Ăp nar ma aơ, trong bê tông tă bah nklang xã Mdrak lăp tâm ƀon M’Suốt geh yông âk ntil manh êr, cờ chăng, pano nkoch mbơh tât Đại hội XIV bah Đảng. Tâm nau rhơn geh âk bah yan tăm tao, đảng viên Y Liêu Niê, rnoi Rđe tâm ƀon M’Suốt xã M’drak mbơh, ƀư tĭng nau tâm rlong rhơn Đại hội, kônh wa nsôih tăm tao, cà phê, tiêu, sầu riêng, mât rong, nau geh hao âk, rnơm nê ma nau rêh lơn ma geh. Rnôk aơ chi bộ mô hôm rnăk ach o, lam ƀon knŭng hôm 11/172 rnăk ach o. Rƀŏng tât Đại hội XIV, đảng viên Y Liêu Niê njoăl nau ŭch:

‘Kônh wa ŭch Đảng ndrel Ngih dak lŏ kơl an, ntuh kơl tay ăp bôk nau kan hun hao ƀư ueh trong hăn, dak kloh, trong hoch dak, ngih săm ƀŭt, ngih dak si; nkre geh âk nau kơl an ân kônh wa rnoi mpôl đê̆ geh ntĭm nti ueh, nti nau kan, geh kan pah ueh, bah nê rgop nau ndâk ƀon lan nar lơn geh nau ueh nâp ndrel hun hao”.

Wa Hring Mlô, 68 năm, rnoi Rđe tâm ƀon M’Găm, xã Mdrak mbơh, năm kan rlau aơ, rnơm nau kơl an bah Đảng ndrel Ngih dak ndrel nau kơl an bah kônh wa, nau rêh kônh wa lơn ma hao jêng, nau rêh nuih n’hâm geh mât nâp. Wa ndrel âk bau ranh tâm ƀon mro mât nau tanh njuh, n’gon ndrănh yăng mô lah ăp nau khlay êng êng...mô ân roh rui. Yơn lah, gay nau kan mât ndray geh ƀư nâp, jêh Đại hội ŭch ăp gưl kan, n’gâng kan lŏ geh ăp nau ntrŭnh ân tâm di, ndrel ma hun hao pâl n’aih nsum mpôl ndrel nau mât ndel ƀư ueh nau ơm yau bah rnoi rđe. Bu ranh Hring Mlô, ngơi:

“Mir gâp geh trong Đông Trường Sơn rlet trong nê ndrel 1,4 ha neh hŏ tăm cà phê, tơm sa play ndrel ndâk ngih. Gâp n’gon ndrănh, tanh njuh ndrel gâp ăp ndơ sa bah rnoi rđe. Jêh Đại hội aơ, ŭch ăp gưl kan, ntŭk kan gay kơl an gay rnăk gâp ndrel kônh wa tâm ƀon M’Găm hun hao pâl n’aih nsum mpôl, ndrel ma nau mât nau vay ơm kơt tanh njuh, tur chĭng. Rnôk aơ trong hăn hŏ ueh, nau kan ƀư pâl n’aih mra nơih rlau ma ntơm, yơn ân geh nau nsôih kơl an, rƀŏng trong bah Đảng ndrel Ngih dak”.

Groi Bí thư Đoàn xã Mdrak, Y Khương Mlô mbơh, rơh mom mro geh uănh lah ‘ty đah ma bah Đảng’, ngăn lah tâm rnôk jêh tâm rnglăp. Rƀŏng tĭng nau kan tâm rlong rhơn Đại hội XIV bah Đảng, đoàn viên, druh ndăm xã Mdrak hŏ nsôih ƀư âk nau kan ngăn. Rlau 2.550 đoàn viên druh ndăm râng rep kloh ntŭk ntu, yông cờ, băng rôn, pano nkoch mbơh tât Đại hội. Ngăn lah, ntơm khay 7 năm 2025 tât rnôk aơ, âk jêt rbăn toĕ đoàn viên hŏ ntĭm mbơh ƀon lan rklaih nau kan hành chính, mbơh VneID, rgop nau kơl an n’gâng kan ƀư nau kan ngăch, ueh, rƀŏng tât Đại hội XIV, nô Y Khương Mlô mbơh nau ŭch:

‘Jêh Đại hội XIV bah Đảng, gâp ŭch rơh mom phung hên mra lŏ geh kơt tĭng nti, blau ntop tay ăp nau kan mhe, geh kơl an, kơl âk tâm nau kan geh tât nau dơi nau blau mhe, geh tay âk nau nkhêp ueh gay ƀư tĭng ăp nau kan mhe lơn tâm nau ntrơn rgâl mrô; nkre lah râng nau mât, ƀư ueh nau ơm yau ueh bah rnoi mpôl ndrel ăp bôk nau kan ân an đoàn viên, druh ndăm”.

Xã Mdrak geh rlau 22 rbăn nŭih, bơi tât 40% lah rnoi mpôl đê̆; Đảng bộ xã geh bơi tât 1.200 đảng viên rƀŭn tâm 56 ntŭk kan đảng. Đah nau rnơm tâm Đảng ndrel Đại hội XIV, ntơm bah đảng viên, nŭih ƀon lan ân tât đoàn viên, druh ndăm kŏ nsôih n’hâm tâm rlong pah kan jan sa, tuch tăm, mât nau ơm yau ân nâp ueh, rgop nau ndâk njêng n’gâng kan tâm dâng ueh dăng, mpŏng tâm du rơh Đại hội geh nau dơi, pơk luh rơh mhe tâm rnôk hun hao mhe ân ƀon lan./.