Lơ (23/12), ta Đà Lạt, UBND n’gor Lâm Đồng ƀư rƀŭn nchră n’glôch jêh Bôk nău kan lam dak mpeh n’hao trong kan n’hanh rgŏ jă ntop kơl bah dih Chính phủ dak bah dih lvang 2019-2025. Năm bah năp, n’gor Lâm Đồng wơt dơn 133 bôk nău kan, nău nchrăp ƀư bah ăp rmôt kan bah dih Chính phủ dak bah dih ntop kơl đah dĭng lĕ âk ntop kơl rlău 18 rkeh 250 rbăn đôlar.

Uănh lah bah UBND n’gor Lâm Đồng, an saơ, ăp bôk nău kan, nău nchrăp ƀư, bah dih nău nchrăp ƀư bah ăp rmôt kan bah dih Chính phủ dak bah dih lĕ rgop hun hao wăng sa-rêh jêng kơt đăp mpăn nău rêh jêng, jŭt ji ngot, ach o, mât chăm dak si, ntĭm nti, n’hao blău kan, nău wât bah nuĭh ƀon lan nkual nău nchrăp ƀư, rgop rgâl nău rêh nuĭh ƀon lan, lơn lah nkual ƀon lan rnoi mpôl đêt, nkual wăng sa hôm e mâp jêr jŏt. Ta rƀŭn nchră, n’gor Lâm Đồng lĕ mbơh mpeh kơl lor wăch rgum ndơ ntop kơl. Tĭng nĕ, ăp ntil nău kơl lor bôk năp bah n’gor lah dak si, lŏ mir, ntĭm nti, ăp nău rêh jêng... N’gor nchrăp dôl ndâk ƀư ntil ndơ ăp nău nchrăp ƀư kuăl jă ntop kơl lvang 2026-2030 ndrel đah trong nchrăp mât uănh n’hanh dŏng ntop kơl bah dih chính phu dak bah dih; jêng nơih đah trong ƀư, nău kơl gay ntrŭt đă ăp rmôt kan bah dih chính phủ lăp pah kan, mbơh ƀư ăp nău nchrăp ƀư ta n’gor tĭng nkô̆ nău pháp luật Việt Nam n’hanh ăp nău ntrŭnh bah ƀon lan.