Nar aơ, Quốc hội tâm nchrăp mpeh Nău nchrăp ƀư Luật mât uănh, dŏng ndrăk nsiu, ndơ rtoh n’hanh ndơ dŏng ntop kơl (nkra rgâl). Nău dơi lư uănh tât lah tâm dự thảo luật rơh aơ ntop tay pêh geh sreh sôt âk tâm rmôt ndơ dŏng I ty. Tĭng N’gâng kan Công an, năm bah năp, nu nău dŏng tih phao ê nkra êng, ndơ dŏng i ty gay ntêt nkri n’hanh lơh nuĭh dŭt jêr jŏt.

Tâm 5 năm bah năp lĕ saơ bơi 17.000 rơh, nhŭp kân rlău 26.000 nuĭh dŏng pêh geh sôt rmanh âk ƀư tih đah nău lơh mbram, ƀư ji nuih hô. N’hêl na nê̆ uănh nđôi ăp nău ƀư an saơ, knŭng rmal hinh sự rnôk dơi geh tŏng nău n’glôn jêh nuĭh tih đah ăp nău tih êng, mô geh rmal nuĭh tih mât djôt pêh đao, yor tâm luật aƀaơ mô ntrŭnh pêh lah phao blêu. Dự thảo luật dôl mbơh an Quốc hội tâm nchră, knŭng ntrŭnh pêh geh nău sôt săk âk lah phao blêu rnôk nuĭh dŏng tâm nău ŭch tih pháp luật; Nuĭh dŏng pêh tâm nău ŭch pah kan, nkra njêng, dŏng tâm nău rêh mbra mô geh tâm nău tih nkra rgâl di bah luật aơ.