Bâh 2020 tât aƀaơ, đah nău kan lah Tổng lãnh sự Singapore ta nkuăl ƀon têh Hồ Chí Minh, wa Kho Ngee Seng Roy way nsrôih tâm nău nta nău dơh nơih kơl an chính phủ, doanh nghiệp n’hanh nuĭh ƀon lan Singapore, tâm rgop geh 1,5 rkeh đolar n’hanh ăp ntil ndơ dak si khlăy an nkuăl ƀon têh Hồ Chí Minh bâh rnoh prăk Vacxin bâh Việt Nam.

Nkre lah tâm rgop na nê̆ đah ăp ntŭk kan bâh Việt Nam, ngăn lah nkuăl ƀon têh Hồ Chí Minh ƀư âk nău kan nchră nău đah dak bah dih bâh ƀon lan 2 dak, tâm nĕ geh rơh kahgĭt 50 năm nău tâm boh nchră nău đah Việt Nam n’hanh Singapore, 10 năm njêng nău tâm boh kan lĕ rngôch đah 2 dak. Wa lĕ ntop leo ƀư ăp rơh tâm mâp têh khlăy đah ăp mpôl kan gâl têh, tâm nĕ geh rơh tâm mâp yor Tổng thống Singapore Halimah Yacod leo hăn ta năm 2022. Ăp nău nsrôih bâh wa lĕ ntop ntrôl ăp nău tâm boh kan ta ăp trong kan tăch rgâl, pâl nđaih, ntĭm nti, văn hóa n’hanh ăp nău pah kan tâm kơl ƀon lan.