VOV4.M’nông: Tâm ăp nar 22 ndrel 23 khay 9, Công ty Điện lực Dak Lak tâm rgop nsum đah ăp rmôt kan ndrel ma nkuăl ƀư nau jao 2 ngih kơl an ân rnăk wa Nguyễn Anh Huấn (ta Thôn 8, xã Ea Uy, nkuăl Krông Pắc) ndrel rnăk wa H’Lam Niê (ta Ƀon Knul, xã Ea Bông, nkuăl Krông Ana). Ăp rnăk nê kŏ geh ntŭk kan điện kơl an 50 rkeh prăk, ăp rmôt kan bah nkuăl ndrel ma rnăk vâl lŏ rgum tay prăk gay ma ndâk ân nâp lơn.

Tâm âk khay rlau aơ, Công ty Điện lực Dak Lak hŏ ndâk geh 5 ngih kơl an ân ăp rnăk geh nau rêh jêr jŏ, tâm bôk nau kan pă kơl 70 ngih yor N’gâng kan Công ty Điện lực Miền Trung kơl an ân ăp n’gor Miền Trung Tây Nguyên năm 2022. Dơi gĭt, êp nau kan ƀư nau ê nkra, tăch rgâl, tâm ăp năm, Điện lực Dak Lak dŏng nklăp du rmen prăk gay ma ƀư ăp nau kan kơl an, gay ma kơl ăp rnăk ach o, yur mham kơl an, mpoh ang trong ƀon...Wa Tạ Minh-Groi Giám đốc Công ty Điện lực Dak Lak, ngơi:

“Êp nau kan ƀư ê nkra tăch rgâl ri ntŭk kan điện lah nsum ndrel công ty điện lực Dak Lak lah êng lah dŭt n’hâm uănh khlay tât nau kan kơl an, nau tâm kơl. Ndrel đah nau rgop kơl an bah ăp cán bộ nŭih pah kan ri Công ty kŏ dŏng tơm prăk tâm rgop êng gay ma ƀư ăp bôk nau kan kơl an tâm nau rêh jêng. Rơh rlau aơ, ri công ty kŏ tâm di nau hăn kan nsum đah ăp rmôt gay ma kơl ndâk ngih gŭ ân du đê̆ rnăk vâl hôm mâp nau jêr. Bôk nau kan aơ hŏ ndơn geh ƀư mro ndrel mra lŏ ƀư tay tâm ăp năm tât”./.

Nŭih rblang: H’Thi