Kruanh Văn phòng Quốc hội Bùi Ngọc Thanh lah nŭih geh âk năm pah kan nsum ma Kruanh Quốc hội Nguyễn Phú Trọng ntơm gưl 11, đah wa Thanh, Kruanh Quốc hội Nguyễn Phú Trọng geh du nau rêh ueh:

‘Rơh ma Kruanh Quốc hội mhe ndơn nau kan, Kruanh Văn phòng ndrel Kruanh Quốc hội pah kan bah dih mông kan âk ngăn, gâp nkah khay 8 năm 2006, geh nar rƀŭn Uỷ ban Rnâng kan Quốc hội rƀŭn 42, kŏ rvê nau kan ri ma dĭng nar gâp ndăn hăn tâm nchră tay. Bol ma rnôk nê ntŭk pah kan bah Quốc hội hôm rhăt ngăn, yơn hên hôm nsôih pă ntŭk pah kan bah Kruanh ân geh ntŭk rlu dĭng nar ndrel geh ntŭk vơt năch. Gâp tât ntŭk rlu dĭng nar ri mô saơ ôh Kruanh, dăn tât jrâu vơt năch kŏ mô saơ, hăn tât ntŭk pah kan păng nơm ri saơ Kruanh dôl ma bĭch nkêng săk ma ty hôm ndjôt săm ƀŭt gay ma mĭn. Gâp ôp Kruanh mhâm lah bĭch kơt nê, ma mô bĭch tâm jrâu bĭch gay ma rlu rlau, ri păng ơh jrâu gâp ri nchrăp ân nau kan êng. Du hê nŭih dŭt n’hâm mleh, dŭt n’hâm tâm dăch dơh. Gâp vay dŏng nau moh kơt nê ntơ lah nau rêh ueh bah du hê nŭih kan gưl prêh”.

Yor nau tâm dăch dơh ri ma nau ueh bah Kruanh Uỷ ban ăp nau kan rêh jêng bah Quốc hội Nguyễn Thị Hoài Thu đah Kruanh Quốc hội Nguyễn Phú Trọng, nê lah du hê nŭih pah kan geh nau pah tă bah ƀon lan ntơm njêng, ntơm ƀon lan ma ƀư jêng kơt nê:

‘Tâm ăp rnôk tâm mâp cử tri gâp mô mâp saơ ăp rnôk đồng chí Nguyễn Phú Trọng hao gŏ ba lơ jêh ri păng uănh jur ân ăp nŭih tap ty, ma păng hăn tă bah dâng hao, nhup ty bar đah ntŭk bu gŭ. Jêh nê mơ hăn gŭ ba lơ gay ma djăt, ơh nau. Nê lah du nau mĭn ƀư, du nau ƀư ueh ngăn bah nŭih tă ƀon lan ma jêng, tă bah cử tri ma jêng yơn mô di lah hăn tât ntŭk gŭ ba lơ gay ma ntĭm rđau bu”.

 Geh bar gưl pah kan nsum ma Kruanh Quốc hội Nguyễn Phú Trọng, wa Trần Thị Hoa Ry, Groi Kruanh Hội đồng dân tộc bah Quốc hội nkah ngăn nau ƀư kan ueh bah du hê nŭih geh bôk rngok gĭt blau, âk nau janh rnôk ndơn nau kan tâm lơ 26/6/2006:

‘Ntoh nau tâm rnôk ndơn nau kan Kruanh Quốc hội, đồng chí hŏ răk nau ndring tâm nau Kiều: “Mĭn nơm, săk n’hơ nar n’hơ. Nau rêh mô gĭt geh ueh lăng đŏng lah mô”. Sŏk nau ndrĭng Kiều gay ma ntoh nuih n’hâm nơm kơt nê ân nơm kŏ saơ nau rjăp tâm nau rêh mô kâp nau geh dơi bah đồng chí rnôk geh ndơn nau kan khlay aơ ndrel kŏ lah nau ton nsôih ndrel nau kan bah nơm ma Đảng ndrel Quốc hội ndrel ƀon lan”.

