Ôi nđaơ, Ban ntĭm rđău gưl ngih dak rơh tâm rlong tốt nghiệp THPT năm 2024 ƀư rƀŭn nchră trực tuyến đah Ban Ntĭm rđău tâm rlong bah 63 n’gor, nkual ƀon têh gay kơp uănh trong kan nchrăp an rơh tâm rlong mbra ƀư bah lơ 26 tât lơ 29/6 tât. Rơh tâm rlong tốt nghiệp THPT năm 2024 dơi ƀư ntơm mât đăp mpăn kơt lvang 2020-2023. Dĭng lĕ kon hŏk dăn râng tâm rlong năm aơ rlău 1 rkeh 71 rbăn oh, hao rlău 45 rbăn kon hŏk nkôp đah năm e.

Ntoh ngơin’glôn jêh ta rơh rƀŭn, Groi kruanh N’gâng kan ntĭm nti Phạm Ngọc Thưởng, Kruanh Ban ntĭm rđău gưl ngih dak rơh rƀŭn tâm rlong tốt nghiệp THPT năm 2024 đă Ban ntĭm rđău tâm rlong ăp n’gor, nkual ƀon têh mât uănh tay, mbơh ƀư na nê̆ ntĭm đă 15 bah Thủ tướng Chính phủ mpeh n’hao ntĭm rđău, tâm rgop ƀư rơh tâm rlong tốt nghiệp THPT n’hanh săch nti đại học, ntĭm nti nău kan năm 2024. Nuih n’hâm nsum lah mô thơ tha n’hanh nta uĕh ngăn an kon hŏk, me bơ̆, mô an kon hŏk an ntlơi tâm rlong yor nău jêr jŏt; đăp mpăn lĕ rngôch, di na nê̆; mkra ngăch ăp nău mhe ntoh, nu nău ndal; mô an geh kon hŏk djôt điện thoại, ndơ tâm ôp tâm mbơh lăp jrô tâm rlong.