Rơh tâm rlong trong nchrăp ntơm njêng nău kan tâm druh ndăm ƀon lan dơi rgŏ jă hŏ rêng lam n'hanh dơn geh âk nău uănh khlay, kơt tĭng nar  lơn ma khuh n'gôr bah ăp n'gor, nkual ƀon têh lam dak. Nkô̆ ăp trong nchrăp ntơm njêng nău kan tâm trong tuch tăm mât rong, na nê̆ mpeh ăp trong kan: Hun hao tuch tăm dŏng khoa học kỹ thuật, mât uĕh săk tơm ta ntŭk ma trong tuch tăm, mât rong, tui ka, mât njrăng ntŭk gŭ rêh ma trong dŏng khoa học kỹ thuật tâm nău kan tuch tăm mât rong. Mhe aơ, ta nkual ƀon têh Đà Lạt, Trung ương Đoàn Thanh niên Cộng sản Hồ Chí Minh kan nsum đah Tỉnh ủy, UBND n'gor Lâm Đồng ƀư ntăm an ndơ Nkhôm rnê Lương Định Của tâl 17 n'hanh nkhôm rnê rơh tâm rlong n'glĕ dŭt trong nchrăp ntơm njêng nău kan druh ndăm tâm ƀon lan năm 2022. Rlău 17 năm ƀư, Nkhôm rnê Lương Định Của hŏ mpư rnê 2.050 “nuĭh ƀon lan kan lŏ mir ngăch prăl jăp blău". N'hanh năm aơ, ndơ nkhôm rnê dơi ntăm an 32 druh ndăm ntoh lư đah nău mĭn nsrôih nsan hao ƀư geh ndrŏng n'hanh geh nău dơi âk lam dak.

       Lah ta rơh lễ, wa Trần Tuấn Anh, Ủy viên Bộ Chính trị, Kruanh Ban Kinh tế Trung ương hŏ mpơl nău rhơn mpeh nău ntoh nar lơn ma âk doanh nghiệp, HTX, trang trại druh ndăm, ăp trong ntĭt leo tâm rgop hun hao wăng sa tâm trong kan tuch tăm mât rong, thôn ƀon ngăch nsan hao jêng trong leo tâm rgop kan ntoh lư ta ntŭk, ta nkual n'hanh lam ntŭr neh. Tâm ăp druh ndăm ntoh lư dơn geh ndơ nkhôm rnê Lương Định Của năm 2022, âk druh ndăm nsĭt geh wăng sa rlău 30 rmen prăk n'hanh geh nuĭh nsĭt geh 706 rmen prăk, hôm geh sa hang rmen prăk ăp năm. Lơn lah, âk druh ndăm rnoi mpôl đê̆ ta ntŭk hôm jêr jŏt yơn ma nău mĭn rôih dăng n'hanh nđơr nsan hao ƀư geh ndrŏng di ma suan rhal he nơm, jêng ăp druh ndăm geh ndrŏng. Aơ lah ăp găr ntil dŭt nsrôih uĕh ăp trong leo druh ndăm tâm rlong pah kan jan sa, tăch rgâl jăp blău, druh ndăm nsum ti rdâk njêng ƀon lan mhe ta ntŭk. Ma ăp trong leo ƀư, nău kan na nê̆ hŏ ntrŭt nsôr rơh kơn druh ndăm thôn ƀon gơih nđơr tâm rlong pah kan jan sa nsan hao ƀư geh ndrŏng. Wa Trần Tuấn Anh lah:

        “He ƀư mpư rnê ăp nuĭh ƀon lan kan lŏ mir jăp blău, khân păng lah ăp kao si uĕh tâm rnoh hang rkeh druh ndăm ntoh lư dôl nar măng rgop suan mom, bôk rngok, han săk, nău đăp dêh an nău kan tuch tăm mât rong, rdâk njêng thôn ƀon mhe. Gâp nsing nơm lah, đah nău n'hao êng săk  bah ăp băl mom dơi geh  nkhôm rnê nar aơ, mbra rêng lam tay tât âk mpưm lam đoàn viên, druh ndăm ta ăp ntŭk, rgop khlay tâm trong ntrŭt ntrôl tâm rlong pah kan jan sa tăch rgâl jăp blău, rdâk njêng ƀon lan mhe geh âk njuat hăn chuat dăng tâm let năp tay".

