Chi bộ thôn Đăk Ga, xã n’har bri Đăk Nhoong, nkuăl Đăk Glei, n’gor Kon Tum geh 23 đảng viên ndrel ăp nŭih nê lah rnoi Jeh Triêng. Ntơm bah nau tâm dăch ƀon lan, dăch rnăk leo trong bah ăp đảng viên, 112 rnăk đah 360 nŭih tâm Thôn Đăk Ga râng tâm nau mât njok trong n’har bri bah neh dak. Nuih n’hâm tâm kơl, kơl an hun hao văng sa rnăk vâl bah ƀon lan tâm Thôn geh ƀư ueh. Bí thư Chi bộ nkre Kruanh thôn A Cu mbơh, ăp năm đảng viên tâm chi bộ kŏ ton ndrel geh nau n’hêl ƀư nkô̆ nau ntĭm nti ndrel pah kan tĭng Wa Hồ. Wa A Cu kŏ kơt lah ăp đảng viên êng tâm chi bộ lŏ saơ nau ntĭm nti ndrel pah kan tĭng Wa lah nau tâm dăch, ngăn:

‘Ăp nar gâp kơt tĭng nti ndrel pah kan tĭng Wa lah ăp nau kan ueh, nau kan tâm di. Kơt tĭng Wa nơm blau têm nkrem tâm nau rêh ăp nar. Jêh ri kơt rnôk ngêt sa, ngơi, bonh đă kônh wa pah kan jan sa hun hao rnăk vâl rklaih ach o nâp nâl”.

Năm 2023 ntrŭnh ƀư Nkô̆ nau kan bah n’gor uỷ Kon Tum “Ntĭm nti ndrel pah kan tĭng nau mĭn, nau rêh, nau kan bah Hồ Chí Minh mpeh nau gơih lă kan, rgop nau ndâk njêng n’gor Kon Tum hun hao ngăch ndrel nâp nâl”, ăp chi bộ tâm dâng nkuăl rnoi mpôl đê̆ bah n’gor Kon Tum geh âk nau kan ntĭm nti ndrel pah kan tĭng nau Wa ân tâm di ma nau ngăn bah ăp nkuăl ƀon lan. Groi Bí thư Chi bộ A Vét, rnoi Hrê, tâm Vi Ô Lắk, xã Pờ Ê, nkual Kon Plông mbơh, ndơn saơ nŭih ƀon lan ê geh nau blau mpeh mât rong ndrel mât chăm ba dak, ri nơm geh nau blau nau kan tuch tăm ri ma nô đăng kí ƀư nau aơ, đah nau ŭch kơl an kônh wa hun hao văng sa lơn:

“Kơt nau wa Hồ ntĭm nti lah đảng viên ân leo trong lor, hăn lor, ƀư lor ri mơ ƀon lan saơ nơm ƀư dơi ri dĭng bu kơt tĭng. Ntơm bah nau kan ơt mât rong nơm mĭn, joi, nkoch mbơh ân ƀon lan nau kan mât rong ân geh nkra ndrung rong ân đăp mpăn sinh học, mô geh hôl khih, ƀŏ ri mơ đăp mpăn nau njrăng srê ji. Tăm ba dak ri nơm joi ăp ntil ndơ ma tăm ân geh nau săk tam ri nơm dĭng nkoch mbơh ân ƀon lan”.

