Ntơm bah ăp trong ntĭt leo wăng sa na nê̆ an ƀư tâm dâng , Nghị quyết Đại hội  Đảng bộ n’gor Quảng Ngãi lor bôk năp, năm kan 2025 – 2030 dôl tĭng kơn lăp tâm nău rêh. Nău tĭng ƀư ăp rnoh tât hun hao wăng sa ndơ̆ luh tâm Nghị quyết hŏ n’hanh dôl jêng suan ntrôl gay n’gor đăt ndal, rgop n’hao nău geh wăng sa, nău rêh nuĭh ƀon lan, rƀŏng tât an ƀư jŏ jong, lơn lah ta nkual prêh, nkual ƀon lan rnoi mpôl đê̆:

Ta thôn Kon Tun, xã Tu Mơ Rông, n’gor Quảng Ngãi, wa A Hai (50 năm deh) lah nuĭh dâk leo lor bôk năp tâm rgâl mhe trong wăng sa gay hun hao rnăk wâl. Aƀaơ rnăk păng mât dŏng nklăp 20 héc ta neh, tâm nê rlău 10 héc ta bri tăm, lơn âk lah tơm Gáo êr. Bah meng nê, păng tăm rlŭ ăp ntil tơm bời lời, hông, n’gĭr n’hanh nkre đah mât rong ndrôk deh kon ta nâm n’hâm bri, bah nê ntop n’hao geh wăng sa. Mô dơn wăng sa jăp blău, wa A Hai nsrôih rgŏ jă nuĭh ƀon lan rgâl nău mĭn tuch tăm, rgâl bah tăm tơm glêh nar jêng tăm bri jŏ jong nkre đah mât njrăng ntŭk gŭ rêh:

“Gâp nsrôih pah kan jan sa gay hun hao wăng sa. Rnôk he ƀư dơi ri oh kon mơ kơt tĭng. Đảng viên ân dâk leo lor, ân hăn bôk năp tâm hun hao wăng sa. Ta aơ, he rgŏ jă kônh wa rgum tuch tăm mât rong, ôp joi, tâm nkoch gĭt trong wăng sa nsĭt geh”.

Ta xã Tu Mơ Rông đŏng, yuh Y Khương (36 năm deh), Kruanh thôn nkre Bí thư Chi bộ thôn Ngọc Leng lah ngoăy tâm ăp cán bộ tâm dâng ntoh lư tâm rơh rgŏ jă nuĭh ƀon lan dăp rgum si tăm, tĭng kơn n’hao tơm geh wăng sa, rgâl nău rêh. Ntơm bah năm 2024, yuh Y Khương nănh tăm cà phê đah rnoh hvi nklăp 6 sào. Lĕ rngôch ntil cà phê dơi xã ntop kơl, cán bộ n’gâng kan tuch tăm ntĭm nti na nê̆ kỹ thuật ntơm bah kuĭh ntu, poh phân tât mât chăm. Lôch rlău du năm, tơm cà phê hao jêh uĕh. Yuh Y Khương mĭn lah, lah đảng viên ân ntĭt leo lor, dâk bôk năp tâm hun hao wăng sa gay kônh wa kơt tĭng:

“Nkoch trêng, rgŏ jă nuĭh ƀon lan rgâl nău mĭn, trong ƀư. Tơm cà phê an nsĭt geh wăng sa âk, kônh wa saơ nsĭt geh jêng nănh tĭng ƀư đŏng. Ntơm nơh tăm bum blang yơn tơm khĭt âk. Ntơm bah năm 2024, gâp rgŏ jă kônh wa tăm cà phê. Năm 2024, thôn Ngọc Leng geh 24 rnăk râng; tât năm 2025 geh tay 25 rnăk tăm, nsĭt geh bah cà phê âk jêng kônh wa lơn ma nsrôih ƀư tay”.

