Đại hội đại biểu lam dak tâl XIV bah Đảng, nar kan chính trị geh nkô̆ khlay mha êng đah hun hao neh dak let năp tay, Mpôl đại biểu Đảng bộ n’gor Khánh Hòa đah nuih n’hâm dơn kan âk, nău nchrăp răp jăp n’hanh nsing nơm nâp dăng tâm nău dơi bah Đại hội; nchrăp rgop nău gĭt blău, nău tă ơm gĭt ngăn ngăn tâm ăp nău n’glêh an têh jong bah Đảng tâm rơh hun hao mhe.

Mbah rhơn Đại hội Đại biểu lam dak tâl XIV bah Đảng, ntơm bah kêng dŭt khay 12/2025, n’gor Khánh Hòa hŏ rdâk ƀư, sa nkra 5 ntŭk nchrăp kan têh. Wăng sa rêh jêng kon nuĭh bah n’gor rgâl geh tay nsing ta suan hun hao bah năm 2025, njêng nău rgâl kloh an nău rêh ƀon lan lôch bah trôk nar lơh. Ta xã Thuận Bắc, n’gor Khánh Hòa, âk rnăk nsan hao tay klaih rlău ach o, nsing nơm wăng sa, rdâk njêng nău rêh đăp mpăn, hơm răm lơn. Wa Chamaléa Thị Điêm, nuĭh Raglay, ta thôn Đá Mài Dưới, xã Thuận Bắc nkoch:

“Rƀŏng tât Đại hội XIV bah Đảng, kônh wa mpôl hên nsing nơm n’hanh ŭch rŏng ăp nuĭh ntơh măt uănh khlay jru tay tât nkual ƀon lan rnoi mpôl đê̆; wat jêh siƀŭt mbơh chính trị tĭng trong rƀŏng grêt dăch ngăn ngăn, ntuh kơl di rgum tơm, di nuĭh. Bah nê, rdâk tay dăng lơn đŏng nău nđơr nsrôih ndôr êng, nsan hao êng, nuih n’hâm tâm rnglăp, nău mĭn nsrôih hao bah ƀon lan, gay nuĭh rnoi mpôl đê̆ mô dơn klaih rlău ach o jŏ jong ma hôm rgop uĕh tâm nău hun hao nsum bah neh dak”.

Râng Đại hội Đại biểu lam dak tâl XIV bah Đảng, Đảng bộ n’gor Khánh Hòa geh 32 đại biểu. Nuih n’hâm dơn kan bah ăp đại biểu dơi mpơl kloh tâm rnôk nchrăp râng Đại hội. Ăp nău rgop bah cán bộ, đảng viên n’hanh ƀon lan tâm n’gor Khánh Hòa đah trong nchrăp ăp siƀŭt Đại hội hŏ dơi rgum nchih, njuăl tât Trung ương bah ơm. Ăp đại biểu rong an âk mông nar uănh năl di na nê̆ ăp trong nchrăp, gay râng tâm nchră geh nău tam. Groi Giáo sư, Tiến sĩ Phan Quốc Anh, giảng viên Nhih nti Đại học Văn Lang, đại biểu N’gor Khánh Hòa râng Đại hội XIV an gĭt:

“Gâp dŭt di nuih n’hâm đah trong nchrăp nghị quyết rơh dja rnôk Đảng lah rjăp tay hun hao văn hóa ndrel đah hun hao wăng sa. Trong nchrăp lah rjăp hun hao công nghiệp văn hóa, rdâk njêng lam rnoh khlay neh dak, văn hóa kon nuĭh n’hanh rnăk wâl; uănh wăng sa drăp ndơ ơm yău ntlơi an tay, văn hóa lah tơm suan ntrôl dăng an hun hao. Ta nuih n’hâm dơn kan bah đại biểu, gâp mbra nsrôih rgop nău tâm ăp siƀŭt nchrăp nghị quyết, bôk nău kan.”

Tĭng wa Nghiêm Xuân Thành, Bí thư Tỉnh ủy, Kruanh mpôl đại biểu Đảng bộ n’gor Khánh Hòa, ăp đại biểu tâm mpôl mbra ntik n’hao nuih n’hâm dơn kan, nău rgop nsing ta n’glôch jêh ngăn ngăn hun hao bah n’gor n’hanh neh dak. Lơn lah, mbra rgum tâm trong kan ma n’gor rhuăt luh bah ngăn ngăn: 

“Đah Khánh Hòa, n’gor hŏ n’hanh dôl gŭ mĭn, dăn đă ăp trong tĭng, trong kơl mô dơn n’glĕ ta mât dŏng ma hăn tât mât uănh dak lêng rsang uĕh. Rgum tơm lah hun hao pâl nđaih, rhŏ dŏng, tuch tăm dŏng công nghệ mhe, lơn lah mât tui ka công nghệ mhe; hun hao rhŏ dŏng logistics n’hanh công nghiệp meng dak lêng. Nkre, n’gor mbra râng rgop ƀư lôch jêh trong tĭng, trong kơl ta gưl neh dak gay mbluh soih ăp tơm ndơ an hun hao wăng sa dak lêng ta ăp ntŭk săk geh dơh uĕh, bah nê rgop uĕh tâm nău hun hao nsum bah neh dak.”

Bah ngăn ngăn hun hao uĕh bah n’gor, lơn lah ăp nău dơi hŏ geh tâm sĭt jêng tay wăng sa- rêh jêng kon nuĭh, mât chăm nău rêh bah ƀon lan n’hanh rƀŏng trong hun hao wăng sa dak lêng jŏ jong, ăp đại biểu Khánh Hòa mpŏng mbra rgop ngăn ngăn tâm nău wat jêh ăp n’glêh an trong kan têh jong bah Đại hội. Ăp nău rgop lĕ nuih n’hâm, dơn kan nê mô dơn mpơl nău nsing nơm bah cán bộ, đảng viên n’hanh ƀon lan Khánh Hòa tâm nău dơi bah Đại hội XIV, ma hôm lah rjăp nău nsrôih hăn ndrel lam dak tĭng ƀư nău nđơr geh hun hao ngăch, jŏ jong, rdâk njêng neh dak ăp tŏng, rhơn răm tâm rơh mhe.