Ntơm rnôk hôm lah kon se nti jrâu 10 tât 12, Hoàng Tiến Dũng hŏ geh nau ŭch nau kan công nghệ thông tin. Jêh lôch jrâu 12 năm 2003, tĭng nau ŭch bah rnăk vâl, nô geh nti Trung cấp Quân lực ngih săm ƀŭt Đại học Trần Đại Nghĩa ndrel lôch nti geh đă kan tâm Rnâng kan rđau tahen nkuăl têh Buôn Hồ pah kan. Ta aơ, yor geh nau ŭch ngăn ma công nghệ thông tin, nô geh n’gâng kan ba lơ ân hăn nti Lập trình viên tâm Đại học Khoa học Tự nhiên nkuăl ƀon têh Hồ Chí Minh. Lôch nti, geh bằng giỏi, Hoàng Tiến Dũng ntơm leo ăp nau tă geh nti lăp tâm nau kan ngăn. Knŭng tâm 4 năm, nô nchih 2 phần mềm mât ndrel du nau kan nchrŏng pănh dŏng ân ăp ntil phao AK. Thiếu tá Hoàng Tiến Dũng, ngơi:

 ‘Nau kan bah phần mềm lah kơl an mât nau ân ƀon lan nơm tâm rnôk dôl ma geh lăp hăn tahen, mât dơi nŭih geh tâm rnôk ƀư đăng ký gạch dự bị động viên, jêh ri hạng 1, hạng 2; kơl an ân cán bộ ƀư nau kan săch tahen ƀư ăp nau kan geh kơt nau đă rnôk ƀư”.

 Mô knŭng ŭch ma nau nchih phần mềm, Thiếu tá Hoàng Tiến Dũng kŏ nsôih râng tâm rgop ma tahen mĭn njêng ăp nau dŏng phao ndrel ăp ntil phap kơl ntĭm tâm lơh. Bôk năm, nô ndrel ma Trung tá Phạm Văn Đông-Kruanh n’gâng kan rđau tahen nkuăl têh Buôn Hồ, mĭn nkra dơi nau kan “Rgum trong pănh âk ntil dơi” tâm phao tiểu liên Ak lah snum ndrel phao AR-15. Nau ƀư aơ hŏ geh N’gâng kan rđau tahen nkuăl têh Buôn Hồ, N’gâng kan rđau tahen n’gor Dak Lak uănh săch ndrel leo lăp dŏng ngăn tâm rơh tât. Trung tá Phạm Văn Đông, nkoch:

‘Đah nau mĭn ƀư bah gâp lah rgum tâm nau mêt uănh trong nchrŏng pănh dĭng nar kŏ kơt lah tâm bri măng, bah trong rgum cảm biến ang trong; hôm đah đồng chí Dũng lah nkra kơt ăp ntrong nchrŏng uănh geh rgum njoăl tâm điện thoại. Bar ntil aơ ri geh nau rgum jêng nau ƀư “Rgum trong nchrŏng pănh âk nau blau” ndrel tât rnôk aơ gâp ndrel đồng chí Dũng hŏ tâm rgop, jêh ri mĭn njêng geh nau dơi ntil ndơ nê”.

Tĭng Thượng tá Tống Văn Quang-Chính trị viên Rnâng kan rđau kan nkuăl têh Buôn Hồ, ăp năm ma aơ, rmôt cán bộ tahen bah ntŭk aơ mro ƀư rjăp ăp nkô̆, bôk nau kan ntĭm nti chính trị, pháp luật ƀư ân cán bộ, đảng viên đăng ký, ton mra kơt tĭng nti, nchiăr săk, nau rêh, nau kan Hồ Chí Minh; ntoh n’hao nuih n’hâm ƀư nau kan tâm nau dŏng khoa học công nghệ tâm nau kan tâm lơh...Tă bah nê nar lơn ma geh âk nŭih ntoh lư blau tâm nau kan, tâm nê ntoh ngăn lah thiếu tá Hoàng Tiến Dũng đah phần mềm “Mât ndak nsiu” ndrel “Mât công dân lăp tahen”...Ăp phần mềm aơ hŏ ndrel dôl geh dĭng âk ngăn, rgop nau n’hao săk tam tâm nau mât neh dak. Thượng tá Tống Văn Quang mbơh nkoch tât Thiếu tá Hoàng Tiến Dũng:

   "4 năm mro đồng chí Dũng lah đảng viên mro ƀư jêh nau kan bah ntĭm kan, hôm mpeh nau mĭn nkra njêng ri păng geh N’gâng kan neh dak, Quân khu 5 ndrel N’gâng kan rđau tahen Dak Lak pă bằng khen. Ăp phần mềm mât tahen dự bị động viên ndrel nau blau yor đồng chí nkra kŏ geh leo dŏng ngăn âk ntŭk rnôk aơ ndrel ăp năm ba kơi đŏng”.

Bơi tât 20 năm ƀư nau kan tâm Rnâng kan rđau tahen nkuăl têh Buôn Hồ, thiếu tá Hoàng Tiến Dũng hŏ ndrel dôl ƀư âk phần mềm ndrel nkra nau kơl an ntĭm nti tâm lơh ân săk tam. Đah nau nsôih tâm rnôk kan, nô hŏ geh ăp gưl n’gâng kan pă âk nau nkhôm prêh. Yơn lah, đah nô, nklâm ndơ khlay ngăn nê lah nau rnơm bah băl mpôl ndrel tahen nơm. Aơ mra lah nau bonh gay nô lŏ ntĭm nti, mĭn, njêng ăp ntil phần mềm geh nau tam lơn gay ma ƀư nau kan mât neh dak tâm rnôk mhe./.