Ntơm bah ăp trong ntĭt leo wăng sa na nê̆ tâm dâng, nuih n’hâm n’glăp Nghị quyết tâm nău rêh ta xã Tu Mơ Rông tĭng kơn dơi ƀư jêng ngăn ngăn. N’gâng kan ta ntŭk ntrŏng hun hao wăng sa lah nău dơn kan rgum tơm, nkre kan lhăt đah rnoh tât n’hŭch ach o jŏ jong n’hanh rdâk njêng ƀon lan mhe.

Tâm năm kan 2025 - 2030, xã Tu Mơ Rông n’gluh rnoh tât rĭng geh tĭng bôk nuĭh hao dŭt đêt 63 rkeh prăk/năm. Gay tât rnoh dja, xã sơch trong kan tuch tăm mât rong ƀư trong hăn tơm, tâm nê tơm cà phê dơi ntrŏng lah tơm tăm khlay. Tâm 2 năm bôk năp, xã nsrôih hun hao nklăp 300 héc tơm cà phê, tĭng kơn jêng nkual tăm rgum. Wa Võ Trung Mạnh, Bí thư Đảng ủy xã Tu Mơ Rông, n’gor Quảng Ngãi an gĭt, n’gâng kan ta ntŭk dôl an rdâk njêng mã nkual tăm n’hanh đề án săk ntơ lư cà phê Tu Mơ Rông, rƀŏng tât di rnoh tăch n’gluh:

“Ngoăy tâm prao nău dơn kan rgum tơm, đăt ndal bah xã lah rđău đă lĕ n’hâm suan rgâl nău mĭn, trong ƀư, ntơm bah cán bộ, đảng viên. Cán bộ, đảng viên mô kơp êng Đảng ủy, Ủy Ban Mặt trận Tổ quốc Việt Nam xã mô lah UBND xã Tu Mơ Rông râng tĭng nău kan na nê̆, ntơm bah ươm tơm, ntĭm nti tât ôp uănh, ntrŭt ntrôl. Ôp uănh ta aơ lah ndrel ƀư, ndrel groi nđôi, mô di kâp lôch mơ dĭng hăn ôp uănh”.

Ăp nău dơi hŏ geh n’hanh trong ƀư bah tâm dâng ta Tu Mơ Rông lah ndơ an saơ n’grêh rêh an nuih n’hâm n’glăp  Nghị quyết Đại hội đại biểu Đảng bộ n’gor Quảng Ngãi lor bôk năp, năm kan 2025 – 2030 lăp tâm nău rêh. Ăp ntŭk nkre đah hun hao wăng sa nkre đah n’hao geh nău rêh ƀon lan da dê, sŏk nuĭh ƀon lan ƀư rgu tơm, ntŭk nsing gay ndơ̆ Quảng Ngãi hun hao ngăch, jŏ jong tâm rơh mhe.

Tỉnh ủy Quảng Ngãi hŏ ntrŏng pah kan đăm jru, nkoch trêng lah nău dơn kan rgum tơm, an ƀư ăp kôp nghị quyết bah n’gor tât tâm dâng. Wa Hồ Văn Niên, Bí thư Tỉnh ủy Quảng Ngãi đă ăp gưl ủy, n’gâng kan ta ntŭk ndăn ngăch rdâk njêng bôk nău kan, trong nchrăp ƀư na nê̆, nkre đah nău dơn kan nuĭh mât bôk. 

“Ntrôl ngăch tĭng ƀư ăp trong nchrăp kan rgum tơm, geh nău buăt nthoi, ƀư suan ntrôl ring lam, ntrŭt ntrôl hun hao wăng sa- rêh jêng kon nuĭh. Ra uănh tay, ôp uănh ăp trong nchrăp kan ruih nkai ntoch jong gay rgum droh rklaih jêr jŏt, wăk kol, ntrôl ngăch ƀư mô lah nkra lơh tĭng di quy định, der mpŭng lir, roh huach”.