Di nkah gĭt 99 năm Nar Báo chí Cách mạng Việt Nam, ôi nđaơ (20/6) Tổng giám đốc Radio Nău ngơi Việt Nam Đỗ Tiến Sỹ, ăp Groi tổng giám đốc: Trần Minh Hùng, Vũ Hải Quang lĕ wơt âk ngih pah kan, ntŭk kan tât mbah rhơn Nar báo chí Cách mạng Việt Nam. Mbah rhơn 99 năm nar báo chí cách mạng Việt Nam, kruanh ăp ngih pah kan, ntŭk kan lĕ njuăl ăp nău mbah rhơn uĕh lăng ngăn tât nsum mpôl cán bộ, kruanh n’hanh phóng viên, biên tập viên, kỹ thuật viên, nuĭh pah kan bah Radio Nău ngơi Việt Nam.

Tổng giám đốc Radio Nău ngơi Việt Nam Đỗ Tiến Sỹ an gĭt, Radio Nău ngơi Việt Nam dôl geh âk njoăt rgâl têh dăng gay ndâk njêng Radio jêng ngih pah kan báo chí tơm khlay, âk ntil, âk trong mbơh nău, âk nău ngơi jêng ngih pah kan truyền thông têh bôk năp bah lam dak, dơi nsing nơm khlay tâm châu lục n’hanh lam ntŭr neh. Radio dôl nsrôih ƀư tĭng rgâl mrô báo chí nsing tâm 3 n’gâng tơm khlay lah: nkô̆ nău mrô, nkoch ndơ̆ mrô n’hanh nsum mpôl ƀon lan mrô, uănh aơ lah trong mkra geh nău mhe, geh nkô̆ nău ntrŭnh tât nău hôm e n’hanh hun hao bah ngih pah kan báo chí lah nsum n’hanh Radio Nău ngơi Việt Nam lah êng tâm rơh mhe.