Đah Tây Nguyên-Nam Trung bộ, ntơm bah du nkuăl hôm âk nau jêr, rnôk aơ ƀư rjăp nau dơi khlay mpeh văng sa, neh dak-rnă njrăng, njêng nau rƀŏng hun hao jŏ jong bah “rach năm hao săk”.  Wa Hoàng Công Khiêm, Groi Bí thư Rnâng kan Đảng uỷ Phường Xuân Trường-Đà Lạt, n’gor Lâm Đồng mbơh:

‘Cán bộ, đảng viên ndrel ƀon lan rnơm lah, đah n’hâm dăng tâm rnglăp, ăp nŭih ƀon lan ndâk dơi nau ŭch, nsu nsôih, ƀư êng kan nâp ri neh dak mra hun hao, ƀon lan mra hơm răm, ueh lang’.

Nau dăng ngăn bah nau ntrŭnh Đại hội XIV bah Đảng lah uănh năl nau kan hun hao mhe, sŏk khoa học-công nghệ, rgâl blau mhe ndrel ntrơn rgâl mrô ƀư nau nsôih tơm. Đah Tây Nguyên, nau kan aơ jêng nau ndâk kan tuch tăm tĭng nau kan prêh, văng sa ndrih, tâm pleh, n’hao nau geh dơi. Đah Nam Trung bộ, ngăn lah ăp nkuăl êp dak lêng, aơ lah nau kan gay hun hao văng sa dak lêng, pâl n’aih nâp prêh, nau dăng ndâk njêng ndrel logistics ueh mhe. Nau ntrŭnh Đại hội XIV bah Đảng kŏ mô knŭng mbơh luh nau kan nsum, ma hôm pơk trong hun hao tâm di ma nau geh dơi ăp nkuăl. Đảng viên Mai Văn Tuấn, tâm Phường Phù Đổng, n’gor Gia Lai, mbơh:

‘Nau ntrŭnh Đại hội XIV bah Đảng năl kloh nau ka khoa học công nghệ, ntrơn rgâl mrô lah nau nsôih hun hao, đah phung hên tâm dâng ri geh âk nau gĭt geh nơih lơn, mhâm ƀư gay ndơ tuch tăm geh tăch rnoh khlay ndrel bah oi nau khuch. Ntrơn rgâl mrô mô di lah nau kan prêh ngai ôh, geh n’ăp ma mrô nkuăl tăm, geh nau mbơh trong điện tử, geh ntŭk joi kloh tu tơm bah ntil tăm mơ dơi geh tăch tâm ntŭk bu tăch rgâl âk”.

Du nau nkah ntoh êng tâm nau ntrŭnh Đại hội XIV bah Đảng lah rjăp nau đă ƀư nau kan kloh: ngơi hăn nsum ma kan, nkô̆ nau, nau an, trong kan ngăn, ndrel ma nau dơi ân geh nau kan; sŏk nau tâm ban nuih bah ƀon lan ƀư mâng veh ân nau tam bah nau kan.

Bah nau mbơh aơ geh nau khlay đah Tây Nguyên-Nam Trung bộ, ntŭk dôl rdâng bôk đah âk nau ntul rlong kơt lah ntrơn rgâl trôk nar, mih sial, mô tŏng nau tâm rgop ƀư nau kan gung trong, nau rêh nâp nâl ân nkuăl jru, nkuăl rnoi mpôl đê̆. Đảng viên Nay Lợi, rnoi Jrai, xã Ia Hiao, n’gor Gia Lai, ngơi:

‘Gâp ŭch ngăn lah cán bộ ngơi ri gay ƀư ngrel ma nau kan, ngơi đê̆ ƀư âk, ndrel ƀư ri leo nau dơi geh ngăn ngên bah ƀon lan hao klơ lor”.

Lôch rjăp dŏng nau ntrŭnh Đại hội XIV bah Đảng lah nau ƀư rjăp nau dơi tơm bah ƀon lan tâm nau kan ƀư hun hao. Đah Tây Nguyên-Nam Trung bộ, ntŭk geh âk ngăn rnoi mpôl, mpôl chroh ndrel nau dơi rêh jêng, nau ntrŭnh ƀư aơ lơn ma geh nau khlay tâm nau ƀư nâp nau tâm rnglăp lam rnoi mpôl, mât nâp đăp mpăn chính trị-rêh jêng. Bu ranh Điểu Xem, rnoi Bunong, xã Kiến Đức, n’gor Lâm Đồng, mbơh:

‘Rnôk geh Đảng năl kloh ƀon lan lah n’gâng tơm, kônh wa rnơm ngăn. Nau ntrŭnh tâm dăch ma nau rêh, cán bộ djăt nau ƀon lan ri bol ma moh geh nau jêr, ri kônh wa kŏ mra nsôih nuih n’hâm ƀư nau kan. Nau tâm rnglăp ri ngăn lah ƀon lan mra geh đăp mpăn, saơ neh dak hun hao”.

Ntơm bah nau ntrŭnh Đại hội XIV bah Đảng mra dơi saơ ‘Rach năm hao săk” mô êng knŭng ntơm ma ăp nau rƀŏng ƀư nau kan, ma ntơm bah nau mpât ngăn bah lam ntrong kan chính trị ndrel nau lăp kan ngăn bah ƀon lan. Rnôk ma nau mĭn dơi geh hun hao mhe geh ƀư ngăn đah nau kan ngăn, Tây Nguyên-Nam Trung bộ mra ƀư dơi ndrel geh nau dơi gay ma hun hao, rgop nar lơn âk rjăp tâm nau hun hao nsum bah neh dak./.