Ôi 29/12, ta Hà Nội, Thủ tướng Chính phủ Phạm Minh Chính ƀư tơm rƀŭn nchră mpeh “Đăp mpăn rnă njrăng, rhăt jăp rhŏ an hun hao wăng sa rêh jêng nkual Dâng rđŭng dak me Cửu Long”. N’glôn jêh ta Rƀŭn nchră, Thủ tướng Chính phủ Phạm Minh Chính mĭn lah, nkual Dâng rđŭng dak me Cửu Long n’hanh ntŭk kiău ma geh ntŭk trong kan dŭt têh khlay mpeh chính trị, wăng sa-rêh jêng, mât njrăng bri dak, rnă njrăng, ntŭk ntô bri dak, tâm rnglăp nchră nău bah dih; lah “mpông luh” mpeh bah dâng tă bah neh dak n’hanh hăn ndrel đah nău kan ndâk njêng, mât njrăng ƀư tơm neh dak bah neh dak.

Thủ tướng Chính phủ lah rjăp, ăp ban, n’gâng kan, nău kan, ƀon lan an rgum mbơh ƀư tĭng nău kơl rnoi nuĭh, chroh rƀŭn; ƀư tĭng ăp bôk nău kan hun hao wăng sa, văn hóa, rêh jêng, nta an nău kan, mkra nău tâm rkeh, ji nuih; ntrôl nău ƀư dŭt n’hâm, nău mĭn hao êng, bah ƀon lan tâm hun hao wăng sa-rêh jêng n’hanh mât rƀay, ƀư uĕh ăp nău khlay uĕh bah văn hóa, dah rŏng tĭng nău way ơm; n’hao nău rêh drăp ndơ, nuih n’hâm bah ƀon ăp rnoi nuĭh ta lam nkual, nâp nâl tâm trong kan njrăng n’gang rêh jêng; jŭt jăng ăp nkô̆ nău, ăp nkô̆ nău ma ăp nuĭh rlăng, dun n’gang mplư rlăm. Ta năp măt, tâm năm 2026, Thủ tướng Chính phủ jao ăp n’gâng kan, nău kan, ƀon lan jêh 7 rmôt nău kan têh, khlay mpeh mât uănh, hun hao wăng sa, văn hóa, ntĭm nti, dak si nkual Dâng rđŭng dak me Cửu Long.