Quốc lộ 27 jong 282 km, nthoi ăp n’gor Dak Lak, Lâm Đồng n’hanh Khánh Hòa, geh nău khlay tâm hun hao wăng sa rêh jêng kon nuĭh, đăp mpăn njrăng n’gang neh dak rnă njrăng, lơn lah rnôk ăp n’gor Tây Nguyên hŏ dơi n’glăp nsum đah Duyên hải Nam Trung bộ. Yơn lah, quốc lộ dja dôl tâm nô nău khuch khat jŭr djơh hô.

Gâl trong Quốc lộ 27 hăn rlău thôn Phi Jút (xã Đạ Rsal ơm, aƀaơ lah Đam Rông 3, n’gor Lâm Đồng) jong rlău 1 cây số ntu hŭk dak sor ngâr. Ndeh rdeng năch, ndeh, ndeh ô tô n’hanh lĕ ma ndeh honda lăp ăp nung dak sor bŏk rsĭk. Nô Phan Mười, du hê nuĭh ƀon lan geh jay măt trong ta aơ, an gĭt nô nău khuch khat jŏ ơm 3–4 năm aơ, ƀư jêr jŏt âk an nău kan hăn ntung trong, nchuăn rdeng nkre rŭ hôch geh ma nău roh đăp mpăn.

“Khay mih ri mô dơi ât, dak nung bŏk mbĭr tâm ban kơt lŏ. Ndeh rsong hăn mprănh lĕ bŏk neh tâm mpir jay, hôm khay wai ri way ntĭl mpông mbro, gŭ rêh jêr ngăn. Geh rơh chôt prah ndeh, mô dơn nê geh nuĭh khĭt bah năp jay gâp đŏng. Mpŏng nhih pah kan dơi kan ơm an nkra uĕh tay trong dja an kônh wa rsong hăn dơh soih, ăp oh mon kon se hăn nti đăp mpăn đŏng.”

Nô Bùi Tuấn Anh, nuĭh ƀĭt ndeh nsưng bĭch hăn trong Gia Lai - Lâm Đồng nkoch, nô hŏ ƀĭt ndeh ta trong Quốc lộ 27 bơi 10 năm aơ. Ntơm nơh, gâl hăn bah Dak Lak tât Lâm Đồng dơn roh 5 mông dơm, aƀaơ trong jŭr djơh ân roh tât 6 mô lah tât 7 mông. Tâm rnôk n’glăp nsum n’gor, rnoh năch hao âk 30-40%, nuĭh tơm ndeh ân n’hao âk bôk ndeh rsong hăn. Yơn gung trong jŭr djơh, ndeh ntô lô̆ ƀư năch dŭt lêt rgănh, prăk rdeng hăn roh huach âk rlău du tơ̆ n’gul đŏng:

“Năch hăn ndeh way geh nhŭl; ndeh hăn geh tât khuch, dơh chŏnh ndŭl, lơn lah I bôk bah năp n’hanh bŭt ndeh bah kơi; jâng ndeh ri way geh lŭ mplônh bluh sat jâng ndeh. Rlău ma nê, ntơm nơh trong uĕh ri pring huach đêt, aƀaơ trong djơh ƀư ndeh huach tay 15–20 lít pring ăp bôk ndeh, tă bah nchuăt mbrơi, mô dơi hăn ngăch, ƀư prăk pring hao nklăp 500.000 prăk.”

Wa Trương Trung Thắng - Groi Giám đốc Sở Xây dựng n’gor Lâm Đồng năl, aƀaơ geh nklăp 21 km Quốc lộ 27 hăn rlău nkuâl Đam Rông (ơm), mpeh gâl Km85+500 - Km106 geh khuch djơh hô. Nkô̆ lah tă bah ăp năm mhe aơ mih têh ntoch jong, ndeh rdeng lhăt bêng rsong hăn âk n’hanh nău nkra têh uĕh tay mô hŏ năn ngăch.

Wa Trương Trung Thắng an gĭt, Sở hŏ dăn đă UBND n’gor Lâm Đồng dăn đor lor 10 rmen prăk ƀư nkra ndal ăp ntŭk khuch khat kơt: Muĭh aih pih rêp meng trong, nkra n’hong dak sor hoch, tuh săp tay ntu hŭk, nung dak sor. Mpeh jŏ jong, hŏ njêng trong nchrăp hao rblang dăn UBND n’gor n’hanh Bộ Xây dựng uănh an 110 rmen prăk gay nkra lĕ rngôch 21 km trong khuch, ƀư ntơm bah năm 2026. Wa Trương Trung Thắng lah:

“Aơ lah gâl sop nkuăch nkue, klach rvê, rnoh khuch khat âk ân nkra bah ngăch. Tĭng nê, mpôl hên hŏ ƀư lôch jêh ăp rêng ƀư njêng trong nchrăp nkra, weh ƀư na nê̆, n’hanh aƀaơ hŏ mbơh kloh tâm rlong ndranh ƀư sơch nuĭh tơm ndranh ƀư. rnôk sơch dơi nuĭh tơm ndranh ƀư hôm ri an ntrŭp nkra.”

Quốc lộ 27 aƀaơ mô hôm dơn nthoi đah Dak Lak - Lâm Đồng, ma hôm nthoi đah trong tỉnh lộ 725 hăn rlău ăp xã mpeh nhâp nar bah n’gor Lâm Đồng đah ntŭk rgum kan Đà Lạt. Nkra têh uĕh tay trong quốc lộ dja mbra droh rklaih kô̆ yơn kol khan hun hao bah n’gor, nkre kơl đăp mpăn an nuĭh ƀon lan. Tâm n’hao buăt nthoi tâm ntêng lêng nkual, geh trong me Đông - Tây hun hao lĕ ma nkual Nam Trung Bộ.