Đah trong rƀŏng: "Tâm rnglăp – Tâm ban – Nău way neh dak – Đăt ndal – Hun hao", Đại hội đại biểu lam dak tâl XIV bah Đảng ntơm pơk ngăn ta Thủ đô Hà Nội.  

Ƀư tât nar 25/1, Đại hội geh nkô̆: “Ta nâm lha cờ chrat ang bah Đảng, nsum suan, du nuih n’hâm tĭng ƀư geh nău dơi ăp rnoh tât hun hao neh dak năm 2030; ƀư tơm êng trong kan têh jong, nsrôih ndôr êng, nsing nơm, hao dăng tâm rơh lhung jong săk bah rnoi nuĭh, yor đăp mpăn, bah tâm lơh tâm su, geh nău tâm ban, ndrŏng dăng, hun hao uĕh, rsang rnglay, rhơn răm, nâp jâng chuat hao chủ nghĩa xã hội”.

Đại hội tâl XIV mbra tâm nchră, n’gluh an dŏng ăp siƀŭt khlay: Siƀŭt mbơh Chính trị bah Ban Chấp hành Trung ương khóa XIII; Siƀŭt mbơh n’glôch jêh du đêt nkô̆ nău lý luận n’hanh ngăn ngăn mpeh rơh rgâl mhe tĭng trong rƀŏng xã hội chủ nghĩa tâm 40 năm aơ ta Việt Nam; Siƀŭt mbơh n’glôch jêh 15 năm dŏng Điều lệ Đảng n’hanh dăn đă, rƀŏng trong kơi ntop, rgâl Điều lệ Đảng; Siƀŭt mbơh uănh năl tay nău rđău đă bah Ban Chấp hành Trung ương Đảng khóa XIII.

Siƀŭt nchrăp lor dăn đă Đại hội XIV hŏ luh rsang rnglay nău tâm ban ŭch jru hvi đah nău mĭn Đảng n’hanh nuih n’hâm ƀon lan, rnôk dơn geh rlău 14 rkeh nău rgop bah cán bộ, đảng viên, nuĭh gĭt blău, nuĭh rnâng kan n’hanh ăp rơh kơn ƀon lan tâm n’hanh bah dih dak. Đại hội đại biểu lam dak tâl XIV bah Đảng lah jâng ntơm bah nău nsing nơm n’hanh nău nđơr, suan dăng rnoi nuĭh he nơm n’hanh nău tâm ban du nuih n’hâm bah ƀon lan, ndơ̆ neh dak nsing nơm hăn tât têh dăng rơh hun hao mhe: đăp mpăn, bah tâm lơh tâm su, geh nău tâm ban, ndrŏng dăng, hun hao ăp tŏng, rsang rnglay, rhơn răm.