa ƀơ geh nău tâm mbơh tơih, tâm nkoch ntĭm oh kon. ăp mê̆ bơ̆ an geh nău tâm dăch bên đah ngih nti lơn đŏng, đah ăp nai nti oh kon bâh nơm lơn.

      Du đê̆ đại biểu QH lĕ an lah, ngih nti an geh uănh khlăy tât nău ntĭm nti du đê môn nti kơt lah nău blău rêh, giáo dục công dân, gĭt vât di mpeh nău mn an kon hoc mpeh ăp nău kan ueh, n’hao nău mĭn dơn kan tâm ban kơt nău nsrôih ntrôl njrăng tâm lơh ta ngih nti.