Ăp nuĭh diễn giã lĕ mbơh nkoch âk nău kan, nău tă blău kan mpeh dŏng công nghệ rnoh mbrô tâm nău kan báo chí, nkre lah mbơh tơih na nê̆ nău nkhêp n’hanh ntul rlong bâh nuĭh ƀư báo ta rơh rgâl mhe rnoh mbrô dŭt ngăch, tâm nchră mpeh trong kan gay ma báo chí geh tâm di n’hanh n’hao mhe tâm rơh công nghệ ăp  nar lơ ma hun hao, ntul rlong âk nău tâm rlong têh lơn. Tĭng nhà báo Nguyễn Văn Phú, kruanh Hội nhà báo n’gor Đăk Lăk, ăp năm dăch aơ, báo chí ta Đăk Lăk lĕ geh âk njoat hăn mhe têh dăng bâh công nghệ rnoh mbrô. Ăp tác phẩm báo chí lĕ geh nchih ta âk ntŭk, âk ntil ndơ geh pơk sŏng dăng geh âk nuĭh uănh djăt. Wa Phú lah na nê̆, rơh rnoh mbrô mô dơn lah nău ntul rlong, ma hôm nha lah rơh nkhêp têh gay ma báo chí n’hao nău dơi, pơk hvi nău âk nuĭh djăt uănh n’hanh geh gĭt đah nău mhe ngăch lơn, tâm di lơn.