Tĭng uănh n’ôi Đại hội XIV bah Đảng, kônh wa ăp rnoi tâm ăp ƀon lan Tây Nguyên rnơm ndrel mpŏng tâm ăp nau ntrŭnh gay njêng nau dơi ân hun hao nâp nâl ân neh dak kŏ kơt lah nkuăl rnoi mpôl đê̆. Tâm ƀon Alê A, phường Ea Kao, n’gor Dak Lak, âk mpưm ƀon lan rgum tâm Ngih rƀŭn nsum bah ƀon, djăt uănh Đại hội bah tivi. Wa Y-Kanin, nkoch:

            ‘Ăp nŭih ta aơ tâm rnglăp, geh âk oh nô rnoi mpôl đê̆ êng êng, hên rhơn ngăn ndrel ŭch mra geh âk nau rgâl mhe tâm rơh tât. Rđau kan lah ăp nŭih geh nau gĭt blau âk nau, geh nau rƀŏng kan ri gâp rnơm lah Đại hội mra geh âk nau dơi ueh. Ŭch Đại hội mra geh âk nau ntrŭnh bonh đă ƀư kơl tuch tăm, tơm prăk kan, văn háo gay hun hao văng sa”.

            Tâm ƀon Stơr, xã Tơ Tung, n’gor Gia Lai, wa Đinh Bơn, mbơh nau:

            ‘Ƀon hên lah nkuăl jru, ngăn ngai. Ŭch ngăn bah Đại hội Đảng aơ, Ngih dak, n’gâng kan ăp gưl kơl an âk lơn tât ƀon lan. Nŭih ƀon lan hên ŭch Đại hội Đảng geh nau dơi ueh, geh ăp nau ntrŭnh ân tâm di gay hun hao neh dak”.

            Đah nau rnơm tâm Đảng, wa Lâm Tấn Bình, du nŭih geh nau dơi bah rnoi chăm tâm xã Bắc Bình, n’gor Lâm Đồng, ŭch, Đại hội XIV bah Đảng mra nchrăp luh ăp nau ntrŭnh tâm di, leo tât nau dơi kan, tŏng dơi nau ŭch hun hao bah neh dak tâm rơh mhe:

            ‘Kônh wa rnoi mpôl đê̆ lah nsum ndrel tâm nê geh kônh wa Chăm ri mpŏng ngăn tâm ăp nau ntrŭnh ân geh tâm di trong bah Đảng gay kơl an neh dak Việt Nam kŏ kơt lah ăp rnoi mpôl đê̆ êng êng lŏ pah kan hun hao văng sa, mât nâp nau ueh dơi bah rnoi mpôl. Ŭch geh kơt nê, ăp rnoi mpôl lŏ ƀư ueh nau ntrŭnh tâm rnglăp rnoi mpôl gay rgop nau ndrel neh dak hun hao lơn tâm rach năm mhe”./.