Ăp đồng chí rđau kan mhe, ơm bah Đảng, Ngih dak, Mặt trận Tổ quốc Việt Nam hăn jŭm bong, ntĭnh Tổng Bí thư Nguyễn Phú Trọng-rđau kan blau ngăn ngên, nŭih leo trong ang mpeh nau ntĭm nti, pah kan tĭng nau mĭn, nau kan, nau rêh Hồ Chí Minh, nŭih Đảng viên nâp, geh nau rnơm têh bah Đảng. Ngih dak ndrel ƀon lan nơm, nŭih geh tŏng ăp nau gĭt, nau blau, nau janh, bôk rngok bah rơh rđau kan Việt Nam tâm rnôk rgâl mhe. Đah nau klâng ngăn, Uỷ viên Bộ Chính trị, Kruanh dak Tô Lâm nchih tâm săm ƀŭt nkah: “Dŭt n’hâm rngot klâng đồng chí Nguyễn Phú Trọng, Nŭih kon ŭch rŏng bah rnoi mpôl Việt Nam.  Nŭih rđau kan blau, nŭih đảng viên cộng sản janh dăng, du nŭih leo trong ang mô rlu ntĭm nti, ƀư tĭng nau mĭn, nau rêh, nau kan Hồ Chí Minh, geh nau rnơm ngăn bah Đảng, Ngih dak ndrel ƀon lan nơm, nŭih băl têh bah ƀon lan lam ntur neh, nŭih dŏng lôch n’hâm nơm, nsôih, ƀư kan ân neh dak.Ân Đảng, ân ƀon lan, geh âk nau kan têh ndrel nau ƀư têh ân nau kan cách mạng bah Đảng ndrel rnoi mpôl, ân nau kan cộng sản lam ntur neh ndrel mât nau đăp mpăn, nâp nâl, hun hao tâm nkuăl ndrel lam ntur neh.Ryơk ndrel nkêng săk nơm bah năp huêng khlay bah đồng chí, hên mra ntĭm nti, kơt tĭng đồng chí, lôch n’hâm, nsôih ƀư ân geh nau dơi nkô̆ nau ndâk dak Việt Nam nâp nâl, đăp mpăn, tâm ban, ƀon lan ƀư tơm, sâm dăng, ueh lăng, rhơn m’ak ma đồng chí lôch n’hâm nsôih ƀư, nsôih kan tât lôch săk”.

Tâm ôi 25/7, rmôt kan ntoh măt lam ntur neh, cán bộ, Rnâng kan, ntŭk kan ăp n’gor, nkuăl ƀon têh lam dak lăp chang Tổng Bí thư Nguyễn Phú Trọng ndrel tâm pă nau rngot ma rnăk vâl./.