Nkhêp nkah ndray 93 năm nar njêng Đoàn TNCS Hồ Chí Minh (26/3), ôi aơ, ta Nhih pah kan Chính phủ, Thủ tướng Chính phủ Phạm Minh Chính mâp măt n’hanh tâm dâl nău đah druh ndăm đah nkô̆ “Ntik n’hao nău khlay kan chŏl lor  bah druh ndăm tâm rơh rgâl mbrô gưl neh dak”. 

Râng bôk nău kan mbra geh ntơh măt kruanh  rđău kan ăp  n’gâng kan, nsum mpôl Trung ương n’hanh nklăp 300 đại biểu ntơh  măt an mpôl druh ndăm. Bôk nău kan tâm dâl nău rgum tâm ăp rmôt nkô̆ nău nê lah: ăp trong nchrăp, trong kơl bah Ngih dak mpeh rgâl mbrô gưl neh dak; ntik n’hao nău khlay kan, nău dơn kan bah druh ndăm tâm rơh rgâl mbrô gưl neh dak. Ndrel nê lah trong kơl, tơm suan bah Ngih dak tâm nău ntop kơl, ntik nău khlay kan, nău dơn kan bah druh ndăm  tâm nău tĭng ƀư  ăp rnoh tât kan bah gưl neh dak; mpư rnê nău tât râng, n’groh an bah druh ndăm ntoh lư tâm hun hao wăng sa- rêh jêng kon nuĭh, rdâk  njêng n’hanh mât njrăng neh dak. Tâm  trôm bôk nău kan, Thủ tướng Chính phủ mpư rnê ăp nuĭh druh mom ntoh lư Việt Nam n’hanh nuĭh ntoh lư druh ndăm Việt Nam mpŏng hun hao năm 2023.