Mhe rlău phŭt sial, bol hŏ njĭr nkrêp geh nău tam "Trong kan ndăng Quang Trung", kônh wa nkual dak bŭk mpeh luh nar Gia Lai nha hôm rvê yor rgâl trôk nar dŭt krit djơh. Bah năp mper Đại hội đại biểu lam dak tâl XIV bah Đảng, nuĭh ƀon lan ta aơ njuăl nău nsing nơm tâm ăp trong n’glêh an têh bah Đại hội mbra mbluh soih an nău bên di geh nău tam đah trôk nar tât ndal.

Lah nkual way geh tât khuch trôk nar lơh mbro, mpeh luh nar n’gor Gia Lai (n’gor Bình Định ơm) mhe rlău phŭt mbrô 13 n’hanh rơh dak bŭk dŭt têh kêng dŭt năm 2025, lơh khuch khat hô an nău rêh n’hanh nău kan bah nuĭh ƀon lan. Hang rhiăng mblâm jay rlâm, hang rbăn mblâm jay geh rlâm, hang rmưn mét rbong dak me, dak diăng geh pĭch rlâm dak bôr, dak trăm neh tuch tăm. Bah năp mper Đại hội XIV bah Đảng, wa Huỳnh Khánh Ly, thôn Luật Lễ, xã Tuy Phước Đông, n’gor Gia Lai dăn đă:

“Đại hội Đảng rơh dja kônh wa ƀon lan ta nkual ŭch rŏng dơi Ngih dak uănh khlay tât nkual rđŭng dêh, dak bŭk. Wăr nê lah puăn mpeh dak me. Kônh wa ŭch rŏng lah rbong dak me nâp uĕh lơn, ntung, trong nar lơn ma dơh uĕh gay kônh wa wăng sa hun hao lơn”.

Ndrel nsum ŭch rŏng nê, wa Nguyễn Thanh Dũng, Giám đốc Hợp tác xã Nông nghiệp Phước Thuận, Gia Lai an lah, nău nkra ƀư ntŭk ntô hôm lah n’gâng tơm đah nkual chrŏ dak bŭk đŏng.

“Nkual rđŭng dak bŭk jêng nô nău n’hoch suăt dak bŭk mâp dŭt âk jêr jŏt đŏng. Nkô̆ nău ntŭk ntô ndơ dŏng mpŏng Ngih dak mât uănh khlay: bôk năp lah ntuh kơl ntŭk ntô ndơ dŏng ntung trong, tâl bar lah nkô̆ nău mpeh n’hong dak lŏ, n’hoch suăt dak bŭk”.

 Rƀŏng tât Đại hội XIV bah Đảng, wa Tô Thị Thu Hường, Groi Bí thư Rnâng kan Đảng ủy phường Quy Nhơn, mpơl nău nsing nơm an lah rơh rgâl nđĭr uĕh ma Đảng dôl rđău đă, mbra tŏng dơi nău mpŏng têh bah ƀon lan, mpeh du jâng nsing hun hao jŏ jong bah năp trôk nar- rgâl n’hâm sial. Ndrel đah nê, ăp trong nchrăp têh jong ăp kôp bah Đại hội, mbra ndơ̆ neh dak hun hao ngăch tâm rơh mhe. Mpeh bah Đảng bộ phường, way nsrôih tâm rlong njêng geh nău dơi mbah rhơn đại hội:

“Lôch ăp khuch khat bah phŭt sial lơh, Quy Nhơn hŏ mbrơi dâk hao tay rƀŏng tât Đại hội Đảng tâl XIV. Tâm mông nar mprang uĕh gŭr êr cờ kao ndrel săk ntơr bri dak hŏ njêng bri dak rup uĕh hŏ lor nchrăp ăp dăp gay tĭng ƀư jăp nău kan dơi jao. Ƀon lan phường Quy Nhơn dôl rƀŏng tât Đại hội đah nău nsing nơm n’hanh nău mpŏng jru hvi tâm ăp trong rƀŏng tât têh jong mhe bah Đảng”.

He mbra dơi saơ, ntơm bah ngăn krit jêr bah nkual chrŏ dak bŭk mpeh luh nar Gia Lai, ăp nău dăn đă, mpŏng kâp bah nuĭh ƀon lan n’hanh ntŭk nsing wăch rgum tâm nău ŭch geh jăch ndăn mpeh ntŭk ntô ndơ dŏng nâp jong, bên di đah trôk nar lơh n’hanh rgâl n’hâm sial. Rƀŏng tât Đại hội đại biểu lam dak tâl XIV bah Đảng, nău nsing nơm n’hanh nău mpŏng bah ƀon lan dơi njuăl tâm ăp trong n’glêh an têh jong, sŏk kon nuĭh ƀư rgum tơm, sŏk đăp mpăn, joi geh trong rêh n’hanh hun hao jŏ jong ƀư rnoh tât jong ngăn.