Ôi nar ngoăy Tết Dương lịch 2025, rơh mpăr bah hãng Vietnam Airlines geh mrô VN1603 mpăr Hà Nội-Buôn Ma Thuột jŭr tach ndeh păr Buôn Ma Thuột, n’gor Dak Lak rdêng tĭng 120 nuĭh n’hanh nuĭh kan tâm mpôl hăn mpăr. Aơ lah ăp nuĭh năch tal du rkeh 5 rhiăng rbăn n’hanh lah mpôl năch bôk năp “lăp lor” n’gor Dak Lak tâm năm 2025 tĭng trong mpăr.

Ta ntŭk gŭ kâp tât tach ndeh păr Buôn Ma Thuột, ƀư wơt năch pâl nđaih tal “du rkeh 5 rhiăng rbăn” n’hanh mpôl năch bôk năp tât Dak Lak di rơh tết dương lịch 2025 ƀư dŭt têh đah nău ƀư tŭr chĭng gŏ gông n’hanh njroh mprơ uĕh. Ntoh măt nău kan pâl nđaih Dak Lak n’hanh mât uănh tach ndeh păr Buôn Ma Thuột an nkao n’hanh ndơ wơt rhơn ăp năch pâl nđaih bôk năp tât đah n’gor tâm nar bôk năm mhe.

Lap lah năch tal du rkeh 5 rhiăng rbăn tât Dak Lak, yuh Lưu Minh Lan, ta quận Long Biên, Hà Nội nkoch nău răm n’hanh rhơn đah nău wơt dŭt n’hâm bah n’gor Dak Lak tâm nar bôk năm mhe.

Bôk năm mhe ri năm aơ rnăk wâl gâp hăn ndrel, ăp mon hăn rlu rlău jêng wâl gâp geh du pơh gŭ ta aơ, nkre tăch rgâl nkre hăn khâl, mĭn joi ăp ntŭk ta aơ. Gâp hăn du đêt ntŭk hôm, rơh aơ gâp hăn tât dak leng Gia Long hôm hăn n’glău Lắk.

Ƀư wơt năch pâl nđaih tal “du rkeh 5 rhiăng rbăn” n’hanh mpôl năch pâl nđaih bôk năp tât Dak Lak di rơh tết dương lịch 2025 lah nău ƀư uĕh tâm nar bôk năm mhe gay n’hao rup ndạh, ndơ pâl nđaih Dak lak, wăch rgum nău uănh bah ƀon lan, lơn lah ăp năch tâm n’hanh bah dih dak. Nkre, aơ lah di an nkoch ăp ntŭk pâl nđaih uĕh n’hanh dơi hun hao pâl nđaih bah n’gor, rgop uĕh ndâk njêng n’hanh hun hao ndơ pâl nđaih Dak Lak. Wa Nguyễn Thụy Phương Hiếu, Groi Giám đốc n’gâng kan Văn hóa-Thể thao n’hanh Pâl nđaih Dak lak an gĭt:

N’gâng kan mpŏng ŭch ăp năch ta rơh mpăr tât jâng ta Dak Lak mbra dơi saơ nuĭh Dak Lak gĭt blău, dêh rmên, rŏng năch. Rlău ma nĕ, ăp nuĭh năch aơ mbra nkoch trêng, mpla nsơ mpeh rup ndah, kon nuĭh Dak Lak tât đah nuĭh bên, băl bên n’hanh jêh nĕ yor khân pơng mbra ntĭm nkoch mpeh Dak Lak đah ăp nău nkah gĭt, rgop hao jêng nuĭh năch tât đah Dak Lak.

Năm 2024, dĭng lĕ geh prăk bah pâl nđaih ta Dak Lak hao rlău 21% nkôp đah năm bah năp. Aơ lah nău mbơh uĕh đah Dak Lak tâm nău nsrôih hun hao ăp ndơ mhe, uănh khlay joi ăp nău uĕh  êng văn hóa yôk prêh, bri lâng dak rngot.

Năm 2024, dĭng lĕ geh bah pâl nđaih lam n’gor Dak Lak geh 1.255 rmen prăk, hao rlău 21% nkôp đah năm 2023, Dak Lak lĕ wơt 1,5 rkeh năch. Rnoh năch dak bah dih tât Dak Lak hao rlău 34% nkôp đah năm bah năp.

Nău ntoh lư tâm nău pâl nđaih bah n’gor năm mhe rlău lah hăn ndrel đah ăp nău ƀư mbah rhơn nkah gĭt 120 năm ndâk njêng n’gor Dak Lak. N’gor lĕ ƀư tay âk ntŭk tât pâl nđaih nsum mpôl ta ăp ntŭk, mât uĕh nău geh bah tĭng rnoi nuĭh gay geh nău uĕh êng. Tâm nĕ, ntrong ƀư boăt nthoi drăp ndơ “chĭng gông Tây Nguyên tâm trong pâl nđaih drăp ndơ Buôn Ma Thuột-Dak Lak” mbra dơi pơk hvi tâm năm tât. Wa Lại Đức Đại, Groi Giám đốc N’gâng kan Văn hoa, Thể thao n’hanh Pâl nđaih Dak Lak an gĭt, ntrong ƀư mbra kơl nuĭh ƀon lan wât lơn mpeh nău khlay drăp ndơ ơm yău ma he dôl mât, ntop tay ntô̆ n’hao n’hanh jao an tay ntŭk ntô văn hóa chĭng gông Tây Nguyên; nta an drăp ndơ văn hóa chĭng gông jêng nuih n’hâm an pâl nđaih, boăt nthoi nsum mpôl n’hanh jêng trong pâl nđaih drăp ndơ.

Mbra geh nău tâm rgop rjăp lơn, mô knŭng ƀư 1-2 ntrong ƀư ma dơi ƀơ âk ntrong ƀư du tơ̆, ăp rơh dơi nthoi tay ndrel đah nău râng bah ăp nuĭh way kan, ăp nghệ nhân. Nău dăn ƀư bah ăp ntŭk nchrăp lor kơt nău ƀư trong nchrăp bah bôk năp bah N’gâng kan mbra dơi nthoi tay đah âk rơh uĕh nâp n’hanh săk rnglăy âk lơn.