Rơh rƀŭn rgum ăp khay ta khay 8 năm 2024 ta Chi bộ ƀon Njrang Lu, xã Dak Ndrung geh ƀư tĭng di đah nău ntrŭnh. Lôch rnôk Chi ủy tâm nchră lor, lĕ rngôch ăp đảng viên tâm chi bộ tât râng di mông. Tĭng rnoh kơp, Chi bộ geh 34 đảng viên, tâm nĕ geh 28 đảng viên Bunong geh rlău (28%), kanŭng geh 6 đảng viên nuĭh Yuan. Bol ma ta bôki khay mih, nău pah kan mir ba, srĭh tăm âk nău mô ru, yơn ăp đảng viên ƀư tĭng mông rƀŭn rgum di nău ntrŭnh, rŏng rnoh nuĭh. “Gâp geh rƀŭn rgum tâm chi bộ rĭ an geh hăn lor bôk năp ăp nău kan. Sinh hoạt đảng rĭ ƀư tĭng ăp nău ntrŭnh bâh Đảng. Ƀa ƀơ tât ôp khâl, rgŏ jă oh yuh tâm trong pah kan jan sa, mât chăm tiu, cà phê an nău geh âk. Săk gâp nơm way n’hao nău kan rĭ mơ geh ƀư tĭng, djăt tĭng. Lĕ rngôch ăp nău ntrŭnh mhe rnôk gâp gĭt dơn rĭ geh mbơh tơih tay đah ăp oh yuh ndrel gĭt vât Way geh mât chăm ueh an rnăk vâl, kơl an ăp nuĭh, nsrôih ƀư pah kan jan sa an hun hao nău wăng sa têh”.

 Nĕ lah nău ntoh ngơi bâh đảng viên Thị Nhum rnôk tât râng ƀư tĭng nău tâm mâp rƀŭn rgum chi bộ ƀon Njrang Lu, xã Dak Ndrung, đah ăp nkô̆ nău dŭt na nê̆ đah nău rêh bâh ƀon lan ta ntŭk. Nău hăn lor bôk  bâh đảng viên lĕ mpơl tâm nău ngơi n’hanh nău pah kan.

Tât râng rơh rƀŭn rgum an saơ ăp nkô̆ nău mbơh tơih ta chi bộ ƀon Njrang Lu tĭng di nău ntrŭnh 22 bâh rnâng kan leo kan Trung ương năm 2018 n’hanh nău ntrŭnh 23 bâh rnâng kan leo kan n’gor Ủy Dak Nông năm 2018. Lôch geh ăp đảng viên lĕ tât râng tŏng ăp, Bí thư Chi bộ mbơh tơih bôk năp mpeh nău mhe tâm dak n’hanh dak bah dih, ngăn lah nău ta ntŭk, mbơh tơih ăp săm ƀŭt nău ntrŭnh ntŭk kan ba lơ, mbơh tơih ta ntŭk. Lôch nĕ, Chi bộ lĕ rgum uănh năl tay ăp nău pah kan bâh khay ba năp ta ăp trong kan hun hao wăng sa , văn hóa rêh jêng, mât đăp mpăn rnă njrăng ngih dak, nău kan rdâk njêng đảng, rdâk njêng trong kan chính trị n’hanh nău pah kan đah ăp ntŭk kan tâm thôn ƀon. Lôch rnôk ăp đảng viên tâm nchră ăp nkô̆ nău mbơh tơih, nchră na nê̆ kloh rjăp ƀư tơm, mpơl nău dơn kan têh. Chi bộ mbơh tơih trong kan tâm khay let năp tay. Wa Thị Rơi -Bí thư Chi bộ Njrang Lu lah na nê̆, nău kan hăn lor bôk năp bâh cán bộ, đảng viên an geh mpơl nău kan tâm mât rƀŭn rgum. Năp lor, Bí thư Chi bộ an hăn lor bôk năp, nsrôih tâm ăp nău pah kan, ƀư lôch lor n’hanh geh nău geh ueh rĭ ƀon lan mơ tĭng. Đah nuĭh leo kan tơm an geh nsrôih , hăn lor. Gâl ủy Đảng an geh ntĭm leo ƀư ueh jăp ăp n’gâng kan ba dâng kơt Chi hội nông dân, bu ur, Cựu chiến binh, Đoàn thanh niên, nuĭh âk năm deh...an geh ƀư tĭng, uănh leo jăp rĭ mơ geh nău dơi ueh. Đah Chi bộ gâp tâm năm 2024, tĭng Đảng bộ xã rgŏ jă, nău nchrăp rdâk njêng “Chi bộ 4 nău ueh” nĕ lah: Leo kan ƀư lôch ueh trong kan chính trị, ƀư ueh nău rƀŭn rgum chi bộ, cán bộ Đảng viên ueh n’hanh kỷ luật tâm rnglăp ueh tâm chi bộ. Chi bộ năm aơ mbơh dăn “Chi bộ ƀư lôch ueh jăp nău pah kan”.

Di kơt nău ntoh ngơi bâh wa Thị Rơi- Bí thư Chi bộ ƀon Njrang Lu, nău leo kan bâh gâl ủy Đảng đah nău pah kan bâh ăp ntŭk kahn geh mpơl na nê̆ ngăn. Ngăn lah, đah  Đoàn thanh niên an geh ngăn ngên lah “ti ma n’hanh ntŭk kan kơl ba kơi bâh Đảng” kơt nău wa Hồ lĕ nti. Nô Y Khuyên- Groi Bí thư Đoàn thanh niên xã Dak Ndrung, nkuăl Dak Song, lah đảng viên rƀŭn rgum ta Chi bộ ƀon NJrang Lu an gĭt, gâl ủy Đảng dŭt mât uănh, ntĭm đă sŏng dăng, na nê̆ tât ăp nău pah kan ngăn ngên bâh Đoàn thanh niên tâm khay rlu nti 2024. “Tâm ba năp nơh Đoàn thanh niên xã hên lĕ geh âk nău pah kan na nê̆ kơt : Nău kan mpoh ang trong ƀon rdâk njêng 5 jrŏng điện đah ŭnh măt nar ta xã Dak Rmo. Ta khay rlu nti Đoàn thanh niên tâm rgop đah rmôt kan dân vận xã mbơh ƀư nău kan njrăng rmok dak ta oh kon se, nti re, nti vơt kơl nuĭh rmok dak, ƀư chưng play an oh kon se ta khay rlu nti. Tâm rgop đah Đoàn nkuăl ƀư donh ndok kuaih ueh  kloh trong tỉnh lộ 6. Mpôl hên tâm rgop đah Ban an toàn giao thông n’gor Đăk Nông pơk jrô nti kĩ thuật ƀĭt neh đăp mpăn. tâm rgop đah phòng Dân tộc nkuăl Dak Song pơk jrô nti mbơh tơih tâm gŭ ur sai, deh đê̆ kon ta rnăk vâl n’hanh mât chăm săk soan mom ndăm.