Njok tĭng trong têh hăn ngăch, ăp mphung pah kan n’hanh kỹ sư dôl pah kan mô rlu rlău; bah nkhŭt bê tông, ndâk ƀư ntung tât jêh tĭng ndơ jêt. Nteh n’gôr măy mŏk n’gŭr răm. Ăp bôk ndeh rdêng tâm nthoi rdêng lŭ loih choih xi măng. Nô Lê Văn Huynh, mphung pah kan dôl kan ta ntŭk tâm mâp trong hăn TL10 nkoch:

Oh nô mphung pah kan nsrôih dŭt n’hâm nơm. Hôm e dŭt n’hâm kan, bôl Tết yơn oh nô dŭt n’hâm. Đah nuih n’hâm lĕ rngôch oh nô rhơn răm nsrôih pah kan, đah nău rƀŏng gay đăp mpăn ngăch jêh.

Ndrel nuih n’hâm nĕ, nô Phan Viết Trí, đội trưởng đội thi công ta ntŭk tâm mâp trong TL10 an gĭt, rmôt bah nô geh 30 nuĭh, nar Tết dương lịch, lĕ rmôt hôm e pah kan nâm ơm.

Aƀaơ oh nô dôl nsrôih lĕ soan gay ndăn ndơ̆ ndơ ƀư lăp di jêh. Bôl trôk nar mâp mô uĕh yơn oh nô hôm e ndăn gay ƀư, bri mih hôm e ƀư. Tết dương lịch oh nô hôm e ƀư nâm ơm.

Trong mŭr yôk Phượng Hoàng lah trong lăp ngoăy dơm ta trong têh hăn ngăch Khánh Hoà-Buôn Ma Thuột. Aƀaơ nuĭh ndranh dôl tâm pă âk nuĭh, ndeh, măy mŏk mbơh ƀư “3 ca-4 kíp” măng nar gay jêh trong mŭr ta dŭt năm 2025. Ta ntŭk ƀư 2 trong mŭr mŭt yôk Phượng Hoàng mpeh n’gor Dak Lak, âk mphung pah kan ndrel ăp ndeh, măy mok dôl rtoh mìn, khom rdêng neh lŭ luh bah dih, ndrăng jal loih, rdâk n’gâng loih, krih bê tông n’hanh ntăm rse kăt rdâng nâp nâl trong mŭr. Wa Cao Tấn Lực-Groi Chỉ huy trưởng ƀư trong mŭr Phượng Hoàng, an gĭt:

Công ty ƀư trong nchrăp ƀư “3 ca-4 kíp”mât 24/24h gay mâp na nao nău kan koar trong mŭr. Ngăch kuih bah mpôl hên tâm trong mŭr bah mpeh bah lơ đah ma mpeh n’gor Dak Lak lĕ kŭih geh 400 mét, mpeh đah kiău rĭ lĕ geh rlău 440 mét.

Wa Ngô Hiểu Khoa, Giám đốc Mpôl ƀĭt joet Tập đoàn Đèo Cả an gĭt, trong mŭr Phượng Hoàng jong 1,7 km, lah du ndơ ƀư tâm trôm ndranh geh dĭng lĕ jong 11 km yor ntŭk kan dơn ndâk ƀư. Aƀaơ du nar tập đoàn tâm pă bơi 400 mphung pah kan n’hanh nklăp 100 ndeh ndrel măy mŏk ndrel mbơh ƀư trong mŭr ndrel 10 ntung n’hanh trong mpeh tâm ndơ ndranh, trong nchrăp jêh trong mŭr ta dŭt năm 2025 jêh. Wa Ngô Hiểu Khoa, lah.

Năm 2025, mpôl hên nsrôih jêh ndâk ƀư ăp n’gâng, săk, jâng n’hanh rkơl jâng ntung. Êng mpeh trong mŭr Phượng Hoàng dôl mâp đêt jêr jŏt ta nău sŏk neh  mpông trong mŭr mpeh bah lơ luh nar n’gor Khánh Hòa, n’hanh lâh đăp mpăn pơk mpông trong mŭr bah năp Tết Dương lịch năm 2025 aơ n’hanh neh ntu tâm ban kơt ta aơ ri mbra dŭt năm 2025 mpôl hên mbra đăp mpăn jêh trong mŭr Phượng Hoàng.

Nău nchrăp ƀư trong têh hăn ngăch Khánh Hòa-Buôn Ma Thuột geh dĭng lĕ jong 116,5 km, tâm nĕ, dŭt âk nău nchrăp ƀư hăn rlău Dak Lak. Lơn lah, nău nchrăp ƀư gưl nău 3 lĕ jêh trong kan sŏk neh n’hanh geh rnoh ndâk ƀư nglăp bơi 32%. Bôl mâp jêr jŏt mpeh trôk nar, đah 18 nar mih tâm khay 12, yơn knơm nău nsrôih n’hanh nuih n’hâm rlet rlău jêr jŏt bah mphung pah kan, ngăch ndâk ƀư dơi mât mro. Wa Đặng Thọ Dần, Giám đốc ƀĭt joet nău nchrăp ƀư, an gĭt:

 Aƀaơ ta ndơ ndranh aơ bơi 1 rbăn mphung pah kan dôl gơih nđơr pah kan, mih hôm e ƀư, 500 ndoh ndơ đah 49 nsôch koar tơm ta lam trong. Mpôl hên nkah mro ăp ntŭk kan an đăp mpăn luật pah kan, mphung pah kan ƀư geh prăk khay, an đăp mpăn nău geh nuĭh pah kan.

Đah nău rƀŏng ta dŭt năm 2025 jêh 68 km bôk năp bah Nău nchrăp ƀư trong têh hăn ngăch Khánh Hòa-Buôn Ma Thuột, ăp ntŭk kan geh tât lĕ n’hanh dôl ƀư tĭng tâm ban ăp trong mkra gay ntrôl ngăch, rhoăt đêt khay ndâk ƀư. Ăp nar bôk năm mhe 2025, hang rbăn mphung pah kan ta ntŭk ƀư. Khân pơng lah ăp nuĭh ntrôl ngăch jêh trong têh hăn ngăch, rgop an Tây Nguyên lah nsum, Dak Lak lah êng geh tay ndơ hao tâm rach năm hao săk nơm.