Nar nđaơ (15/3), ta Hà Nội, Tiểu ban rnă njrăng, đăp mpăn ƀư nkah gĭt 70 năm Điện Biên Phủ lơh dơi n’hanh du đêt rƀŭn nchră, nău ƀư têh năm 2024 bah N’gâng kan Công an ƀư rơh rƀŭn mbơh ƀư trong kan đăp mpăn rnă njrăng.

Thượng tướng Lương Tam Quang, Ủy viên Trung ương Đảng, Groi kruanh N’gâng kan Công an, Kruanh Tiểu ban rnă njrăng đăp mpăn ƀư tơm rơh rƀŭn. Đă mpeh trong kan đăp mpăn rnă njrăng đah Ƀư nkah gĭt 70 năm Điện Biên phủ lơh dơi n’hanh ăp nău ƀư têh dơi N’gâng kan Công an n’gluh an dŭt têh.

Tĭng gưl, nău kan dơi jao, Công an ăp ntŭk kan, ƀon lan nsrôih ƀư, đăp mpăn nău rƀŏng, đă, ngăch n’gluh an. Groi kruanh n’gâng kan Lương Tam Quang lah rjăp, năm tât, geh 3 nău khlay bah neh dak ƀư ta Điện Biên n’hanh Đà Nẵng. Công an ăp ntŭk kan, ƀon lan tâm ban ŭch nău mĭn rƀŏng tĭng prêh ngăn nĕ lah đăp mpăn lĕ rngôch rnă njrăng, đăp mpăn an ăp nău ƀư, rƀŭn nchră lôch uĕh; mô an geh nău geh ndal. Lah rjăp, aơ lah nău kan chính trị khlay bah lĕ rmôt Công an ƀon lan tâm 6 khay bôk năm. Groi kruanh n’gâng kan Lương Tam Quang đă Công an ăp ntŭk kan, ƀon lan mô an geh thơ tha, rơh nău njrăng, mĭn nchrăp gĭt nu nău, mkra lĕ rngôch ăp nău geh tât rnă njrăng đăp mpăn ntơm bah dâng.