Lah ntŭk kan ndâk ƀư nau kan ndơ tuch tăm tâm nkuăl Krông Ana, n’gor Dak Lak, jêh 5 năm kan, Công ty Cổ phần Êđê café hŏ ƀư geh 100 ha ntŭk ndơ tăm gay ma tăch, ƀư ntơm bah tăm tât tăch ân bu. Ndrel ma lam dak, công ty hŏ tăch luh cà phê tât Malaysia, Singapore ndrel Mông Cổ. Nô Y Khoan Niê Kdăm, Kruanh jrâu kan Công ty Cổ phần Êđê café mbơh, công ty hŏ ndăn ngăn n’hâm dăng bah ăp ntrong mạng xã hội gay tăch cà phê môi bah ntŭk nơm:

            ‘Ntŭk trong mạng ntop n’hâm ân ăp ntŭk kan tăch rgâl ueh ngăn, rnơm geh internet, ăp ntŭk trong mạng ri Êđê cà phê mro joi ăp năch nơm tăch tâm nê. Nau mĭn bah phung hên lah: mô blau ân nti, ăp nau kŏ geh tâm Google, ntơm bah nau mô blau edit (rgum, dâk ƀư) video, mô lah kơt tĭng nti nau nkoch mhâm ƀư ri nơm nsôih kơt ndrel njêng ăp nau ƀư kan ân ma nơm. Rnôk nê mơ geh n’hâm blau njêng mhe bah ăp nŭih”.

            Ơm ndơn saơ nau dơi gay hun hao nau kan tăch rgâl tâm nau kan mrô, ntơm bah năm 2019, ntŭk ƀư tâm boh kan tuch tăm HeNa tâm nkual Ea H’Leo ndrel Cư M’gar hŏ ndâk trang web êng, ndâk ăp fanpage êng tâm mạng xã hội ndrel tăch ndoh ndơ tâm ăp trong điện tử. Yuh Tống Thị Hoài Phương, Giám đốc ntŭk tâm boh ƀư nau kan tuch tăm Hena mbơh, nau kan ntrŭt dăng nau tăch rgâl tâm trong mạng hŏ kơl an ntŭk kan n‘hao lơn nau geh âk tŏ rđil ma tăch dơm êng:

            ‘Hên hŏ geh tăch ndoh ndơ tât ăp dak kơt Malaysia, Đài Loan, Niu di-lân ndrel Úc bah trong mạng xã hội. Hena hŏ kơl dŏng tay ăp nkô̆ nau nkoch mbơh gay ân tâm di lơn tâm nkô̆ nau nŭih năch dŏng ri nơm kŏ geh tay âk nŭih rvăy ndrel geh tât âk bu năch ŭch ma ndoh nơm lơn”.

            Tât khay 6 năm 2024 Dak Lak geh rlau 1.700 ntil ndơ geh tăch tâm trong điện tử. Rnoh ƀư nau kan bah ăp ntŭk tăch tâm n’gor geh tât tal 5 tâm lam dak. Wa Lưu Văn Khôi, Giám đốc Sở công thương n’gor Dak Lak lah rjăp, tâm rnôk aơ, ăp ntŭk kan mra kơl an nauy kan, nthoi ndrel ntĭm nti gay ma n’hao nau blau tăch ndơ tam trong điện tử ân ăp ntŭk:

            “Gay kơl an ăp ntŭk ƀư tâm boh nau kan tuch tăm n’hao nau dơi, mbơh nkoch nau leo tăch ndoh ndơ bah n’gor, Sở công thương tâm nchră nau ma UBND n’gor ƀư ăp nau kan gay ma kơl an ân ăp ntŭk ƀư tâm boh nau kan, ntŭk tăch ndoh ndơ bah ăp ntŭk ƀư kan tăch rgâl jêh ri ndâk nau ntơ. Mặt êng hên kŏ tâm rgop nsum ma N’gâng kan tăch rgâl điện tử văng sa mrô gay ma ƀư ăp nau nchrăp nau mĭn, nau blau kan gay ăp nhoat n’hao nau dơi mbơh nkoch bah ntil ndơ”.

            Tiến sĩ Nguyễn Ngọc Tuyên, Kruanh viện văng sa ndrel mât nau kan tây Nguyên ân lah, nau kan tăch rgâl điện tử hun hao ngăch ndrel dăng tâm rnôk êp aơ. Nau ŭch rvăt, dŏng ndơ bah nŭih ƀon lan geh rgâl tĭng trong mhe, dŏng công nghệ. Yơn lah, gay ƀư kan tăch rgâl điện tử hun hao, wa Tuyên ân lah, ntŭk kan tâm Dak Lak gĭt kloh ăp nau kan, ntrong dŏng, nau dơi tăch rgâl gay ma săch ăp ntil ndơ geh nau ŭch âk ndrel tâm di đah nau kan văng sa. Ndrel ma nê, mro kơl an tât nau nâp bah ndơ, đăp mpăn nau dŏng nau dơi ndrel luật ntrŭnh đah ăp ntil ndơ tăch tĭng nkô̆:

            ‘Ndăm mbơh rjăp lah, ŭch n’hao nau dơi geh nau blau tăch ndơ ri nŭih tơm ân geh n’hao nau gĭt bah nơm. Tal bar lah rgum nau kan ntĭm nti ân nŭih tăch ndrel ndăn ngăn nau dơi gay geh bah ntrong kan mrô gay ma ƀư ueh tâm rnôk ƀa hin. Ngăn lah nơm lăp tâm ăp siêu thị, chợ ri kŏ geh nau khuch tât prăk dŏng, lah nơm ndăn ntrong kan nê ri tŏng dơi ueh lơn”.

           Huch dŏng prăk tăch ndơ, ntŭk tăch pơk. Ăp nau geh dơi bah nau kan tăch rgâl điện tử dôl geh ăp ntŭk kan tăch rgâl tâm Dak Lak dŏng ueh. Nau aơ rgop nau n’hao nau khlay, leo âk ntŭk kan tăch rgâl geh nau dăng bah n’gor lăp jru lơn tâm dak ba dih./.