Ăp nar bôk năm 2026, nuih n’hâm nsan hao pah kan ta ăp ntŭk nchrăp ƀư ta nkual yôk yang mpeh nhâp nar n’gor Quảng Ngãi ƀư khuh n’gôr, ndăn ngăch. Aơ mô dơn lah nău nsrôih rlău jêr jŏt tâm rnôk ntŭk ƀư jêr jŏt ma hôm lah nău dâk kan ngăn ngăn njêng nău dơi mbah rhơn Đại hội Đại biểu lam dak tâl XIV bah Đảng, rgop jêng muh măt mhe an nkual yôk yang mpeh nhâp nar, ntrŭt ntrôl hun hao wăng sa- rêh jêng jŏ jong.

Ta ntŭk nchrăp ƀư trong bah Quốc lộ 40B xã Tu Mơ Rông (ntơm nơh mpeh nkuâl Tu Mơ Rông, n’gor Kon Tum ơm) hăn thôn 8, xã Đăk Pxi (ntơm nơh mpeh nkuâl Đăk Hà, n’gor Kon Tum ơm), aƀaơ lah n’gor Quảng Ngãi, mông nar kan ƀư ndăn ngăch. Bah ơm ôi tât kêng măng rŭ, ndeh rklư kan mbro, nuĭh pah kan ƀư tĭng mpôl tâm tơh, njêng nău tâm râp khuh n’gôr tâm ăp nar bôk năm mhe.

Trong nchrăp dja geh lĕ rngôch tơm prăk ntuh kơl 220 rmen prăk, dŏng tơm prăk ngân sách Trung ương ntop kơl n’hanh ngân sách n’gor nơm, đah rnoh jong rlău 8,3 km. Tâm nê gâl 800m hăn Quốc lộ 40B dơi pơk hvi tay, gâl hôm ƀa ƀă ƀư mhe. Rnôk wat jêh, njăr trong mbra chruh nthoi xã Tu Mơ Rông đah xã Đăk Pxi, rgop ntrŭt ntrôl hun hao wăng sa – rêh jêng kon nuĭh, đăp mpăn njrăng n’gang neh dak, rnă njrăng, nkre mât dŏng saơ ntil tơm neh n’hanh jêng ăp nkual ƀon lan gŭ njok trong me.

Tât aƀaơ, rnoh ƀư lôch jêh jâng trong geh tât 45%; hŏ wat jêh tuh neh lŭ du n’gul măt trong teng bah Quốc lộ 40B. Nuĭh tơm ƀư rgum bơi 60 bôk ndeh rklư đah nklăp 80 nuĭh kan, ƀư âk bôk chruh kan ngăch ngăr, an ƀư ndrel đah ăp kuĭh njŭr jâng trong, koch rmlông dak sor, ơm tŏ lơi, bât ndăl n’hanh mpir nking.

Wa Phan Ngọc Duy, Kruanh mât bôk ntŭk ƀư trong Quốc lộ 40B xã Tu Mơ Rông hăn thôn 8, xã Đăk Pxi, n’gor Quảng Ngãi an gĭt, đơn vị dôl an nklăp 10 bôk chruh, an ƀư lor ăp n’glah trong tâm nchruh nsum n’hanh trong me Quốc lộ 40B gay đăp mpăn rsong hăn bah nuĭh ƀon lan.

“Tĭng nău tâm ton hŏ ký, trong ƀư jŏ tâm 900 nar. Yơn lah, nuĭh tơm ndranh ƀư n’gluh rnoh ngăch ƀư, nsrôih lôch jêh rnoh kan rlău rnoh ngăch rđĭl đah trong nchrăp. Ntŭk ƀư mô mâp jêr jŏt, lơn lah pah kan tâm pă mbor ndeh hăn ân nđăp mpăn soih aih gay kônh wa rsong hăn, yor ta trong mhe lơn âk ƀoi rŏ tĭng trong ơm dôl dŏng aƀaơ". 

Hôm ta xã Đăk Pék, n’gor Quảng Ngãi (mpeh nkuâl Đăk Glei, n’gor Kon Tum ơm), bar trong nchrăp tơm khlay dôl an ƀư lah nchrăp ƀư trong bah nklang thị trấn Đăk Glei ơm tât nklang xã Xốp, nkuâl Đăk Glei ơm (aƀaơ lah xã Xốp, n’gor Quảng Ngãi) n’hanh nchrăp ƀư ntung 16/5.

