Ta ăp roh yot tă bah dak bŭk mô hŏ tă geh mhe aơ, khay Noel ta giáo xứ Mằng Lăng, n’gor Dak Lak nha hôm mpơl răm mƀak n’hanh ăp tŏng bêng nău tâm pă đŏng. Bol âk rnăk hôm khôl dôl nkra bah dak bŭk, yơn tâm nău jăt tĭng bah brah yang, nău nkrum mât bah ƀon lan n’hanh nău ntop kơl bah n’gâng kan ta ntŭk, Noel năm aơ jêng khay tâm pă tâm kơl, bah nău tâm rŏng kon nuĭh n’hanh nău nđơr geh uĕh lăng.

Du pơh bah năp nar Noel, ta trôk mih ntâng, tâm jâng gung nhih brah Mằng Lăng, kônh wa kon chroh ndrel mpôih kuaih, lĭr lơp chrêk pư̆ lŭ, tơm n’ho Noel đah ăp ndơ ƀư ƀơch rgơm. Wa Nguyễn Thành Toán, nuĭh thôn Ngân Sơn an gĭt:

“Năm aơ ƀư mô ăp tŏng kơt ăp năm tă bah khuch khat hô jêng ƀư rchek rchŏk ta nhih brah dơm. Geh tơm n’ho noel, ŭnh lơp, rup brah Giê su Rlai lăp, Brah me, brah Giu sê đŏng. Ta jay ri he rdâk ƀư pư̆ lŭ nê jê̆ lơn bah năp jay.”

Đah âk rnăk, ân geh mông nar dŭt jong mơ nkra bah tay khuch khat bah dak bŭk lơh, yơn tât nar noel dja, ăp rnăk hŏ geh nău đăp mpăn bôk năp. Wa Nguyễn Văn Sen, thôn Hội Tín nkoch, rnăk geh klôr rdu bơi lĕ rngôch drăp ndơ, sŭr djăr ndrôk rpu n’hanh ndơ tuch tăm. Yơn nău mĭn jăt tĭng, nkrum mât thôn ƀon, n’gâng kan tâm pă tâm kơl, Noel năm aơ dŭt răm aƀaơ.

“Bol ma kơt nê̆, yơn khay noel dja răm mƀak, geh nău tâm rŏng kon nuĭh n’hanh nău rŏng brah nsĭt tay an lam ƀon lan, geh nău mpăn nuih n’hâm dŭt têh. Ŭch rŏng lĕ rngôch ăp nuĭh geh nău tâm rŏng nsum nsan hao rlău jêr jŏt.”

Ndrel nsum nuih n’hâm nsan nê, nô Phan Văn Truyền, thôn Hội Tín, an gĭt nău mbơh dăn dŭt têh bah nô n’hanh kônh wa năm aơ lah nău đăp mpăn. Lôch wăk rkhul nuih n’hâm tă bah trôk nar lơh, lĕ dĭng nuĭh dăn mbah ơm plơ̆ tay nău rêh kơt ơm.

“Dak bŭk khuch dŭt âk tât wăng sa, nuih n’hâm. Khay noel dja nklăp ăp nuĭh mbra mbơh sơm rƀŭn dăn dŭt âk lah nău đăp mpăn, lôch nê đŏng lah dăn an ăp nuĭh ngăch plơ̆ tay nău rêh kơt ơm”

Tĭng linh mục Phêrô Võ Thanh Nhàn, Chánh xứ giáo xứ Mằng Lăng, lam giáo xứ geh 527 rnăk đah nklăp 1.560 kon chroh, gŭ ta ăp xã Tuy An Đông, Tuy An Bắc n’hanh du gâl Tuy An Tây. Rơh dak bŭk mhe aơ ƀư lĕ rngôch ăp rnăk geh tât khuch khat da dê. Yor kơt nê̆, nkhêp geh Noel năm aơ ăp rnăk rdâk ƀư dơh glêh lơn, rgum tâm ntop kơl klaih rlău jêr jŏt. Giáo xứ uănh khlay buăt nthoi ăp mpôl hăn kơl êng kơl ƀon lan kon chroh ơm plơ̆ đăp mpăn nău rêh.

“Noel năm aơ lah noel ma mpôl hên ŭch mpơl an gĭt lah bol mpôl hên mâp dŭt âk jêr jŏt tă bah phŭt lơh kơl khân păng du nuih n’hâm rôih dăng gay klaih rlău lĕ rngôch ăp ntil nău jêr jŏt, ntul rlong. Lah tĭng nău nsing nơm ri mpôl hên saơ lah ăp ntil nău ntul rlong geh rnoh n’glĕ dŭt da dê, lah he geh du nău nsing nơm nâp ri mbra rlău dơi ăp ntul rlong jêr jŏt bah nău rêh.”

Nău nteh chuông nhih brah Mằng Lăng n’gloh lam ntŭk rngân uĕh bah nkual thôn ƀon n’gor Dak Lak mhe rlău bah dak bŭk. Noel ta Mằng Lăng năm aơ mô lơp chrêk ntơr uĕh ŭnh ang, mô rhơn mƀak âk mpưm kơt ăp năm, yơn hôm geh nkô̆ hôr jru. Nê lah khay Noel bah nău mpêt nkrem, bah nău tâm rŏng nuĭh, bah nău nsing nơm dơi mpoh ang ta nklang nău jêr jŏt, gay ntơm bah nê, kônh wa kon chroh ndrel dâk, rƀŏng sĭt mpeh nău rêh đăp mpăn lơn mpeh bah năp.