Wa Y Luyện Niê Kdăm, đại biểu Quốc hội khóa 10, tă kan Bí thư n’gor ủy Đăk Lăk nkoch, lah nuĭh geh âk nău rgâl mhe têh dăng, ăp nău pah kan bâh Tổng Bí thư Nguyễn Phú Trọng lĕ geh ƀon lan knơm, ƀon lan ŭch, ƀon lan tĭng.

 “Đồng chí khĭt lah roh du hê nuĭh kon ntoh lư bâh Đảng, bâh ngih dak bâh ƀon lan. Đồng chí Tổng Bí thư lĕ tât khâl n’gor Đăk Lăk, lah đồng chí dŭt mât uănh tât ƀon lan rnoi đê̆, nău rêh jêng, nău pah kan bâh ƀon lan, nĕ lah nău dŭt mât uănh ngăn”.

Dŭt rhơn n’hanh ryơk rnê rnôk 2 tơ̆ geh mâp n’hanh chup rup đah Tổng Bí thư Nguyễn Phú Trọng ta ăp nău kan bâh Liên hiệp ăp ntŭk kan văn học Nghệ thuật Việt Nam, wa Nguyễn Hồng Chiến ta phường Tân Thành, nkuăl ƀon têh Buôn Ma Thuột, n’gor Đăk Lăk, dŭt kahgĭt ueh đah nău kan bâh nuĭh leo kan dăch bên, ueh mêr, nău ngơi đêp rmên đah ƀon lan. Wa nkoch, ăp nău ngơi, nău mbơh nkoch bâh Tổng Bí thư lăp rsêp tâm bôk tôr nuĭh djăt n’hanh wa kahgĭt na nao ngăn.

 “Nău ntĭm nti dŭt na nê̆ tât aƀaơ gâp mĭn đah nuĭh  nchih văn, ƀư báo lah êng n’hanh ƀon lan lah nsum, nĕ lah nău ngơi “Mbang đe mô an chah yăng. Mhâm ƀư nkhĭt dơi đe ma hôm nha geh mât ueh yăng kơt ơm. Nĕ lah an geh mât nău đăp mpăn”. Nuĭh nchih nău an geh kơt nti n’hanh ƀư tĭng nău nti bâh Tổng Bí thư, mhâm ƀư an he dơi njrăng nău sa nkhiăn sa ƀer yơn an geh nsĭt tay nău mpŏng kan ueh nău knơm đah Đảng, đah nău kan ueh bâh he nơm”.

Kahgĭt na nê̆ nău ntiđnh ntăn bâh Tổng Bí thư Nguyễn Phú trọng ta Đại hội Đại biểu lam dak Đoàn Thanh niên Cộng sản Hồ Chí Minh tal 12, yuh H’Hương Buôn Krông, Bí thư Thành đoàn Buôn Ma Thuột, n’gor Đăk Lăk sŏk nĕ lah nău kan gay ma tiăr nti nơm. Ngăn lah hăn lor bôk năp tâm nău ntĭm nti nău mĭn kan cách mạng; hăn lor tâm nău ntĭm nti, nti ren, tâm nău pah kan jan sa, mĭn kan, hăn lor ƀư tĭng nău kan chính trị.

  “Nĕ lah nău kan gay ma gâp ƀư nsrôih tay nău kan nti n’hanh pah kan tĭng nău mĭn ueh ang, trong kan Hồ Chí Minh n’hanh êng wa Tổng Bí thư nơm. Kơt nti ta wa đah nău dêh mêr, gĭt vât, tiăr nti nău kan nsrôih, mpêt mkrem, pah kan kloh ueh, nău kan nău mĭn ueh. Ntĭm nti tay lý luận tâm nău rêh, mô klach jêr, mô klach ŏ r’ah n’hanh nsrôih ƀư lôch ăp nău kan gay ma rdâk njêng bản lĩnh chính trị nâp nâp, geh nău mĭn ueh, nău kan ang, nău mĭn kan têh”.