Lah ngoai tâm ăp nŭih leo trong tâm đảng viên rnoi mpôl đê̆ geh rnê, nkhôm tâm Rơh rƀŭn nchră nau ƀư nau kan mrô 01 bah Bộ chính trị mpeh nau lŏ ƀư nau rđau mrô 05 bah Bộ chính trị mpeh “Ntrŭt dăng nau ntĭm nti ndrel pah kan tĭng nau mĭn, nau kan, nau rêh Hồ Chí Minh” năm 2023-2024 yor N’gor uỷ Kon Tum ƀư di rnôk nar deh Wa Hồ tâm khay 5 mhe aơ, Groi Bí thư Chi bộ nkre lah kruanh Thôn A huế, rnoi Xơ đăng, ƀon Kon Nhên, xã Đăk Ruồng, mbơh:

“Ntĭm nti ndrel ƀư tĭng nau rêh, nau kan Hồ Chí Minh, săk gâp nơm kŏ bonh đă kônh wa ndâkn njêng ƀon lan mhe. Săk gâp nơm tât bonh đă kônh wa tâm râp ty, njêng rep ân kloh ngih rƀŭn rgum, bonh đă kônh wa ƀư nkra trong hăn ân nâp kloh. Tăm tơm si êp trong kŏ kơt lah trong tât tâm ƀon lan. Rnơm nau ngăn nê ri rnôk aơ kônh wa ƀon lan jăng lơi lĕ nau rluk mâl ơm kăl e”.

Ntơm bah nau ntĭm nti ndrel pah kan tĭng nau Wa Hồ, 3 năm ma aơ, đảng viên ăp nkuăl, xã bah n’gor Kon Tum njêng geh 800 nau kan tâm kơl hun hao văng sa, ƀư mir, jut huch nau rluk mâl ơm...Ntơm bah nau kan aơ, rlau 6.300 rnăk rnoi mpôl đê̆ ndrel rlau 3.300 tŏ rnăk êp ach o geh manh prăk, kơl an ntil, nti kan hun hao văng sa. Groi Bí thư Rnâng kan nkuăl uỷ Ngọc Hồi Phạm Hải Châu, mbơh Đảng bộ nkuăl mro uănh năl nau kơt tĭng ndrle ƀư tĭng nau Wa lah nau kan chính trị khlay. Aơ kŏ lah nau khlay ƀư rgâl tâm nkuăl ma kônh wa rnoi mpôl đê̆ geh bơi tât 60% rnoh nŭih bah nkuăl:

“Nau kan ƀư tĭng nau Wa hŏ n’hao lơn nau kan ndrel njêng nau tâm ban, nau nsôih tâm nuih n’hâm bah lam Đảng bộ ƀư nau kan chính trị, văng sa, rêh jêng, neh dak rnă njrăng ndrel ndâk Đảng ndrel trong kan chính trị, Ƀư nâp nau rnơm bah ƀon lan đah Đảnh. Nua kan ƀư nkô̆ nau ntĭm nti ndrel pah kan tĭng nau mĭn, nau kan Hồ Chí Minh hăn lăp jru tâm âk nau kan ƀư, nau kan ueh, nau săk tam geh saơ ndrel kơt tĭng âk”.

Rêng nau kan ntĭm nti ndrel pah kan tĭng nau Wa Hồ, ăp chi bộ tâm dâng nkuăl rnoi mpôl đê̆ bah n’gor Kon Tum hŏ geh âk nau rgop khlay tâm nau ƀư nkô̆ nau hun hao bah Đảng bộ n’gor Kon Tum, kơt: n’hao nau nâp tâm nau ndâk njêng ƀon lan mhe, n’huch ach o nâp nâp, ƀư ân geh săk tam nau rgŏ jă “Ƀư rgâl nau mĭn, nau kan bah kônh wa rnoi mpôl đê̆, ƀư ân kônh wa ƀon lan rnoi mpôl đê̆ rgâl nau mĭn nau kan rklaih ach o nâp nâl”...Nau kan ƀư tĭng ueh nau leo trong tâm nau ntĭm nti ndrel ƀư tĭng nau mĭn, nau kan, nau rêh Hồ Chí Minh bah Đảng viên hôm njêng nau têk klônh, n’hâm rêng jru mpeh nau khlay bah nau kan ntĭm nti ndrel pah kan tĭng Wa tâm nkual rnoi mpôl đê̆ n’gor Kon Tum./.