Ăp nŭih ntoh măt Quốc hội hŏ pah kan tâm ăp gưl kan 11 ndrel 12 kŏ geh nau ŭch ngăn ngên đah Kruanh Quốc hội Nguyễn Phú Trọng. Groi Kruanh rmôt kan ntoh măt Quốc hội n’gor Thanh Hoá gưl 12 Lê Văn Cuông rngot rnôk nkoch tât ăp nau rđau kan ôp ndrle ơh nau ôp bah Kruanh Quốc hội Nguyễn Phú Trọng:

‘Wa hŏ ân ma gâp geh ôp Kruanh n’gâng kan tât 3 tŏ rnôk gâp mô hôm ôp đŏng ôh ri mơ ma nsrŭng. Rnôk saơ Kruanh n’gâng kan mô hôm geh nau dơi ơh ri rnôk nê wa hŏ geh nau mbơh gay ma Kruanh n’gâng kan rgum tâm nau ơh nau ôp nê. Ndri ma, rơh ôp bah bah gâp geh ueh ngăn, nkre geh nau khuh n’gôr, ueh ndrel geh nau duh đŏng, geh ƀon lan bu djăt tĭng uănh geh nau kơp dơn rnê prêh. Wa rđau đah du nau kan jru ndrel geh nuih n’hâm rjăp ndrel mô geh ƀư tĭng nau jâk, pơk trong nơih ueh ngăn ân ăp ntoh măt Quốc hội geh nau rnơm ndrel ơh nau, lĕ ma bar ding kŏ geh nau dơi mhâm ƀư ân ƀon lan tâm ban nuih n’hâm”.

 Đah ăp ntoh măt rơh bôk năp geh râng tâm ntŭk kan ƀon lan săch đă kơt wa Phạm Nam Tiến, rmôt kan ntoh măt Quốc hội n’gor Dak Nông, Tổng Bí thư Nguyễn Phú Trọng lah nŭih leo ang ang, ueh ngăn gay ăp ntoh măt Quốc hội kơt tĭng:

‘Tổng Bí thư mro tâm dăch, mro ueh nơih, djăt nau đă, rgop nau bah cử tri ndrel ƀon lan. Ndrel ngăn lah Tổng Bí thư rnôk geh ntoh nau mbơh bah nơm ri mro geh ƀư lôch n’hâm rjăp ngăn. Nê lah nau mât nau rnơm, nau dơi kan bah nŭih rđau kan, bah ntoh măt Quốc hội bah năp ƀon lan, cử tri”.

Đah nau ƀư Kruanh Quốc hội gưl 11, 12, Kruanh Quốc hội Nguyễn Phú Trọng mro tâm dăch dơh đah Quốc hội, gĭt kloh mpeh nau kan, nau ƀư kan bah Quốc hội ndrel geh ăp nau nkah ueh ngăn:

-Ndơn nau nŭih hăn lor, khay 6 năm 2006, rnôk ƀư Kruanh Quốc hội gưl 11, Kruanh Quốc hội Nguyễn Phú Trọng hŏ rđau kan, rđau đă rjăp ngăn gay Quốc hội ƀư ân jêh ueh ngăn nau kan bah lôch 3 gưl. Tâm di năm rđau kan, Quốc hội hŏ nchră luh 13 luật, 11 nghị quyết, tâm nê geh 3 nghị quyết khlay ngăn đah nau dơi têh dăng, nê lah Nghị quyết ân ƀư Nghị định thư ân geh lăp kan tâm rmôt kan ndâk ƀư ntŭk kan tăch rgâl đah lam ntur neh (WTO) bah dak Cộng hoà xã hội chủ nghĩa Việt Nam; Nghị quyết mpeh nau kan rgum ndâk ngih kan Quốc hội ndrel Nghị quyết mpeh nau ƀư ntŭk kan khlay bah neh dak Khí-điện-đạm Bà Rịa-Vũng tàu.

