Ôi ntri (17/6), nthoi tay rơh hop tâl 7, Quốc hội khóa XV, ta nâm nău mât bôk bah Groi Kruanh Quốc hội Nguyễn Đức Hải, Quốc hội tâm nchră ta hội trường mpeh “trong  nchrăp ntuh kơl ƀư trong cao tốc Bắc - Nam mpeh nhâp nar, gâl hăn rlău Gia Nghĩa (Dak Nông) - Chơn Thành (Bình Phước)”. Ăp Đại biểu Quốc hội mĭn lah aơ lah gâl trong dŭt geh nkô̆ khlay tâm buăt nthoi trong cao tốc, buăt nthoi trong me nkual Tây Nguyên n’hanh Đông Nam Bộ.

Nău ntuh kơl ƀư trong mbra tĭng kơn ƀư lôch jêh trong cao tốc tĭng dăp rgum, pơk ntŭk soih hun hao mhe an ăp n’gor n’hanh n’hao dăng mbluh nthoi nkual, njêng suan ntrôl, suan ring lam, dơh buăt nthoi đah tach ndeh păr hăn dak bah dih Long Thành n’hanh ndrâm dak lêng Cái Mép -Thị Vải, rhŏ dŏng an hun hao wăng sa- rêh jêng kon nuĭh nkual Tây Nguyên n’hanh Đông Nam Bộ, kơl n’hao dăng mât đăp mpăn njrăng n’gang neh dak, rnă njrăng. Yơn  lah, gâl trong Chơn Thành-Đức Hòa aƀaơ dơn dăp rgum rdâk njêng trong gưl 3 đồng bằng dơm, ân gŭ mĭn, uănh n’hao têh gâl trong dja ndrel 4 mbor ndeh kơt gâl Gia Nghĩa - Chơn Thành.