Năm 2025, pâl nđaih Quảng Ngãi djôt dơn rnoh hao jêng uĕh n’ăp đah rnoh năch n’hanh geh prăk. Dĭng lĕ rnoh năch geh 5,2 rkeh nuĭh, hao rlău n’gul nkôp đah rơh aơ năm bah năp. Tâm nĕ, năch dak bah dih bơi 100.000 nuĭh, hao rlău 3 tơ̆.

Ding lĕ geh prăk pâl nđaih geh 3.700 rmen prăk, hao 2,5 tơ̆ nkôp đah năm 2024. Âk ntŭk tât ta n’gor wăch rgum tay âk năch pâl nđaih. Ntoh lư lah nkual pâl nđaih sinh thái Măng Đen, ăp ƀon pâl nđaih nsum mpôl nkual mpeh Tây n’hanh ăp ntŭk pâl nđaih dak lêng, gôl dak mpeh bah lơ geh Lý Sơn, Sa Huỳnh, Mỹ Khê. Nău hao âk bah pâl nđaih Quảng Ngãi tât bah nău pơk hvi ntŭk ntô jêh nglăp nsum, kơl boăt nthoi săk rnglăy lơn nkual dak lêng gôl dak mpeh bah lơ đah nkual sinh thái, nsum mpôl mpeh Tây, jêng ăp trong hăn, ntŭk tât âk, tâm kơl ndrel. Lơn lah, nuĭh ƀon lan lĕ râng pă an nău rhŏ, mât uănh ndơ sông sa, lễ hội n’hanh nău kan way ơm, nkre rgop mât ndrăy văn hóa, nkre n’hao geh prăk, rgâl nău rêh.