- Ơi wa , tâm trong kan ƀư rgum rƀŭn chi bộ ta ntŭk, năm dăch aơ geh ăp nău mhe mêh?

Wa Điểu Minh: Đảng bộ xă Dak Ndrung geh 4 chi bộ geh âk đảng viên rnoi mpôl đêt, geh, ƀon Bu Ndrung, ƀon Bu Roah, ƀon Bu Bông, n’hanh ƀon Bu Njrang Lu, n’hanh du chi bộ nuĭh Yoăn. Ăp đồng chí đảng viên dŭt tâm rnglăp, tâm kơl ndrel, tâm nĕ geh du ntrong ƀư dŭt uĕh, nĕ lah “5 đảng viên kơl du rnăk rklaih luh ach o”, tĭng trong nchrăp 05 bah Nkuăl ủy Dak Song. Tâm nĕ, ƀư tĭng uĕh ngăn lah chi bộ ƀon Bu Njrang Lu, ƀon Bu Ndrung, lĕ kơl âk rnăk jêr jŏt. Kơl đah prăk măt, đah sŭr, đah bê gay rnăk wâl jêr jŏt mât rong an hun hao wăng sa. Kônh wa djăt tĭng nău Đảng, Ngih dak, rgum hun hao wăng sa đah nău mât chăm cao su, cà phê.

- Đah nău geh êng ta ntŭk geh âk nuĭh rnoi mpôl đêt, dŭt âk đảng viên lah nuĭh Bunong, nău ƀư rgum rƀŭn chi bộ ta xă Dak Ndrung moh ndơ geh dơi uănh tât, ơi wa?

Wa Điểu Minh: Ăp rgum rƀŭn chi bộ ta xă Dak Ndrung ƀư tĭng ntĭm rđău bah n’gor ủy Dak Nông. Geh âk rơh, ăp đồng chí bah N’gor ủy jŭr ta ƀon ntĭm, ƀĭt joet chi bộ rgum rƀŭn gay nkoch trêng an kônh wa. Nkô̆ nău ntĭm rđău hăn jru đah nău rêh bah đảng viên, nĕ lah nău mât rong, tuch tăm, ƀư sa n’hanh ƀư tĭng nău kơl bah ngih dak, gay đảng viên nkoch trêng tay an kônh wa. Mhe aơ, mpôl pah kan bah n’gor Dak Nông n’hanh nkuăl Dak Song jŭr rgum rƀŭn ta chi bộ ƀon Bu Ndrung Lu, ƀon Bu Njar, gâp saơ naư kan aơ dŭt khlay. Cán bộ bah gưl bah lơ nkoch trêng jru lơn an kônh wa djăt n’hanh ƀư tĭng uĕh lơn n’hanh kônh wa dơh wât. Ăp đồng chí tâm Đảng ủy xă geh tâm pă đảng ủy viên kơl tĭng chi bộ. Săk gâp nơm kơl chi bộ Bu roah n’hanh chi bộ ƀon Dak Koanh. Kơl mpeh sam ƀŭt sam tra, kơl tal 2 lah nkoch trêng an kônh wa, tal 3 hăn ndrel đah kônh wa gay rklaih dôh ăp nău wâl kol, jêr jŏt, neh ntu, ngih wâl, manh prăk ngân hàng gay ƀư sa.

- Ƀư tĭng ntĭm rđău bah Đảng ủy ăp gưl, nu nău wăng sa-rêh jêng bah xă Dak Ndrung năm aơ lĕ geh âk nău rgâl, hơi wa?

 Wa Điểu Minh: Tâm 6 khay bôk năm ƀư tĭng 16 rnoh ndơ ƀư, mpeh nkoch trêng kônh wa rwăt bảo hiểm y tế mô hŏ dơi knŭng geh 86% (di an 94% mơ tâm di), tal 2 nkoch trêng kônh wa mât ndrăy nău way ơm rnoi nuĭh, kơt chĭng gông, nău mprơ, uănh lah tâm di nău ŭch. Hôm gung trong ƀon lan ri kônh wa lĕ tâm ban ŭch an neh pơk trong, aƀaơ dôl kâp tơm prăk. Dôl rhơn năm aơ lĕ ndâk ƀư ăp jay văn hóa ta lĕ rngôch ăp ƀon tâm xă Dak Ndung. Nĕ lah kônh wa rgum rƀŭn, tâm nđŭr đah n’gor, đah nkuăl. Mpôl hên mpŏng ŭch Đảng, ngih dak jao an tơm prăk ơm gay xă ndâk ƀư gung trong ƀon lan hăn nsong. Trong bah aơ tât nkuăl Dak Song, n’hanh bah kơi chợ tât nkuăl Dak Song hôm e jŭr djơh.

- Ơ, dăn lah uĕh wa!