Thủ tướng Phạm Minh Chính njoăl nău rhơn dŭt ueh tât lĕ rngôch rnâng kan nti leo n’hanh mpôl chưng play Ngih dak Việt Nam lôch geh nău dơi dŭt têh ta rơh nglôch lôch lĕ ma rơh hăn n’hanh plơ̆ sĭt. Thủ tướng mpơl nău rhơn, lah ueh mpôl chưng play lĕ nsrôih dŭt âk, tâm rlong dŭt dăng, tâm rnglăp têh, mô rlu, lah na nê̆, nău dơi aơ mô dơn lah nău rhơn rnê bâh thể thao Việt Nam ma hôm nha lah nău rhơn an lĕ mpôl rnoi, mpơl nău ŭch rŏng hun hao n’hanh ŭch dơi geh ăp nău dơi têh mhe. Thủ tướng lah ueh dŭt âk tât rnâng kan nti leo, mpôl kơl kan, ăp nuĭh hăn ndrel đah mpôl tâm rlong chưng play. Thủ tướng dŭt lah ueh tât rheh nuĭh ŭch rŏng chưng play ta lam dak lĕ hăn ndrel n’hanh lah ntŭk knơm dŭt nâp dăng bâh mpôl chưng play tâm lĕ trong kan tĭng dơi geh nău dơi têh bâh chưng play ta ăp dak ta nkual.

Hang rbăn nuĭh ntroh n’gôr Việt Nam geh măt ta tach chưng play ngih dak Thái Lan Rajamangla ta thủ đô Bangkok măng 5/1 lĕ răm rhơn rnôk rmôt ngih dak Việt Nam dăng đah Thái Lan gay dơi geh vô địch ASEAN CUP 2024. Nuĭh uănh na nao ntroh n’gor “Việt Nam vô địch” n’hanh đah nău mprơ “Như có Bác Hồ trong ngày vui đại thắng”. Âk nuĭh ƀon lan ta lam dak  lĕ hăn trong rhơn chưng dăng. Aơ lah vô địch tal 3 bah rmôt Việt Nam ta rơh tâm rlong aơ. Mông nar rhơn dăng ƀư ta lam nkual Tây Nguyên. Ta trong n’glah 6, nklang nkual ƀon têh BMT, n’gor Dak Lak, lĕ rngôch ăp mpôl nuĭh hăn ta nklang nkual, ta ty djôt cờ manh êr, ndrel đah nău mprơ “Như có Bác Hồ trong ngay vui đại thắng”. Lĕ rngôch mprơ nău mprơ geh nău dơi, ndrel ŭnh ang pháo nkao ta lam trôk.