-Năm kan Quốc hội gưl XII, Quốc hội hŏ nchră luh 67 luật, 13 nghị quyết. Tâm nê geh âk luật njêng nau dơi, nau kan ân nau rklaih ăp nau ƀư sa khâm, nau tih jêh aơ kơt Luật rgâl nkra, ntop tay du đê̆ điều bah Bộ luật Tố tụng hình sự, Luật rgâl nkra, ntop tay du đê̆ điều bah Bộ luật hình sự, Luật thi hành án dân sự, luật Đặc xá, Luật mât, dŏng drăp ndơ bah Ngih dak...

 -Quốc hội gưl 12 geh nau rgâl têh mpeh nau ƀư kan, n’hao rnoh âk bah nŭih kan ntoh măt ƀư nau kan, ăp ntŭk kan bah Quốc hội, ntơm bah 8 ntŭk kan kơt ăp gưl bah năp hŏ hao jêng 10 uỷ ban.

-Lôch gưl kan 12, đah nau rđau kan rjăp ngăn bah Hội đồng săch kan neh dak, dâk bôk lah Kruanh Quốc hội Nguyễn Phú Trọng ndrel ntrong kan ƀư săch kan bah lam dak, rơh bôk năp ntơm ƀư ndrel du rơh săch kan ntoh măt Quốc hội (gưl XII) ndrel ntoh măt Hội đồng nhân dân 3 gưl (năm kan 2011-2016) hŏ geh nau ueh. Rơh săch kan geh têm mông nar, prăk rêl n’hâm soan bah cử tri ndrel hŏ geh nau dơi ntơm nâp nâl ân ăp rơh săch kan bah kơi tay.

Kruanh Quốc hội Trần Thanh Mẫn lah rjăp, Tổng Bí thư Nguyễn Phú Trọng lah du nŭih pah kan geh nau mĭn, nau blau, âk nau janh, nau jăp khoa học biện chứng, nau gĭt geh âk, lý luận bao lĕ, rlet rlau ăp nau mĭn dơm dam. Đah 80 năm rêh, 57 năm Đảng, Đồng chí hŏ dŏng lôch nau rêh nơm yor nau mĭn kan prêh ueh bah Đảng, lah nŭih leo trong ang, rjăp nâp mpeh nau rêh cách mạng bah nŭih tahen cộng sản, lah nŭih chính trị geh nau blau, nau mĭn nâp, Nŭih lý luận blau ngăn bah Đảng, lôch n’hâm ƀư nau kan ân nau mĭn đăp mpăn rnoi mpôl ndrel chủ nghĩa xã hội, yor nau ueh lăng bah ƀon lan:

‘Đah nau kan bah nŭih rđau kan prêh ngăn bah Đảng, ƀư âk nau kan khlay ma Đảng, ngih dak rđau đă tâm nê geh nau ƀư lah Kruanh Quốc hội gưl 11, 12, đồng chí mro tâm dăch ngăn ma Quốc hội, gĭt kloh mpeh nau ntŭk ƀư kan, nau kan bah Quốc hội. Đồng chí mro nkah ăp nŭih ân dŏng âk mông nar ân rjăp ân nau kan bah Quốc hội, ân geh nau mĭn jri, geh nau gĭt rjăp ngăn mpeh Quốc hội gay geh ăp nau rgop, nau nkoch mbơh kloh. Đồng chí ntĭnh: tĭng kơt ƀon lan, tĭng kơt nau ngăn, nau ntrŭnh, pháp luật bah ngih dak ntrŭnh lơi ân ngai ƀah ma nau rêh. Nơm ân geh nsum play nuih mpât ma nau rêh, bah play nuih ƀon lan ri mơ ƀư nau kan bah Quốc hội mra geh ueh ndrel săk tam”./.