Đại biểu Lê Hữu Trí (mpôl kan Khánh Hòa) an lah, du đê̆ nkô̆ nău bâh nău nchrăp luật bâh nău ngăn ƀư hôm nha geh nău wăk kol. Đại biểu dăn đă ntop tay nău ntrŭnh mbơh rblang bâh nău ngơi mô lah nău ntrŭnh na nê̆ gay ma uănh năl nkô̆ nău tih (ŭch ƀư mô lah mô ŭch ƀư) n'hanh rnoh nău tih ta Điều 2, ndrel đah nău mbơh gĭt năl nău tih n'huch ta Điều 9 gay ma dŏng an tâm ban. Mpeh nău ntrŭnh mpeh nău ƀư mhal n’hanh rklaih nkra nău khuch, âk ntoh măt đă mô geh n'hao tâm ban lah mô geh uănh nău khuch tĭng nău kan ndrel rmôt geh nău khuch.

He ân geh kơt tĭng ngăn nău kan ndâk tay nău kan bôk năp, jăng lơi ntŭk ƀư tih, rklaih nău khuch, njoăl lơi rnoh prăk mô tâm di; nkre năl kloh rnôk ân geh sŏk lơi săm ƀŭt kan mô lah rlu nău kan. Mpeh mông nar mkra nău tih hành chính, đại biểu Mai Phương Hoa (mpôl Ninh Bình) dăn đă ăp ntil nău nchrăp jŏ jong mông nar mkra rmal tât 3 năm ri ân gŭ mĭn na nê̆, tâm di nău ngăn, dêr jŏ jong mông nar mô khlay. Gŭ mĭn tât rnoh rmal prăk, dự thảo Luật Rmal nău tih hành chính quy định rnoh rmal prăk dŭt âk tâm rmal nău tih hành chính lah 1.5 rmen prăk đah êng nuĭh n'hanh 3 rmen prăk đah mpôl kan. Kơt nê̆, rnoh dŭt âk hao 1.5 tơ̆ nkôp đah luật aƀaơ. Đại biểu an lah, an geh mĭn uănh, uănh năl na nê̆ bâh âk nău mpeh rnoh mhal aơ, gay nkre mât đăp mpăn nău kloh rjăp bâh pháp luật, nkre mô geh khuch âk tât nău rêh, pah kan tăch rgâl bâh ƀon lan, doanh nghiệp.