Ôi 14/6, UBND n’gor Dak Lak ƀư nkhôm rnê Giải Báo chí n’gor Dak Lak năm 2023. Hội đồng giải Báo chí n’gor Dak Lak hŏ nkhôm an 55 nău nchih dŭt uĕh blău ta 5 ntil nău nkoch trêng. Nhih pah kan way gŭ kan ta nkual Tây Nguyên – Radio nău ngơi Việt Nam geh 5 ndơ nkhôm rnê  ta ntil pơk ƀoh nău ngơi tâm nê geh 1 giải A.

Giải Báo chí n’gor Dak Lak rơh dja geh bơi 90 nău nchih mpeh 5 ntil nău nkoch trêng lah báo in, báo điện tử, pơk ƀoh nău ngơi, ƀoh rup n’hanh rup báo chí bah ăp nuĭh tơm nchih, rmôt tơm nchih njuăl râng tâm rlong. Tĭng Ban tổ chức, ăp nău nchih râng tâm rlong rơh dja hŏ nkoch nkum lam lĕ rngôch, ngăn ngăn đah âk njônh uănh mpeh ngăn ngăn tâm nău rêh ta n’gor. Nkoch nău nkrêp rlău jêr jŏt nsan hao bah âk nuĭh, âk mpôl cán bộ đảng viên gay hun hao wăng sa, rêh jêng kon nuĭh, mât nâp đăp mpăn rnă njrăng, đăp mpăn nău rêh ta ntŭk ƀon lan gŭ. Âk nău nchih geh nău ban saơ, nkah njrăng lor, nchroh lor; mpơl nău rŏng nuĭh jru hvi, trêng nău nđơr, suan ring tam, pơk hvi nuĭh  ntĭt leo ntoh lư tâm pah kan jan sa, tuch tăm n’hanh ăp ntil tâm nău rêh jêng kon nuĭh.