        Wa Trần Tuấn Anh dăn đă, ăp gưl ủy Đảng, n'gâng kan ta ntŭk, ăp n'gâng kan ân uănh khlay lơn đŏng tât druh ndăm n'hanh pah kan druh ndăm, ŭch kơl n'hanh nta trong dơh gay druh ndăm lam dak n'hanh Mpôl kan Đoàn lah nsum, druh ndăm tâm ƀon lan lah êng, an lĕ nău gĭt blău, bôk rngok, n'hâm suan, hăn chŏl lor trong hun hao wăng sa- rêh jêng kon nuĭh, tĭng ƀư nău kan nsum uĕh  mhe công nghiệp mhe neh dak n'hanh tuch tăm mât rong, thôn ƀon.

        Ta rơh lễ, 32 nuĭh druh ndăm ntoh lư dơi sơch bah 81 hồ sơ bah 45 n'gor, thành đoàn tâm lam dak dơi ntăm an ndơ nkhôm rnê Lương Định Của năm 2022. Ban tổ chức hŏ nkhôm rnê an 9 trong nchrăp kan uĕh blău (lah 1 giải nhất, 2 giải nhì, 3 giải pe n'hanh 3 giải khuyến khích), tâm lĕ rngôch rnoh 31 trong nchrăp râng tâm rlong n'glĕ dŭt ntơm njêng nău kan druh ndăm tâm thôn ƀon năm 2022.

Geh tât nkô̆ nău ntơm njêng nău kan an druh ndăm thôn ƀon, tâm pơh bah năp nơh, Hội Liên hiệp druh ndăm Việt Nam n'gor Dak Lak hŏ ƀư bôk nău kan kơi năp nti nău gĭt blău, dŏng khoa học công nghệ tâm nău kan tuch tăm n'hanh tăch ndơ geh ƀư an druh ndăm rnoi mpôl đê̆. Râng jrô kơi năp nti geh rlău 100 druh ndăm rnoi mpôl đê̆ dôl ƀư njêng,  tăch rgâl tâm trong kan tuch tăm n'hanh cán bộ Hội liên hiệp druh ndăm ta nkual ƀon lan gŭ tâm lam n'gor.  

Ăp nuĭh dơi năp nti mpeh rêng rnoh khlay, tâm rgop rêng kan, ăp nău blău mpeh dŏng rnoh khlay tâm nău kan tuch tăm n'hanh tăch ndơ geh ƀư tuch tăm. Kơt dŏng ngăn tĭng rmôt mpeh rêng rnoh khlay, njêng trang mạng điện tử n'hanh tăch ndơ pơk sŏng dăng bah ngai. Nô Y Lê Pas Tơr, Kruanh Hội Liên hiệp druh ndăm Việt Nam n'gor Dak Lak an gĭt, aơ lah nău kan ƀư tĭng bôk nău kan bah Trung ương Hội Liên hiệp druh ndăm Việt Nam gay ntop kơl druh ndăm rnoi mpôl đê̆ ta n'gor geh tay nău gĭt, nău blău, nău tă ơm gĭt kan, rgâl mhe khoa học kỹ thuật tâm nău kan tuch tăm, rgop hun hao wăng sa rêh jêng kon nuĭh.

         “Tâm rnôk ƀư tuch tăm bah druh ndăm ta n'gor Dak Lak geh rnoh âk khoa học công nghệ tâm ban kơt dŏng công nghệ tâm nău kan tuch tăm hôm geh âk mpăng đêt đŏng. Nău mbơh gĭt nău blău dŏng rgâl mhe khoa học công nghệ n'hanh tâm nău kan tuch tăm an druh ndăm lah du nău kan dâk bôk năp. Mpôl kan Đoàn, hội ndrel râng đah rêng mpôl mpeh ntơm njêng nău kan, lơn lah nău ndrel hăn đah druh ndăm tâm trong njêng nău kan, ntơm njêng nău rêh nău kan".

VOV Tây Nguyên/Nuĭh rblang: Điểu Thân