Nchrăp ƀư trong bah nklang thị trấn Đăk Glei ơm tât nklang xã Xốp geh rnoh jong rlău 17 km, weh ƀư tĭng trong hăn tâm ƀon lan gưl A, măt trong hvi 6,5 m. Trong ƀư ntơm bah khay 12/2024 tât khay 12/2026, aƀaơ lôch jêh nklăp 10% rnoh khlay tâm ton, aƀaơ dôl rgum nhuĭh lâng măt trong.

Nchrăp ƀư ntung 16/5 geh lĕ rngôch rnoh âk ntuh kơl rlău 86 rmen prăk, lĕ ma ntung n’hanh trong bar bôk ntung đah lĕ rngôch rnoh jong 648 m. Tât aƀaơ, rnoh âk lôch ƀư geh nklăp rlău 75% rnoh khlay tâm ton. Nuĭh tơm ƀư hŏ rgum 3 bôk ndeh kuĭh, 2 bôk ndeh lu ndrel nklăp 20 nuĭh kan mbro. Ăp ndơ ƀư tơm bah ntung bôk năp lôch jêh, aƀaơ rgum ƀư trong hăn tât n’hanh lôch jêh ăp nău kan ntop ƀư tay, nsrôih tuh bê tông nhựa, ntrŭp n’gâng ŭnh mpoh ang gay mbluh ndeh bah năp Tết Nguyên đán. Wa Nguyễn Thị Thương, Kruanh UBND xã Đăk Pék, n’gor Quảng Ngãi an gĭt:

“Đah nchrăp ƀư ntung 16/5, rnoh âk lôch nău kan geh tât nklăp 80% rnoh khlay ntrŭp mon. Xã grêt dăch nuĭh tơm ƀư gay ntrŭt ntrôl, rđău đă, n’hao âk nuĭh kan, ndơ ƀư, nkre ntrôl dăng đă ntrơn du rong neh gay nta trong dơh an ƀư trong”.

Năm 2026 geh nkô̆ khlay mha êng, năm ƀư Đại hội đại biểu lam dak tâl XIV bah Đảng, bầu cử Quốc hội khóa XVI n’hanh HĐND ăp gưl. Aơ lah năm ntơm bôk năp tâm rơh hun hao mhe đah âk trong dơh soih n’hanh ntul rlong tâm păch pêng nsum. Nău an ƀư trong nchrăp hun hao wăng sa- rêh jêng kon nuĭh năm 2026 bah n’gor Quảng Ngãi, tâm nê geh nău wat jêh ăp tŏng ntung trong mbra geh ăp nău dơh gay hun hao.  

Nghị quyết Đại hội Đại biểu Đảng bộ n’gor Quảng Ngãi lor bôk năp, năm kan 2025 – 2030 ntrŏng rgum ntuh kơl, rgum n’hanh dŏng geh nău tam ăp tơm ndơ gay hun hao buăt nthoi ntung trong ăp kôp, têh uĕh mhe; an ƀư lor ndơ dŏng khlay an ăp xã nkual jru, nkual ngai, nkual rnoi mpôl đê̆. Mông nar ƀư khuh n’gôr ta ăp njăr trong mpeh yôk yang ăp nar bôk năm lah ndơ an saơ kloh nău nsrôih nê, njêng jâng nsing khlay gay ăp ntŭk đăt ndal tâm rơh mhe. Wa Nguyễn Hoàng Giang, kruanh UBND n’gor Quảng Ngãi an gĭt: 

“Rnoh ngăch ƀư n’hanh pah kan n’gluh tơm prăk ntuh kơl năm 2026 ân đăp mpăn di trong nchrăp ndơ̆ luh, aơ lah nău dơn kan chính trị khlay bah tĭng nhih pah kan, đơn vị, nuĭh tơm ntuh kơl. Ân rgum droh rklaih ăp jêr jŏt, nkra dŭt bah ăp ntŭk nchrăp kan ruih nkai, rlu an ƀư; droh rklaih ăp kô̆ yơn kol khan mpeh ntŭk ntô ndơ dŏng, neh ntu, siƀŭt ntuh kơl, n’hao ngăch pah kan đă ntrơn du gay ntuh kơl ngăch ăp ntung trong khlay ta n’gor".