Nĕ lah nkô̆ nău geh mbơh tơih ta rơh rƀŭn nchră ôp nău n’hanh ơh nău ôp bâh rơh rƀŭn nchră tal 16 HĐND n’gor Lâm Đồng khóa 10 geh ƀư ta nar 12/7.

Bâh bôk năm tât aƀaơ, n’gor Lâm Đồng rmal 15 rơh, đah 21 nuĭh geh tih tât nău kan an manh prăk sŏk prăk kon âk, an manh prăk kon khlăy, hao 9 rơh đah khay aơ năm e. Wa Cill Bri, đại biểu HĐND ta nkuăl Di Linh n’gor Lâm Đồng mbơh, nău kan an manh prăk sŏk prăk kon khlăy, an manh prăk đah rnoh prăk kon dŭt jêr njrăng, mô dơn ta ăp nkuăl ƀon têh ma hôm nha ta ăp ƀon lan nkual njônh ngao, nkual ƀon lan rnoi đê̆ ta n’gor. Ta năp nău nĕ, an geh ntŭk kan công an n’hao tay lơn nău kan njrăng rdâng n’hanh rmal nuĭh tih aơ. Gay ma n’hao an săk rnglăy nău kan njrăng rdâng, rmal ăp nuĭh an manh prăk sŏk prăk kon khlăy ta Lâm Đồng. Đại tá Trương Minh Đương an lah an geh nău lăp kan bâh lĕ trong kan chính trị, nău tâm rgop kan tâm ban bâh ăp ntŭk kan geh tât.