Đah bơi 17 rkeh nuĭh, tâm nê geh rlău 7 rkeh nuĭh dôl râng pah kan jan sa, bơi 750 rbăn nuĭh râng pah kan Đảng, n’gâng kan, mặt trận tổ quốc… nuĭh âk năm deh Việt Nam hŏ n’hanh dôl ntik n’hao nău way ơm “Năm âk ntĭt leo trong chrat ang, năm âk bôk rngok  lơn ma săk kranh”, way mpơl  dơi nău  khlay kan, nău dơn kan đah lĕ rngôch ăp trong kan bah nău rêh.

- Hơi wa, nar nuĭh âk năm deh lam ntŭr neh năm aơ (1/10) lah rnôk rgŏ jă khay kan an nuĭh âk năm deh đŏng. Ndrĭ may an gĭt, nău ŭch dơi khlay tâm nău kan khay kan dja mêh wa?

Wa Nguyễn Thanh Bình: Năm aơ mpôl hên ƀư rgŏ jă lam dak ta n’gor Hải Dương. Nkre rgŏ jă khay kan  yơn nkre rgŏ jă tay nuĭh âk năm deh nsum ti, rgop tĭng ƀư rơh rgŏ jă an geh nău dơi dŭt âk. Tâm rnôk an ƀư, mpôl hên ƀư nkoch trêng jru hvi mpeh nău ŭch dơi tât geh khlay, nkô̆ bôk bah khay kan mpeh nuĭh âk năm deh Việt Nam năm 2024. Bah nê, njêng mông nar nsrôih tĭng uĕh, nkre geh nău tât râng rđău đă na nê̆ bah gưl ủy, n’gâng kan, mặt trận ăp gưl, ntơm bah nê kan nsum lhăt đah ăp mpôl kan, đơn vị âk lơn, gay an ƀư khay kan geh nău dơi dŭt âk, ring lam jru tâm  ăp gưl hội tâm ban kơt lam rêh jêng kon nuĭh đŏng. Ntơm bah nê rgŏ jă, ntrŭt nsôr, ntop kơl nuĭh âk năm deh jêr jŏt ta ăp n’gor tâm lam dak.

-Tâm bah ri aơ nơh, Đảng, Ngih dak way rong an nău mât uănh  mha êng đah nuĭh âk năm deh, nău nê dơi mpơl dŭt kloh ma nău Ban Bí thư hŏ n’gluh an dŏng mbrô 58 mpeh nău  kan nuĭh âk năm deh. Aơ dơi uănh lah jâng ntơm khlay tâm trong leo ƀư, rgâl mhe trong leo kan bah  mpôl nuĭh âk năm deh, gay nuĭh âk năm deh ntik n’hao lơn đŏng nău tă ơm gĭt kan tâm n’gâng kan nsum bah neh dak. Ndrĭ dăn may an gĭt kloh lơn mpeh nkô̆ dja mêh?  

Wa Nguyễn Thanh Bình: Ndrĭ, rnôk geh nău n’glêh an mbrô 58, dơi geh nău mât uănh khlay bah n’gâng kan ăp gưl, mpôl hên hŏ ƀư rđău đă, kan nsum lhăt đah ăp nhih pah kan trung ương an ƀư ăp kôp, đăp mpăn dơn ngoăy bah nău  kan bah trung ương tât tâm  dâng. Rnôk an ƀư ntŭk tât dơi tât geh ngăn tât ntŭk nê gay rgâl trong ntĭt leo ta 5 n’gor, nkual ƀon têh yor aƀaơ 50 n’gor nkual ƀon têh  dôl kan tĭng trong leo gưl n’gor gưl nkuâl lah mpôl ntơh măt. Yor kơt nê̆ rnôk  nău kan bah  mpôl jêng 4 gưl êng êng ri nău săk tam nău kan bah mpôl dơi n’hao prêh. Nkre ƀư jăp pah kan mât chăm nkre ntik n’hao dơi nău khlay kan bah nuĭh âk năm deh, gay nuĭh âk năm deh râng tay, rgop n’hâm suan, bôk rngok tâm nău hun hao bah neh dak.

- Hơi wa, dơi gĭt, tâm phŭt mbrô 3 mhe aơ ndrel đah ƀon lan lam dak, Mpôl nuĭh âk năm deh Việt Nam geh ăp nău rgop uĕh gay kơl, tâm pă đah ƀon lan nkual geh trôk nar lơh, lơn lah đah nuĭh âk năm deh, geh nău rêh jêr jŏt, geh roh yot mpeh drăp ndơ, nhih jay. Ndrĭ dăn may an gĭt kloh lơn mpeh nău nsum ti bah nuĭh âk năm deh tâm  nău kan geh nkô̆ khlay dja mêh?

Wa Nguyễn Thanh Bình: Mbơh lam hvi nău rđău đă bah Tổng Bí thư, Kruanh dak Tô Lâm; tĭng nău kuăl jă bah Uỷ ban Trung ương Mặt trận Tổ quốc Việt Nam, rgŏ jă nsum ti kơl ƀon lan ăp n’gor geh tât khuch bah phŭt mbrô 3 lơh, mpôl hên hŏ ngăch n’gluh an dŏng siƀŭt n’hanh an rđău đă tât ăp gưl hội bah Trung ương tât ăp thôn, bản. Ăp nuĭh âk năm deh nkre n’hao khlay nău dơn kan rgop kơl, nkre rgŏ jă kon său, rgŏ jă ăp nuĭh tâm mpôl nuĭh âk năm deh lam dak rgop, ntop kơl, kơl ƀon lan ta ăp n’gor geh phŭt mbrô 3 lơh khuch khat âk.

- Ơ, dăn lah uĕh wa!